港男格仔舖買二手哥斯拉 原來是「身首異處」 質疑賣家存心隱瞞

撰文:
最後更新日期:

不少人會到格仔舖買二手玩具心頭好,但如遇上貨不對辦、質素差到「不似預期」,實在是掃興兼激心。一名有維修玩具經驗的市民早前在油麻地商場「現時點」一間格仔舖,花費100元購買二手哥斯拉公仔,「畀錢後行咗三、四步一轉身」,就發現公仔「身首異處」,由於趕時間離開及預計自己可以維修到,所以沒有與賣家理論。事主其後在網上怒斥過往見到破爛玩具都會甘心購買維修,但今次賣家沒有說明哥斯拉是斷頭,形容「感覺被佢呃咗」。網民都留言炮轟賣家缺德,「最憎啲人做埋呢啲偷呃拐騙,嗰幾十蚊就買咗個人格」。

李先生在油麻地現時點一間格仔舖,花費100元購買二手哥斯拉公仔,但隨即發現公仔「身首異處」。(李先生提供圖片)

下載「香港01」App ,即睇城中熱話:https://hk01.app.link/qIZYuEC5LO

李先生向《香港01》表示,以前做廣告設計,最初不懂維修玩具,「只係一路玩一路試(維修破爛公仔)」,例如超人吉田的敵對怪獸「凱姆拉」,在格仔舖見到時已發現「係無鰭無手,10蚊標價,願者就買啦,我心甘命抵預咗返嚟整」。他試過用紙黏土加上「義肢」,過程是屢敗屢戰,亦會在YouTube看片自學,最終成功為凱姆拉加鰭手及填色,配合其他怪獸公仔一起擺姿勢,加上電腦美術技巧,構成一幅張力十足的怪獸圖。

李先生在上周二(19日)前往現時點商場,在一間格仔舖見到一隻二手哥斯拉公仔,標價100元,賣家沒有說明公仔有任何破爛地方,李相信公仔完好無缺,「諗住買返嚟即刻玩得影相」,詎料付款後「轉身行咗兩三步,攞上手想轉下啲關節,(睇吓)手腳有無事,好細力轉個頭,佢(頭)已經甩出嚟」,由於李要趕住上堂,而且預計自己可以處理到,所以離開商場,沒有與賣家理論。

李先生把公仔修復,配合其他怪獸公仔一起擺姿勢,加上電腦美術技巧,就構成一幅張力十足的怪獸圖。(李先生提供圖片)

回家後,李先生暫時用「藍寶貼」(Blu-Tack)黏好哥斯拉的頭部再拍照,然後在各facebook玩具群組圖文並茂講述事件,但表明「發洩下就算」,因他認為賣家「有心咁做,無必要同佢理論,同佢理論都嘥氣」。

帖文引起不少網民「畀嬲」,多人留言狠批「最憎啲人做埋呢啲偷呃拐騙,可以賺多幾多錢啫,嗰幾十蚊就買咗個人格」,亦有人指「去深水埗買隻新嘅都係200元之內」,認為賣家放售一隻甩頭哥斯拉,標價100元並不合理。

立刻Like!讚好《01熱話》:


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。