【婚姻註冊】證婚律師多數係「阿叔」? 從年資、收入話你知原因

撰文:
最後更新日期:

眾所周知,香港律師分兩種:事務律師(Solicitors)同大律師(Barristers),其中大部分為事務律師。大眾的一個常見誤解,就係大律師較事務律師高級,而且由事務律師「升上去」。其實,事實上做事務律師抑或做大律師,只係法律系學生在PCLL學年時的一個選擇而已,而且與分數高低完全無關。

撰文:Curry

即使在執業後,事務律師與大律師的收入,根據公開資料,亦無明顯分野,甚至好多時候,同一年資的話,反而事務律師收入更高,皆因大律師的工作相對局限於訴訟打官司,反而事務律師可以從事各樣法律業務,也包括打官司,而且還有企業融資,例如上市及合併等業務,律師費隨時比打官司更和味。

做事務律師,除了經常被(誤)問:「幾時升做大律師啊?」而不勝煩厭以外,仲有一個令人解釋到口水乾的善意問題:

下年結婚搵你幫手證婚!計我平啲啊!

朋友準備結婚,想到找你做證婚律師,無疑是對你個人能力的肯定,以及對友情(價)的堅持。

始終,都係一種善意請求,也是希望「有生意益你」。然而,年輕的律師朋友,無論做邊一個範疇的法律業務,都連忙耍手擰頭婉拒。

大家有冇留意到,出席婚宴酒席,律師證婚人往往都係上年紀的「阿叔」級人士,雖未至於垂垂老矣,但大部分白髮蒼蒼。相反,我們絕少見到年輕靚仔靚女的律師,究竟點解呢?唔通因為大家比較喜歡請老律師,代表一對新人的婚姻,會好似呢位老律師一樣經得起時間考驗?

請老律師證婚,是希望這段婚姻可以和其年紀一樣經得起時間考驗?(視覺中國)

其實有兩大原因。首先,所謂「證婚律師」,必須係婚姻註冊處的婚姻登記官,根據《婚姻條例》委任七年以上資歷的執業律師。 因此,好多適婚年齡人士,大概二十九至三十一歲左右,他們的朋友做律師的,其實都係同齡,大部分不過只有三四年或以下的執業年資,未能符合擔任婚姻監禮人資格。

還有一個原因,就係據說年輕律師比較熱衷於一些更「辛苦」的法律工作,例如上述的打官司及企業融資之類,賺著動輒數以十萬甚至百萬計的律師費,正所謂「唔辛苦邊得世間財」,辛苦背後收入亦較高。而做「證婚律師」,往往就幾千蚊律師費,仲要一來一回喜宴場地,事前還要與一對新人開會,又要準備文件,其實相對來講唔算特別好賺。因此,往往係較嚮往悠閒工作的老律師比較熱衷於證婚業務。

或者仲有一個原因,就係好似以上所講,老律師自己已經經得起時間考驗,除了待人處世甚至臨場應變經驗更深,亦係一種好意頭,會較受新人受落。

所以,大家以後學多樣嘢,就了解到你的律師朋友點解未能幫你證婚啦,除非你願意等多幾年啦!

題外話,大家見到律師證婚,經常用磁性「Chok聲」宣讀監誓辭,其實有時Over咗又幾滑稽,但太過平鋪直敘咁讀,又欠缺「簡單而隆重」的莊嚴感。所以其實即使看似簡單的證婚業務,一樣需要一點點天份同訓練先做得好。故此,據說有專做證婚的名牌律師收費特別貴,但依然Book滿晒,就係市場對呢種「專業」的一種肯定。

所以呢,一分錢一分貨,係朋友就更加唔好開口埋口「友情價」啦,呵呵!

SJ結語

感謝SJ讀者的高汁分享~~~

(原文轉載自StealJobs.com。StealJobs全面透露各行各業人工,工時,晉升前景,以及入行攻略,歡迎匿名提供收入資料。)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。