【奪命GOGOVAN】車隊老闆爆業界辛酸 低價吸的士客司機動輒中招

撰文:
最後更新日期:

前日(4日)晚上,黃大仙龍翔道發生奪命交通意外,一輛印有GOGOVAN字眼的客貨車自炒撞壆,車內一名32歲女乘客飛出車外慘死。事件再次引起市民討論有關第三保者責任保險、貨物定義及提供貨運服務平台公司的壟斷問題。有曾加盟GOGOVAN、現為車隊老闆的司機大爆業界辛酸,指GOGOVAN以濫收司機及低價召車壟斷市場,除衍生司機服務質素參差問題,亦吸引大量「的士客」召車,司機接單時惶恐不安,擔心接中「放蛇單」;該司機亦大爆GOGOVAN隨意及無理封鎖司機帳號,令司機生計雪上加霜。

由於貨Van司機多屬自僱人士,即使加盟貨運平台,工作時亦難有保障。 (梁銘康攝)

擁有自己車隊的鄭怡銳,早年曾是GOGOVAN其中一名登記司機。(林振華攝)

擁有自己車隊的鄭怡銳,早年曾是GOGOVAN其中一名登記司機,他認為GOGOVAN以低價召車方式及龐大車隊招客,變相降低了入行門檻,「有部車就可以入行,GOGOVAN唔會評估司機經驗同質素,業界多咗啲P牌,或者兼職司機或公司入行搵外快」,他指這些司機並不熟悉行業運作,亦不熟路,質素參差。鄭指,以目前GOGOVAN約有數萬個登記戶口估計,其業務已佔整個貨運服務行業七至八成,屬壟斷局面,「最大兩間係GOGOVAN同LALAMOVE,十有九個司機都有登記過,有戶口喺度,不過有冇經常用就唔清楚」。

鄭怡銳表示,客人為了成功截車,「冇貨都話有貨」,司機難以提防。 (資料圖片)

憂遭警放蛇 主動提出不收費

低價亦衍生「的士客」問題,由於GOGOVAN價錢比的士便宜,吸引不少「的士客」,變相令司機容易掉進載客取酬的陷阱,觸犯法例,「乜嘢係貨,好睇個客點講,如果個客話冇貨,或者得一個手袋一個行李,我哋一般都唔接,避得就避,因為好驚係放蛇」。可是,客人為了成功截車,變得更「聰明」,「冇貨都話有貨,司機去到見到佢得一個袋,咁究竟車唔車佢好呢?呢個時候唔車又好嘥油錢」,而平台亦不會干涉貨物種類及體積。鄭怡銳指放蛇行動,令司機每日接單均提心吊膽,他曾聽說有司機收到自稱沒有貨的單,女乘客上車後,司機已全程惶恐緊張,當到達目的地時,女乘客一度在手袋內搜尋東西,司機害怕她將會拿出警察委任證,故立即向她說:「小姐,呢程唔收你錢,你可以走喇」,女乘客笑言只是在手袋內找電話,最終付上車資。

司機曾遇「放蛇單」 中途站卸貨後警表明身分

鄭又指,曾聽說有同行接到要求設中途站的單,由起點至中途站期間,客人的確帶有貨物,惟客人在中途站「卸貨」,結果中途站至終點沒有載貨,原來客人是一名「放蛇」警員,司機「斷正」被捕,「你估唔到佢用呢一招嚟捉無貨載客取酬」。

本月4日,龍翔道發生一宗GOGOVAN奪命意外,客貨車自炒撞壆後,32歲女乘客飛彈出車慘死。

不滿平台無理封鎖司機帳號

鄭先生不滿GOGOVAN隨意及無理封鎖司機帳號,「有個師兄分享,話有個客打嚟話無貨,一路冇人接,支order係咁畀人掟出嚟,師兄諗住做好心,打上台講,話呢個客堅持話冇貨,提醒同行可能係放蛇單,但俾GOGOVAN永久封鎖佢帳號,你冇得駁佢」。他表示,若司機被停帳號,需繳付1,000元開通,或以購買帳號、換車牌及電話號碼,甚至以另一個登記名稱等方式繼續接客。

GOGOVAN以低價及容易call車作招徠,最終吸引不少「的士客」光顧。

GOGOVAN壟斷業界 「司機咪變咗受佢哋氣囉」

提到保險問題,鄭怡銳更是無奈,「相信冇一個台會幫司機買保險,都係司機上身,保險咁貴點會幫我哋買丫,最多都係出下口術,話出咗事有咩意外,睇下公司點幫你呢啲」。由於司機多屬自僱人士,工作時難有保障,他不滿GOGOVAN對司機態度飄忽,「有威水史咪話我旗下啲司機點點點,到出意外就唔關佢哋事」,鄭強調他們並非替GOGOVAN打工,「佢只係一個平台,我哋自己出部車做嘢,係老細嚟」。對於GOGOVAN的霸權,業界早有怨氣,「有加盟嘅又驚俾佢停機,冇加盟嘅就驚俾佢影響生意」,鄭指,現時很多車隊均以GOGOVAN的價錢作標準,令新興車隊難以提高價錢以改善服務質素,「GOGOVAN成立初期,聲稱幫啲司機,令佢哋唔使再受傳統台嘅氣,但依家佢成為壟斷,司機咪變咗受佢嘅氣囉,同當初嘅理念唔同晒,佢加價其他台先可以加,大家鬥平係冇意思」,最終影響司機駕駛態度,令行業質素下滑。

GOGOVAN壟斷貨運界,造成惡性競爭,最終影響司機生計。(梁銘康攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。