【職場】撞正「old seafood」? 只需一句說話即無懼對方卸膊

撰文:仲欐因
出版:更新:

「幫我跟跟佢」、「Draft封email黎」、「Check下仲有幾多stock」。
以為老闆叫你?拎個頭過去,先知原來是你的同grade「好同事」在點你做嘢。每間公司總有職位同級卻年資比你長的「old seafood」(資深同事),恃着比你做得耐而「A字膊」將工作卸得就卸。所謂「精人出口,笨人出手」,面對這種處境,跟「son姐」張慧敏學習有技巧地「出口術」,就可以反客為主打返場漂亮「保衞戰」。

撞正「old seafood」多嘢做到無得收工?睇下專家點拆解啦!(視覺中國)

初來報到,遇上同grade但「A字膊」的「old seafood」,明明大家平起平坐,偏偏因為遲來報到而被人像「妹仔」咁洗,咪話唔谷氣。面對「old seafood」卸膊點你做事,「son姐」指,最笨是期望老闆出手「撥亂反正」。

「如果你想叫老闆講清楚工作應該由邊個負責,他只會覺得你是『麻煩友』,因為老闆的思維是:分工應該由你們細的自己『拆掂佢』,不應該來煩我,你們『拆唔掂』來煩我,有問題的一定是你。」

不想做炮灰,但更不想「硬食」「卸膊操」,「son姐」教路,新人可以咁答「拆招」:

「好呀!我哋一齊分工!」

「首先,『好呀』顯示出你態度正面,願意合作,沒有say no。要記住職場環境是『你在做,所有人在看』,如果你態度欠佳『串串貢』,就算對方不得人心,他始終是舊人,別人覺得他不是好東西,但你亦『唔抵幫』,這樣就對你無幫助;『一齊分工』是提醒對方『喂,我哋同grade嫁』,亦可以向別人顯示自己與對方有商有量,關係良好。」

將自己立於不敗之地後,新人就可以揾位反擊。「對方既然有工作卸畀你,你就可以找機會入老闆房,或趁開會匯報工作時『跣』少少說話出來,例如『呢樣野Mandy交比我跟,呢度我有少少地方想跟你clarify』/『個project我同Mandy一齊做,呢一part主要我跟多啲,想睇下老闆你有咩意見,有咩地方可以改進』,利用你是新人大條道理問嘢的優勢,『跣』畀老闆聽。」「出口術」的技巧是切忌煞有介事地投訴別人,慢慢滲出來才可自保之餘又達到目的,亦千萬別真的笨拙地問老闆點做嘢,問人攞意見前記得自己要先做好功課,否則只會踩中另一個地雷。

所謂猛虎不及地頭蟲,新人初來報到,無人無物與舊人對着幹,吃虧的往往是自己。「舊人要跣你話都無咁易,講少啲令你做漏嘢已經死得,事後你話『點解你唔講呀』,對方話『點解你唔問』,已經無得玩。下下同人對着幹,人哋只會齊齊對着你幹,係一間公司入面要人鐘意唔係咁易,但起碼唔好令人憎你先。」