【父親節】離婚拖小朋友落水 律師爸爸:造成不能修補嘅傷害!

撰文:
最後更新日期:

男女雙方情投意合,成婚組織家庭,攜手步入人生另一階段,又是否必然白頭偕老?家事法律師高崑峰(Billy)的工作主責為處理各項離婚案件、家庭糾紛。眼見不少夫婦在婚姻關係走到盡頭之際,往往忽略了孩子的感受,作為新手爸爸,他感受尤深。「夫妻間出現婚姻危機,最重要係多啲溝通,無論你對一個人係幾咁憎恨,都唔好將小朋友拉落水,可以影響佢哋成世!」

攝影:龔嘉盛(部分相片由受訪者提供)

衛達仕律師事務所合夥人高崑峰(Billy)專責處理離婚案件、家庭糾紛。

疫情下離婚諮詢增多

作為家事法律師,Billy專責處理離婚個案、辦理婚前協議,以及擔當婚姻調解,協助處理家庭糾紛。「多數客人前來諮詢,唔係個個都話要立即離婚。可能屋企有啲唔開心,想知點樣保障自己。」

他解釋,在香港辦理離婚,要處理兩件事,包括小朋友的撫養安排及資產分配。「除非一致同意安排,否則也要搬上法庭審判。」但他補充,因為審訊時間長、訴訟費用昂貴,「十單有九單」案件也會在審訊前達成協議。「離婚案件長則可以審六、七年,仔女都長大晒,即使已協商好財產及子女安排,仍需等待約九個月才完成離婚程序。」

疫情期間離婚諮詢增多

婚姻出現問題,背後原因各色其色。「男人爛賭;對方長期喺外地、只顧工作唔理我;工作時間長,完全照顧唔到小朋友;出面有男、女朋友,呢啲都係原因。」而近來的新冠肺炎疫情,更令離婚諮詢增多。「屋企空間不足,困住太耐,加埋小朋友唔使返學,一定有意見分歧,就會多咗爭拗。」

Billy於去年成為爸爸後,工作更為他帶來不一樣的感受。

不可修復的傷害

處理為數不少的離婚個案,Billy坦言,不少家長在處理婚姻問題時,忽略孩子的感受。「好多時我哋會見到其中一方討厭對方,會專登做好多動作,令小朋友同對方嘅距離愈來愈遠。例如講啲好難聽嘅說話,『係呢個人唔好,佢做錯嘢令我哋家庭破裂』,又或者好多時其中一方會投訴,對方唔俾我見小朋友,而對方就一定有理由。『小朋友見你之前喊得好犀利喎』、『見完你返嚟之後瞓唔著喎』。其實好睇家長點樣灌輸離婚概念俾小朋友,要好小心去處理。」

當婚姻出現危機,Billy認為,應把對小朋友的影響減至最低。「從心理醫生撰寫嘅報告,就知道家長呢啲行為對小朋友嘅影響係好長遠。鬧緊交嘅時候,最好先離開冷靜一下,聽日返嚟再傾,去作下一個決定。特別係有小朋友在場,造成嘅傷害係不能修補。無論你對一個人係幾咁憎恨,都唔好將小朋友拉落水,唔係離完婚就冇事,而係影響成世!」

+3
+2

新手爸爸的啟示

Billy於去年成為爸爸後,工作更為他帶來不一樣的感受。「香港法庭係好傳統,會覺得由媽媽去照顧小朋友係比較適當,所以媽媽喺審訊中係有優勢。有啲爸爸會花好多時間、金錢,搵最好嘅大狀,向法庭爭取一個星期多一日嘅子女探視權。未做爸爸之前覺得,『其實係咪可以慳返啲錢呢?』做咗爸爸之後,出差冇見小朋友幾日,終於明白點解嗰一日係咁重要!」

他更體會到,幸福的家庭、健康的婚姻也不是必然,需要雙方共同努力維繫。「亦都愈來愈明白,家長點樣合作去照顧、教育小朋友係非常之重要。大家要有個共同目標,多啲溝通,一同努力。」

夫妻間坦誠相對

他又分享,自孩子出生後,無可避免的與太太多了意見分歧,但他們之間亦有一套相處之道。「我和太太會有不同意見,兒子讀咩學校,甚至周末去邊個沙灘!我哋咩都拎出嚟講,亦唔會拖太耐。我扯咗火,會道歉,『我唔應該咁大聲講嘢』,太太也會發長篇訊息,解釋『當日我咁樣做,係因為咩原因,希望你明白』,我會嘗試站企喺佢角度,達成共識。」

為了見證孩子的成長過程,Billy時刻提醒自己要多花時間在孩子身上,同時避免把日間工作引起的負面情緒帶回家,影響親子關係。今年父親節,他笑言正期待家人為他預備的驚喜。而對於孩子,則不會過分期望。「生命太多不如意的事,最緊要開心。我長大都係咁,屋企人唔會迫我、要求我做啲咩嘢。做咩都唔重要,由佢自由發揮,灌輸正確知識俾佢,等佢做一個好人。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。