【母親節獻禮】媽媽扮靚 細路放電 新手媽30萬元創托兒薰蒸館

撰文:
最後更新日期:

為人母親總將子女放在第一位,甚至連創業都以照顧到小朋友為優先考慮,Hani就是一位這樣的媽媽。(龔嘉盛攝)

靚雞隔水蒸,肉餅隔水蒸,原來人都可以隔水蒸。

返工放工湊仔煮飯,為人阿媽有時確是忙到唔得閒「執靚」自己,若要再做老闆,就真的要生多對手才行。24歲新手媽媽兼新手老闆陳鎧沂(Hani),在打工之餘又想照顧仔仔,眼見魚與熊掌不可兼得,於是乾脆自己開舖做老闆,在荃灣開設「美人蒸」古法薰蒸養生館,實行帶住仔仔去上班。「小朋友長大的moment過了就沒有,我不想只掛着工作而錯過了。」

創業唔一定要學寫app,按此發掘更多非科技創業案例!

Hani以前做sales,為方便照顧仔仔而轉做接待員,先後請過2次工人,但最後還是決定自己湊最為穩妥。「工人姐姐只會照顧佢,但待人接物、對錯是非等總要人教,這一點我睇得好緊。」思考過後,Hani於去年辭職專心照顧仔仔,然而堅信女性要經濟獨立的她,又不能接受自己只做全職主婦。在想增加收入和多點時間照顧仔仔的兩難中,她發現許多年輕媽媽因為有小朋友而失去了私人時間和空間,難以相約三五知己「姐妹淘」或出街扮靚,究其原因就是「擺唔低個細路」。

不少媽媽自有小朋友後便因困身而連去做facial都難,因此有托兒服務的生意特別受她們歡迎。(龔嘉盛攝)

「想做facial唔得,想唱K更加無可能;有細路後,約朋友的活動只有一個,就是食飯,仲要先放低畀婆婆,再去食飯地點,食完返婆婆屋企接返細路再返屋企,一晚走幾個地方。」發現帶着小孩的媽媽難以relax,巿場上亦少有可以讓媽媽安心放低孩子的扮靚地方,Hani便開設「美人蒸」,重點是設有托兒服務,瞄準這個巿場空隙。

「美人蒸」和巿面上的汗蒸、薰蒸類似,都是以中藥包蒸身蒸腳,主打排毒美顏瘦身保健,Hani與拍檔夾份投資約30萬元,以月租約3萬元租用商廈舖位,開展新手老闆生涯。「當初其實有睇過唐樓舖位,租金更平,但因為自己係媽媽,知道推住BB車或帶小朋友前來不可以無升降機,地點出入不方便,客人便不會前來;我亦好堅持一定要有托兒房,就算拍檔質疑這樣浪費了賺錢空間,我都想打造一個針對媽媽需要,可以讓她們安心relax的地方。」

有小朋友也不等於可以唔執自己,Hani希望打造一個媽媽和小朋友都可以享受的共贏環境。(龔嘉盛攝)

有閉路電視,媽媽放鬆得來亦放心。(龔嘉盛攝)

照顧着2歲且黐身的仔仔,Hani最清楚媽媽們有什麼擔憂,因此托兒房內除有職員陪玩外,亦安裝了閉路電視,讓媽媽可以一邊歎,一邊透過iPad睇實小朋友。「初初跟我媽媽說要創業,她都有質疑,因為上一輩的人覺得做人阿媽無可能放低細路自己去玩,生下小朋友就要專心湊仔,但我們這一代不同,都會想有自己的生活,想約朋友出來傾偈、減壓,我們這一代會較接受到將小朋友放低畀人。」

從前與媽媽關係一般,但創業一腳踢伴隨而來的壓力,反而令Hani多了與母親溝通。「以前好多嘢收埋收埋,但現在自己做生意反而多了問媽媽意見,不開心時也會在她面前發洩。媽媽叫我笑多點、開心點,其實我好想講,正正是因為屋企人,所以才不想這麼假,先會讓她看到不開心、流淚的一面。」

開業半年,儘管Hani積極透過Facebook和Blogger宣傳,但生意仍在守業階段。自23歲那年開始,既要照顧家庭又要開創事業,Hani直言覺得創業難,但說「做人就係乜都要試」。雖然開舖時設計、入貨、裝修一腳踢,有時處理文件時又被仔仔「整忟」,但Hani都是一句:「見到佢笑,我就幾辛苦幾攰都唔記得晒。」

帶埋仔仔上班,Hani覺得這既增加了親子時光,亦令仔仔變得唔怕陌生人,大家win-win!(龔嘉盛攝)

任何患有糖尿病、高血壓、心臟病、心血管阻塞疾病、皮膚病、中藥敏感、濕疹或身體有傷口人士均不適合進行薰蒸。懷孕期、哺乳期、生理週期女性亦不建議進行薰蒸。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。