MIRROR演唱會｜游大東以為意外屬特技場面 「我都一時反應唔切」
撰文：鄧海興 勞顯亮
出版：更新：
「MIRROR.WE.ARE LIVE CONCERT 2022」紅館演唱會第四場（7月28日）恐怖意外，除兩名舞蹈員被巨型屏幕壓中重創，亦有鏡絲被駭人場面嚇至送院。席間其中一名觀眾、資深傳媒人游大東更一度以為是特技場面，「我都一時反應唔切！」事後他又驚又暈，並認為必須調查事件。
游大東離開紅館時接受《香港01》記者訪問時，指意外一刻，以為是特技場面，「抬頭一望上去，就突然間見到成塊嘢（巨型屏幕）跌落嚟，我都一時反應唔切！老實講我以為係特技！花姐即刻拎咪暫停演唱會，話會處理啲飛嘅問題同叫大家離開」。
他指，事發後有人受驚、有人落淚、有人不滿，「我出返嚟我都覺得有啲受驚！點解會咁呢，我睇咗咁多年紅館演唱會，冇諗過會發生啲咁嘅事，我都覺得自己暈暈哋、驚驚哋！」
他認為必須調查事件，但需要向相關部門了解，「要問返主辦單位究竟邊間製作公司？有冇做足安全措施？事前有冇檢查好晒啲嘢係安全？仲有喺紅館演出使唔使permit（許可證）呢？要符合咩條件呢？」
+1
+2
