【容祖兒演唱會】古天樂首live《今期流行》 回憶當年結緣電視城

撰文:
最後更新日期:

容祖兒《PRETTY CRAZY》紅館演唱會第11場繼續精彩,昨晚的嘉賓請來古天樂,近來他密密現身演唱會,但今次一樣有驚喜,抱病上場已經好有義氣,更獻唱多年來從未live過的經典歌《今期流行》,怪不得一出場便讓全場歌迷「叫到拆天」,氣氛high到最高點!

又來到每晚最精彩環節之一的嘉賓時間,Joey這樣介紹:「今日到底係邊個好呢?畀個貼士大家,話畀大家聽,呢一位係男神嚟㗎,我相信全香港呢冇人唔鍾意佢嘅!佢由細到大都好錫我㗎!」又同歌迷夾定:「陣間音樂一起,大家喺適當嘅時間一齊做一個動作。」便為歌迷示範跳起《今期流行》的「拜神舞」動作,同時為大家揭曉嘉賓身份——古天樂!全場歌迷立即陷入一片瘋狂,「記住呀,佢一陣上嚟大家就要一齊做嗰個動作啦!」隨即,音樂奏起,古天樂便鬼馬地從升降舞台中出現,和Joey一起合唱《今期流行》。

第11場的嘉賓是古天樂。

雖然合唱時有少甩轆,但完全無礙台上台下的火熱氣氛,歌畢後祖兒用國語大讚:「帥呆了!帥呆了!歡迎我第11場嘅特別嘉賓,古天樂先生!呢啲真係顛倒眾生呀!」又看着古天樂打招呼:「Hello~你好嗎?」其實在唱歌時,已能從古天樂的聲音中聽到病意,但他仍然回答:「我好好!我講句說話畀大家聽先,首先我今日係病緊㗎下!」然後便看着Joey說:「第二件事呢,《今期流行》好似從來未喺live唱過㗎下!」Joey便激動接話:「係呀!佢係一輩子都冇喺現場演繹過呢一首經典金曲㗎!真係好錫我呀你!」再挑皮一問:「你係唔係前世欠咗我㗎?」古天樂寵溺一笑,再笑笑回答:「應該係啦!」十足十哥哥對着頑皮的妹妹,卻完全拿她沒轍。

二人在台上邊唱邊玩。

Joey再開心地問:「你記唔記得你好多年前做過我演唱會嘉賓?」「咦,你當我老人痴呆症喎!」古天樂的回答讓Joey再笑了,並繼續道:「我唔係,但我驚你咩啫,貴人善忘呀嘛!」古天樂便自顧自回憾說:「你上一次嘅演唱會呢,我有同你影咗一張相。」Joey當然不放過百厭整蠱古天樂的機會,便立即說:「係呀,嗰陣時你好白嘅。」說到自己也忍不住笑出來,續說:「但你依家都唔係好黑~」古天樂補充:「你嗰陣時同你阿媽去電視台。」Joey也細說回憶:「你嗰陣時仲喺電視台度拍緊劇嘅,咁我就鼠咗入電視城度,竟然畀我撞到你喎!咁我梗係唔會放過呢個機會啦,就係呢一張相呀,就畀我溝掂咗你啦!」又笑着解釋只是開玩笑,自己當然不敢。說罷,古天樂便立刻瞇眼看着Joey點頭說:「但係唔知點解,我有啲谷鬼氣,仲話叫我戴ear mon,我都話唔好戴啦,我聽唔到現場啲聲音!」讓Joey立即大呼:「唔係嘛!唔通今日啲觀眾太熱烈喇!」古天樂便說:「唔係呀,我想講,唱多次《今期流行》呀!火滾呀真係!」Joey聞言便嚇得目瞪口呆:「你真係好鍾意唱歌喎!」古天樂便問:「咩呀?驚overrun呀?你係咪都搞多咗一場㗎啦!」Joey沒好氣的回答:「我唔驚!我畀你唱埋落去都仲得!」音樂便再次響起,二人再一次合唱《今期流行》。

更在古天樂的要求下,唱了兩次《今期流行》。

歌畢,看到古天樂上氣不接下氣,Joey便說:「抖一抖先啦,最受歡迎男歌手!」古天樂又突然回氣說:「呀唔係第11場呀,咁我知道呢11場你又未同大家影過相嘅!」Joey便解釋與歌迷保持距離只因為被傳染,然後更大拍馬屁:「向來我都知道古天樂又順得人又對人好,雖然佢外表好似好惡,但內心就好善良嘅,但佢又史無前例咁搶我個台啲咪講嘢,又搶埋啲觀眾上台!」古天樂當然不理她,自己倒數和歌迷玩遊戲,便挑選了3個歌迷上台合照,讓全場歌迷開心到不行,又苦口婆心的跟Joey說教:「我同你講,接觸下人,大家開心啲咪好囉!」又裝作忘記還有一首合唱歌,對Joey說:「喂,你冇咩要求,咁我走㗎啦!」Joey立即拉住他的手說:「咪住呀,你哋唔想再聽多佢唱多一首歌咩?你咁鍾意唱歌,不如唱多一首啦!」在歌迷和Joey盛情難卻的邀請下,他便留下再合唱《男朋友》才離開。

+10
+9
+8


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。