四人合體洩露再開拍《特警新人類》玄機 李璨琛:劇本已經籌備緊

撰文:
最後更新日期:

李璨琛、馮德倫、吳彥祖和謝霆鋒昨晚(14日)在《第三十八屆香港電影金像獎頒獎典禮》驚喜登場,事隔20年《特警新人類》再度合體成為熱話。李璨琛在慶功宴接受《香港01》訪問時表示:「其實呢個組合呢,大大話話都已經20年無試過合體,今次係20年後真真正正合體,其實我哋最主要係希望嚟緊真係可以開拍返《特警新人類3》,所以我哋呢個組合出來係一個preview同前奏!(劇本已經傾緊?)傾緊㗎喇,依家已經籌備緊!」

《特警新人類》四人組吳彥祖、馮德倫、謝霆鋒和李璨琛擔任金像獎頒獎嘉賓。(葉志明攝)

【金像獎2019】《特警新人類》20年後重聚 謝霆鋒吳彥祖扮甩底

璨琛笑言,四人合體拍《特警新人類》續集其實已經構思了很久,只是各自各實在太忙:「Daniel(吳彥祖)同馮德倫又喺美國有自己嘢,謝霆鋒就唔使講啦係咁炒餸,我自己又做緊嘢,所以講就講咗好耐,真真正正可以埋牙嘅今日係好好嘅開始!」

李璨琛透露《特警新人類3》已經現在進行中!(陳順禎攝)

雖然前作《特警新人類2》已經2000年作品,不過李璨琛坦言20年後仍有心去拍續集全因為心裏的一團火:「《特警新人類》對很多香港人來說是一個回憶,雖然過咗20年大家都大咗同老咗,但我哋依然有心、能力、體力去做呢件事,年紀大唔係一個問題!」他坦言希望能夠原班人馬拍續集,由陳木勝導演執導:「始終我哋係一手一腳由Benny做出嚟,希望今次都係由佢操刀。」

李璨琛、曾美慧孜、余安安、黃秋生及毛舜筠昨晚(14日)出席慶功宴。(陳順禎攝)

《淪落人》全晚奪得三個獎,包括「新晉導演」、「最佳新演員」和「最佳男主角」,李璨琛坦言見到黃秋生再奪影帝感到很高興:「我哋之前合作過《野獸刑警》、《上帝之手》、《怪獸學園》,今次合作畀我最大嘅分別係大家都成熟咗,經過20年之後佢嘅演繹方式都昇華咗。」不過,他直言無緣奪「最佳電影」感到相當可惜:「呢部戲真係唔容易,首先政府唔夠預算,300萬講真,話多又唔多,話少又唔少,但如果係畀一部戲今時今日嚟講,300萬真係唔多。淨係車錢、各樣那樣、買飯你都去咗一部分啦!我嗰陣20幾年前得50萬,經歷過嗰段時間,所以我都好明白嗰個感受。」

+12
+11
+10


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。