【容祖兒演唱會】謝霆鋒為撐場趕返香港 一句說話冧到Joey暈晒浪

撰文:黃浩晉
出版:更新:

容祖兒《Pretty Crazy》演唱會每晚都有重量級嘉賓,繼張學友與劉德華兩位天王助陣後,昨晚又有一位「Boss級人馬」現身,他就是謝霆鋒。兩人由細玩到大,霆鋒更是特意從外地趕返香港撐場,一句說話冧到Joey紅都面晒。

Joey介紹霆鋒出場時說:「如果張敬軒係靚仔,佢係超級靚仔!佢平時好Chok,但係其實有一顆溫柔的心,因為我見証過!」隨後唱出《玉蝴蝶》介紹對方出場,令台下陷入瘋狂,尖叫聲不絕。

及後兩人相擁,Joey說:「Hello 大佬!點解咁耐唔見你?你係咪係北京忙緊呀?」寒暄後補多句:「我以為你係北京過……你呢輪dry唔dry呀?」頓時令霆鋒尷尷尬尬,能夠令這位型佬流露羞澀的表情實在不簡單。

兩人老友鬼鬼,Joey突然問霆鋒呢排Dry唔Dry,搞到對方鬼咁尷尬。

霆鋒及後立刻轉話題:「記得你搵我個日你病緊,我真係聽唔到佢講乜,講咗三個唔知咩字。我就話,你唔好講野住,你要乜都得,唔緊要!」他續說:「其實大家都知唔止我一個,全行仲有好多人都會撐容祖兒,因為佢係一個抵撐嘅人!」Joey即刻冧到暈掩面:「好感動呀! 謝霆鋒同我講呢啲嘢!」

+1
霆鋒大讚Joey係抵撐嘅人,冧到對方紅都面晒。

不過輕鬆完一輪,霆鋒忽然一本正經,有說話跟紅館講:「我想同呢個空間講,紅館呢個空間呀!我入左紙兩年,一次又一次被推翻,再推我就唔開喇!」Joey聞言立刻打圓場:「鋒哥,千錯萬錯都係我嘅錯!唔好咁講,你知唔知我呢個騷都攞咗很耐期先有!無論等到邊一日,總之大家都會等你嘅,係咪?」最後兩人合唱《阿門》,又走到觀眾席握手,Joey對觀眾讚霆鋒:「係咪好靚仔?不老傳說呀!食咗防腐劑呀!」

霆鋒表示入紙紅館兩年仍然被拒,再被拒就不再開紅館騷,Joey聞言立刻幫手打圓場。