【容祖兒演唱會】古巨基現身大爆Joey酒後瘀事 原來馬桶好好玩?

撰文:
最後更新日期:

容祖兒《Pretty Crazy》要館騷踏入第十八場,每晚特別嘉賓都為大家送上驚喜,昨晚邀請到古巨基上台,大爆Joey飲醉酒做過的傻事,笑到觀眾肚痛之外,連Joey都笑到碌地。

基仔與Joey認識多年,老友鬼鬼自然多趣事分享,昨晚Fans尤如看了一場棟篤笑。

基仔上到台先打招呼:「阿祖,係咪要摸下我濕滑隻手先?」祖兒反問:「你個枝嘢咩嚟?」基仔答得相對暖昧:「我枝野又黑鼆鼆,又毛鬙鬙……」當大家以為他要開黃腔,實情他在形容那個咪套:「係羽毛球柄嘅毛巾套呀!因為我呢幾年整壞左好多支咪,每支都成八萬幾蚊㗎。因為手汗太大,一揮手成枝咪飛走咗。」

基仔大爆一次Joey來家作客的瘀事,飲醉後雙手向天發功又攬實馬桶,想不到天后都有鮮為人知的一面。

Joey本身想拉開話題繼續「質問」基仔,豈料被大爆飲醉酒「發功」的事。基仔說:「我哋識咗十幾年,係近幾年先特別熟,多咗好多聚會。」Joey即刻緊張起來:「你又爆料?乜成公司都係咁㗎……」基仔笑話:「大家想唔想聽容祖兒平時生活啲傻瓜嘢呀?」觀眾反即起哄和應:「事緣係咁,阿祖係一個好乖唔識飲酒嘅女仔,同我一樣……」他續說:「有一次Mani(霍汶希)同你嚟我屋企食飯,你有啲事遲咗到。喺樓下個保安話『容小姐你可以入去喇』,你講咗幾次『你點知我姓容架!?嚇到Mani即刻拉你走!」

Joey尷尬得一邊叫基仔收聲,一邊笑到碌地。

你以為咁就完?未!基仔再爆Joey一上到去就雙手向天「發功」:「我以為你整整下成個人可以飛起!」此時Joey已經笑到碌地,但基仔冇停過再講:「仲有呀,跟住你入咗廁所好耐,Mani不停敲門。過咗陣個門鎖鬆開咗,大家見到你攬住個屎塔!當我哋扶你起身,你就話『 基仔!我發誓呢度係我嚟過最好玩嘅地方!』我都唔知個馬桶咁好玩㗎!早知我都玩下啦!」基仔再下一城問觀眾:「各位想唔想睇片呀? 其實我有當晚條片,我對朋友好好,我唔會出賣朋友嘅,除非佢係fans叫啦!我有帶手機,有冇air drop呀?不如一次過啦!」笑完一大輪兩人正經合唱《狂串樂基兒》,全場當正紅館係K房一樣大合唱。

Joey在台上認真表演,原來私下一樣Pretty Crazy。

Joey笑到碌地逐格睇!
+3
+2


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。