做廣告竟要執牛屎、熨M巾? 從3個故事一窺廣告業生態|行業百態

撰文:
最後更新日期:

不少年輕人對廣告行業有着一些幻想,認為投身其中便可把天馬行空的想法帶到現實。有這種想法不一定是壞事,但同時亦要明白,只有把各式各樣的現實問題處理妥當,才可以造到「夢想成真」。

且看《拍廣告其實唔難》一書作者斗零的分享,以更了解從事廣告行業的辛酸與挑戰!

以下內容節錄自《拍廣告其實唔難》:

有屎邊個執?

每一份工都有佢嘅辛酸,而廣告製作呢行嘅「血與汗」就更加唔講得笑,筆者咁多年嘅特殊經歷就由呢篇開始,慢慢同大家分享。

入行初期,經常會因周圍去唔同地方拍嘢而高興,不過嗰次就高興唔嚟。當時去到飛鵝山,天朗氣清,風景優美,眾人拍得興起之際,突然有隻牛喺大家面前行過,然後施施然咁喺路中心放低「幾両金」。由於嚿「金」好大篤,所以大家都覺得好好笑。不過大家你眼望我眼笑完一輪之後,就好自然咁一齊望住我。

《拍廣告其實唔難》

相關文章:做廣告難有「安樂茶飯」? 香港只得飯冰冰外國卻有…|行業百態

當然啦,呢啲咁粗重嘅嘢,梗係新嚟新豬肉去負責啦。咁多位讀者,你哋人生執過最大嘅屎係咩屎呢?當年眼前呢一篤好似砧板咁大嘅牛屎,我係點樣執嘅呢?

由於執屎嚟講我都係新手,而且出發前根本都冇預備要執屎,所以連架生都冇。前輩就教我喺現場搵一啲小工具幫手,好彩喺現場搵到一塊大木板,然後我就逐下逐下咁,將堆好fresh嘅牛屎,由路中心向住山邊挑走喇。

多年過去,呢個咁有味道嘅畫面依然歷歷在目—應該係揮之不去先啱。

男人心.熨M巾

《拍廣告其實唔難》

以前每次去同廣告學生sharing 都會講呢個故事:

廣告製作同電影製作嘅最大分別喺邊度?就係產品鏡頭(Product Shot)嘅處理。依家電腦特效普遍,而且後期彈性大好多,好多時產品都會用CG呈現。但喺以前CG 冇咁流行嘅年代,每次拍Product Shot 都好考製作組功夫。

正常情況下,邊種產品係男性製作同事最少接觸呢?就係女性生理用品喇,例如衛生巾。M 巾嚟講,好多時廣告都係想帶出佢貼服嘅一面,咁點樣先可以拍得佢貼貼服服呢?

答案就係熨喇!因為喺包裝袋拆出嚟嘅M 巾,大部分都鬈埋咗同埋好皺,所以就需要將佢熨番平,令佢冇晒摺痕。圖中嗰位男同事,啱啱入行無耐,喺一日內熨左成百條M巾,嗰日應該係佢人生入面接觸最多M巾嘅一日…… 。依家呢啲經歷應該買少見少喇。

喺街飄花瓣

《拍廣告其實唔難》

正所謂天有不測之風雲,導演要求就煩死人!除咗要好天落雨,導演有時仲會想個天落其他嘢,例如花瓣。

喺依家電腦特技咁普遍嘅年代,呢啲鏡頭只需要後製同事坐喺電腦前做幾日幾夜就ok;以前呢?就需要一班同事整花瓣道具,例如用縐紙剪好一堆,然後拍嗰時分幾邊喺唔同角度掉出嚟,咁先可以好均勻咁遍佈畫面每一處。跟住先係重點,就係拍完每個take,第一時間衝出嚟掃走晒佢。如果拍攝場景乾淨都仲好啲,啲花瓣道具可以回收重用;相反,如果地下唔乾淨,或者好大塵等等,就要預備好多花瓣先得。

我就曾經試過喺草地拋縐紙花瓣,拍完之後攝晒喺啲草堆入面,幾乎要逐塊用手執咁滯。最慘仲要拍完嘅時候差唔多天黑,有燈光手足好心幫我打盞燈照明,點知吸引大堆飛蟲過嚟,我要一邊撥走佢哋一邊執……Btw,依家其實就算唔做CG,都可以上網買花瓣道具,唔使再叫手足困喺公司係咁剪。

▼▼▼【相關文章.按圖放大率先預覽】▼▼▼

做傳媒先要接受人工低? 選擇5大行業前該先考慮…

+9
+9
+9

書名:《拍廣告其實唔難》

作者:斗零,英文名Penny

2000年畢業於香港浸會大學傳理學院。畢業後加入offlohi製作公司前身Such Partners,先由製作助理開始,慢慢在不同崗位學習,後來成為廣告導演。先後執導八達通、利賓納、百老匯電器、Canon、Wechat等不同品牌超過200個廣告。其中與韓國演員李光洙合作的能得利廣告更在一星期達到100萬YouTube點擊;而Priligy JJ-man廣告亦曾得過國際獎項。除拍攝廣告外,2016年更成立「拍廣告其實唔難」Facebook 專頁,與喜愛廣告製作的同路人一同分享專業資訊。

【本文獲「非凡出版」授權轉載。】

立即下載《香港01》,緊貼公務員職位空缺、勞工處筍工推介,了解CV、面試致勝技巧!下載網址:https://hk01.app.link/bkbJyY5t4O



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。