颱風蘇拉｜吐露港水位急升橫風橫雨 睇浪市民大叫：雨打身上會痛
撰文：何瑞芬
出版：更新：
天文台預計超強颱風蘇拉為香港帶來的風暴潮，令吐露港最高水位可能達歷史紀錄。不少市民入夜到吐露港「追風」，有人只穿拖鞋、笠雨衣、撐雨傘感受強風，形容風力雖然不及當年「山竹」，但當強風豪雨拍打時，大呼「好FREE呀，好自由呀！」
▼9月1日 市民白石角海旁感受強勁風雨▼
+5
家住附近的謝先生特意到吐露港單車徑涼亭「追風」，他形容「蘇拉」風力不及當年「山竹」，「我覺得山竹勁啲，當年好誇張，啲樹冧晒，內街都好亂。」謝先生只穿雨衣及帶備一把雨傘，「都無咩安全措施喇，着件雨褸等自己無咁濕，就算有遮都無用，最多用嚟支撐下自己行返去。」
他相信「蘇拉」會愈夜愈強勁，深夜會再去吹風，「可能到時企都企唔穩」，「好FREE呀，好自由呀！」
同樣家住附近的郭先生就指，今次第一次「追風」，「個風都幾勁，海浪好大，開遮都無用，盞吹爛」，他又稱雨勢十分大，雨水打落身上「有啲痛」，對於天文台指吐露港水位有機會上升達歷史紀錄，他形容「都有啲驚」。
▼9月1日 沙田城門河水位上升淹至部份單車徑▼
+7
