「禮賓服務」收天價會費為富豪解難 「沒有不可能的任務」
Edwin在專為上流社會提供「禮賓服務」的國際精英會工作，任職業務發展經理。所謂禮賓服務，說穿了就係只要你每年交40000至10多萬不等的會費，你想做乜都有人幫你願望成真。
「你有冇聽過有個外國人在開羅金字塔搞個盛大的婚禮？佢就係我公司嘅客。」Edwin說。然而，精英會標榜「沒有不可能完成的任務」，責任就擱在員工上。員工收到call，整隊人馬立即化身成湯告魯斯。他說：「香港咩人都有，亦曾有客要求我哋煮一碗難食的粥。」
上至包起個島 下至子女面試 都可以幫到你
「沒有不可能完成的任務」範疇很廣泛。上至銀行想留住大客，千方百計幫他訂一張千金難求的演唱會門票；又或是某會員想認識某位名流紳士，擴大人際網絡，他們亦曾安排會員與教宗會面。他們亦有禮品部，替客人訂購四十部Aston Martin英國豪華跑車。藝術投資，尋找一幅稀有的畢卡索畫像；吃喝玩樂和旅遊等是常見任務，但他們的旅程比去北極更為「刁鑽」：包括包起馬爾代夫其中一個島嶼來慶祝生日；在冰島火山吃一頓燭光晚餐。
「怪獸家長」為子女的未來徬徨時，也會向Edwin求助。「例如學校面試時，家長應否陪同小朋友一齊入去面試？有啲學校認為家長陪同代表親子關係好，有啲學校認為子女唔獨立，應該點做，我哋可以話畀客人知。」細微至生活上，凌晨想吃一碗魚蛋粉也可，分分鐘快過Deliverxx。
全球各地分公司通用的客戶關係管理系統（CRM System)內藏著客人各種喜好要求的資料。打開電腦，客人甚至他另一半的喜怒哀樂，都一目了然。至於事情如何辦妥，Edwin總以「我哋嘅connection」概括一切。
年輕有錢人比上一代更即興
當然，不是所有任務靠connection就可辦妥。例如客人半夜要求吃一個地道的魚蛋粉，靠的是長年累月的經驗。公司員工一概接受餐飲訓練，上至某餐廳大廚新菜試菜、品酒，下至各式小店營業時間，他們都要涉獵。「客人一講，就知道呢個時間邊間魚蛋粉仲開，即刻派人去。」至於那個難吃的粥的故事：「客人女朋友生病，佢想煮粥比女朋友，但唔得閒，於是揾人代佢煮。但佢本人出名煮嘢食唔叻，燶燶哋先係佢的style。」難吃的粥，動用不了大廚，同事唯有自己煲一碗燶掉了的粥，「客人好滿意，我哋救咗佢一命。」
該公司約1500名會員中，四成是30至40歲，其次就是20至30歲，即是一群富二代，「我哋睇到年輕化的趨勢，九成是初創的企業家，如IT行業，年紀輕輕就揾好多錢，呢群人好缺乏時間但好多興趣。」服侍一群富二代，或者年輕的創業家，他們的享樂不再只是嘆吓紅酒咁正統，難度在於即興。「只要他們上Youtube ，就會揾到好多靈感，見到邊個Youtuber去呢度就會即刻叫我哋安排。」
Nothing is impossible
「每一件事都唔容易，唔係一個人做得到，其實我哋好需要teamwork。」Edwin曾從事私人助理，「以前一樣要應付老細天馬行空的想法，但就one man band，冇人支援我，現在就唔同。」但一個打工仔，如何看這些艱巨的任務？「我會話mindset好重要，冇嘢係完成唔到。當你睇到咁多個會員咁多同事做過的嘢，一次又一次的例子，我會問返自己：『係咪真係仲有嘢冇可能呢？』」