【來稿】每上錯一次巴士,都是一次揮霍生命的過程

撰文:
最後更新日期:

我敢講,搭港鐵係完全體現咗「坐立不安」呢四個字——你坐又怕畀人批鬥,企嘅話,繁忙時間又迫到你心口貼住人哋背脊、臀部又緊貼返人哋大脾,完全失去人類尊嚴。仲要一埋站就要非常俐落地移去一個阻唔到人上落車嘅位置。

不幸的話,更要長期忍受車廂內啲人唔用earphones聽歌、以接近吼叫嘅聲浪傾偈、畀推喼嘅乘客撞擊你膝頭等等。有得揀嘅話,平時出入我都寧願搭巴士。

但搭錯巴士,亦都可以造成災難性後果。隨時由天光搭到天黑,都去唔到你嘅目的地,好似入咗結界咁。

有一啲巴士路線,車站多到好似要環繞香港一周咁,搭完一程,人哋都去到轉台灣。不過咁,亦都有人認為,畀10元8塊就可以遊車河,同女朋友拍拖都唔使諗節目,成個下晝就喺架巴士上度過,絕對係窮人恩物。

以下我就嚴選咗幾條經典路線,獻畀一日有72小時可以揮霍嘅你,又或者咁啱好鍾意遊車河嘅你:

53號巴士(元朗 <-> 荃灣)

呢條號稱全港最多站嘅巴士線,全程74個站,喺元朗頭站上車,到荃灣西尾站落車,搭西鐵只不過係需要11分鐘,如果你搭呢架巴士,就要91分鐘先到達目的地。即係你搭西鐵來回咗4次,53號巴士可能仲喺深井徘徊緊。

53號路線榮登九巴中擁有最多分站的路線(網上圖片/巴士大典)

試過有一次做完嘢,喺元朗大馬路搵緊搭咩車返去位於荃灣嘅公司。突然有架53號巴士駛過,車頭寫住去荃灣,我梗係狗衝上車啦。上咗車後開返個九巴app,諗住搵吓邊個站落車最就腳,當我發現個車站表碌極都未碌到底嗰陣,我個心即刻寒咗寒。然後,我選擇喺張凳都未坐暖嘅時候,就狗衝返落車。

不過對於鍾意睇風景嘅小情侶,或者獨獨的巴士迷都好,搭呢條線可以途經元朗、天水圍、屯門、入埋黃金海岸睇海、再兜埋深井、出返荃灣,用嚟睇風景,或者認識成個新界西,都只係$10.8,真係抵到爛。

106號巴士(黃大仙 <-> 柴灣)

呢條路線都可以話係另一個經典,九龍港島畀你玩晒,都只係$9.8。不過我就試過一個好詭異嘅經歷,同地鐵太子站嘅永遠輪迴傳說有過之而無不及。

唔使十蚊玩晒九龍港島,可以去邊搵?(網上圖片/巴士大典)

話說好幾年前我喺柴灣返工,每日幾乎都要加班係常識,朝9晚10係常態,返到九龍城嘅屋企都11點左右。嗰陣我一般放工都係搭118,去到旺角再轉小巴返屋企嘅。我記得有一日我難得早放,8點就離開咗公司,一心諗住返到去要煮餐好嘅獎勵下自己,再追加薯片雪糕relax下。行到去118個站,等等下見到有架106開埋嚟,車頭寫住去黃大仙、經九龍城。咦,我以前都無留意公司有一程車直返屋企咁筍嘅,於是我上咗車。

經過一日嘅工作其實都好攰,所以一坐低我就瞓到不省人事,但恐怖嘅事就隨即發生。由柴灣上車嘅我,第一次醒嗰陣,我見到巴士喺北角兜緊。

第二次醒嗰陣,仲未過海——去到銅鑼灣。

第三次醒,我已經再瞓唔返,因為我覺得自己好似瞓咗一世紀咁耐。我諗緊係咪架車已經到咗終站兜返轉頭,但sorry,佢只係啱啱過咗海,去到土瓜灣一帶。由於我已經無晒睡意,我決定睇實架車究竟仲要兜幾耐先入九龍城。結果架車喺土瓜灣嘅大街小巷之間出出入入、兜嚟兜去,搞咗成半粒鐘,佢終於出發去九龍城。去到富豪東方酒店個站,基本上我係衝落車。返到屋企,望下個鐘,同平時一樣,都已經係10點幾11點,我覺得好似畀人欺騙感情,心好累。

64K巴士(大埔 <-> 元朗)

雖然64K嘅站無咁多,車程又唔夠106咁長,但呢條路線嘅經典之處,係在於司機一定要有超卓嘅駕駛技術,先至駕馭到林村、八鄉、錦田一帶嘅山路。尤其係林錦公路一帶又窄又斜,車長入職要求真係要加多項識得扭髮夾彎先得。

如果要頭搖又尾擺,一於搵64k。(資料圖片/鍾偉德攝)

聞說搭呢條線嘅乘客,好多都有支藥油跟身,你知啦,尤其係老人家,chok多兩chok真係會早餐都嘔返出嚟,真係要搽返兩滴油先可以保平安。至於後生嘅,其實仲着數啦,搭巴士嘅價錢,已經畀到玩過山車嘅享受你,離心力呢家嘢,去新界走一轉就可以體驗到,歡迎各位區內外人士挑戰。

呢幾條經典路線,相信大家總有親身體驗過一兩條。其實啲路線存在咗咁耐,究竟係特登編排到咁,定係一早就應該重整?另外,究竟駕駛呢啲攞你命路線嘅車長,工作時到底係享受?定係嘔吐袋、預防痔瘡水泡隨時候命?人有三急時,又可唔可以將架車泊埋一邊,衝咗廁先?

玩夠好搭車返屋企喇。(資料圖片/陳焯煇)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。