演唱會全Cut製作公司4個月零收入 老闆:每個月淨蝕30萬!

撰文:
最後更新日期:

新冠肺炎持續肆虐,各行各業都面臨重創,對於表演藝術行業來說更是苦不堪言,事關他們正是手停口停的一群。近4、5個月演唱會相繼取消及延期,對樂手、台燈聲工作人員、宣傳人員的生計大受打擊。《01眾樂迷》早前致電過身兼太極樂隊結他手,及著名樂手的Joey Tang如何面對疫市,他亦慨嘆一句:「都唔知捱到幾時……」
相關文章:音樂圈相關工種疫市手停口停 Joey Tang:昐政府照顧藝術工作者
除了樂手生計受影響,對於演唱會製作公司來說更是重創,因為疫情至今令所有演唱會、商演活動都取消。《01眾樂迷》致電一間本地音響及燈光工程製作公司的老闆,他直言:「由年初三開始,所有節目全停,已經差唔多4個月係零收入!」

近4個月所有演唱會取消及延期,製作公司的負責表示這段時間零收入,實在苦不堪言。(資料圖片)

本地演唱會相繼取消或延期,相關工種手停口停。(按圖放大)
+2

該業內人士透露,現時音響及燈光工程行業全面停擺,僅餘還會舉行直播的錄音室才有工作。他苦笑道:「喺呢個商業運作入面,我哋係最早停工嘅一行,相信亦都係最遲可以開返工嘅一行。」他續說:「因為我哋唔同食肆,依家對我哋呢行係0需要,就算到第時個市好返,都唔會話即刻整個千人演唱會啦,所以喺度死頂緊。」

演唱會製作涉及台、燈、聲,加上本身已是低回報行業,很多老闆都在死頂。(資料圖片)

該業內人士可謂良心老闆,疫市之下亦沒有裁員,每月支出約30萬元,說穿了就是每月淨蝕30萬。對於「良心老闆」的稱呼,他謙稱自己算不上,只不過是對前景仍有希望而已:「呢行嘅老闆可以分做兩種人,一種係冇心做就不如趁依家執咗佢就算;另一種就仲有啲實力,睇下仲可以頂到幾耐。同埋問心,你依家為咗減低支出去炒人,到個市變返正常嗰陣,你又可唔可以請得返你想要嘅員工先?」記者問到,變賣部份器材有否幫助周轉?他聞言即說:「賣Gear根本就唔係出路嚟,因為音響係成個系統嚟,唔通你拆開幾隻喇叭咁賣咩?就算你拆開賣,都唔知邊個接貨啦,同埋到之後有返Job嗰啲器材都要用㗎嘛。」

坐滿紅館的景象不知何時再復來。(資料圖片)

政府向零售業、飲食業提供援助,該業內人士對此事更是無奈,他說:「政府庫房咁多冇可能救啲唔救啲㗎嘛,都唔make sense!你淨係救零售,咁批發呢?係成條產業鏈咁去睇㗎嘛。再講,我哋做音響本身就係低回報嘅行業,又唔係炒賣賺錢嗰啲。」他續說:「但係呢個風險係咪全部由我哋投資者承擔呢?當初疫情爆發政府唔封關,返港人士又唔檢驗好,我哋依家焗住等個政策改變。」他又提出建議,音響行業的行家活動與其他行業不同,通常是一個電話去傾生意,沒有太多文件去核實,如果政府推出支援,可根據該音響公司的規模、資產總值或佔用面積等客觀資訊去衡量。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。