【大埔人】20年東江雞酒家結業 老街坊不捨:冇咗個地標

撰文:
最後更新日期:

大埔墟的大明里廣場,商店、食肆林立,是區內居民主要的購物消閒地點。這裏有家屹立逾20年的客家菜——大埔東江雞酒家,主打售賣招牌秘製鹽焗雞,午市亦有價錢相宜的雙餸飯,素來受區內街坊歡迎。

這家老店外擺放著告示,將於2月28日結業,之後仍可光顧分別位於大埔廣場和大圍美林商場,才可吃到招牌鹽焗雞,然而不少街坊鍾情這家總店。老店感謝街坊一直的支持,告示還附上楊慎《臨江仙》,以詩詞寄意。「古今多少事,都付笑談中。」這家食店對老街坊來說,是飯堂,也是他們的集體回憶。

攝影:顏寧

大埔東江雞酒家,主打售賣招牌秘製鹽焗雞,午市亦有價錢相宜的雙餸飯,向來受區內街坊歡迎。

+3
+3
+3

靚太:碟頭飯大碟又抵食

街坊「靚太」和陳太這天在附近上完培訓班,就來了大埔東江雞酒家吃飯,點了49元的招牌鹽焗雞飯。

靚太:我哋成日嚟食,貪佢飲茶唔使茶錢,仲包例湯,碟頭飯又大碟。都幾大碟,三個人叫兩碟就最好。都幫襯咗10幾年。

記者:𠵱度啲嘢食有咩特別?

靚太:啲雞種係靚嘅,因為啲雞胸都唔嚡。最唔捨得啲碟頭咁大,價錢又中肯。

街坊:最唔捨得啲碟頭咁大,價錢又中肯。

張小姐:地標消失

這天,張小姐來東江雞買外賣芝麻糊。

張小姐:𠵱度已經好多年,好出名。好多時過時過節就排長龍,又無得訂位。要結業都會覺得可惜,始終𠵱度係𠵱條街嘅地標。係邊啊?就會話喺東江雞隔籬囉!就算有大圍、大埔廣場(分店)都係爭啲,因為啲人落車通常就會嚟𠵱度。

司徒小姐:面目全非

司徒小姐:都有少少唔捨得。因為香港都要變遷,好多嘢都好難留住,會婉惜一間有一間酒樓就無咗。同埋啲嘢食,唔算特別平,但係抵食,因為真係好食,價錢係公道。新食店都好難做到啲咁嘅價錢。舊墟得返10間8間老店,其他都轉晒手、執晒,都會有啲面目全非。無辦法,講好聽啲咪社會進步,新裝修就會有啲新嘢出現。

這家食店對老街坊來說,是飯堂,也是他們的集體回憶。

客家人:有時會特登嚟買外賣

居於粉嶺的朱先生是客家人,曾有段時間在大埔工作,偶爾會特地來大埔東江雞酒家吃飯,或買外賣。

朱先生:因為住粉嶺冇𠵱啲東江雞、客家菜食,想搵返𠵱啲嘢食。會食梅菜扣肉,同埋鹹雞(即鹽焗雞)。啲嘢食平民化,價錢相宜,有時都會特登買外賣返粉嶺食。

有街坊婉惜東江雞結業,等於區內的地標消失。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。