鬼同你住專訪|邵音音差啲被性侵幸靈體護身 「事後對方發高燒」

撰文:許育民
出版:更新:

由陳果自編自導的港產鬼片《鬼同你住》,以香港瘋狂樓價做背景,令大家貪平連凶宅都有興趣。如果你咩都唔驚,可以平幾十甚至百萬住凶宅,都係一個選擇。問到陳果、邵音音及黃又南的撞鬼經驗,以音音的經歷最猛,而且佢仲遇到個正義之靈,仲幫佢擊退「鹹濕鬼」。

音音提起昔日的靈異遭遇,沒有驚反而頗有喜感。(劉智源 攝)

80歲鄰居死後不時現身

對於住凶宅,有得揀大家當然避得就避,但音音姐就明言有些事,你想避都避唔到,佢自己就有以下經歷。邵音音︰「我住過九龍塘,家中對面有個80多歲婆婆過身,但我同女婿波多野,久不久都會在門口聽到女人慘叫聲,有時開門仲會見到個著紅衫的女人企喺度,我同女婿通常會互望一下,唔敢出聲,返到屋內才敢問對方見唔見到?」

音音姐在戲中扮演鬼后,單是化妝都兩、三個鐘。(《鬼同你住》劇照)

差點被性侵幸得靈體仗義幫忙

拍鬼片,靈體好多時都扮演害人角色,但音音姐就分享一個極奇異經歷,懷疑靈體都會行俠仗義幫自己。「以前住一間屋,經常見到一個黑影行過,睇醫生都話我可能精神病,後來有個男人來我屋企,心存不軌,不是想強姦我,總是想搞我!」說到這裡,身旁的陳果導演都不禁讚句︰「你艷福不錯喎!」邵音音︰「我真係太吸引,令一個正直的人都按奈不住。你又唔搵我拍《三夫》?」陳果︰「你後生……50年我搵你啦」導演都相當心水清。

不過故事發展到這裡,開始有靈異事情發生。「正當我拒絕個男人,跟他有糾纏時,廚房內突然傳出打爛碗的聲音,然後房內化妝檯上的化妝品,都突然飛起掉到他身上,這全是我親眼見到。個男人當然立即逃離,事後聽說他返到屋企還發高燒。」可能就是這次經歷,令音音姐對靈異之說沒有太大恐懼。「我好多時都跟它們住埋一齊。」

母女為層樓互相廝殺。(《鬼同你住》劇照)
又南做地產經紀,以賣凶宅為主。(《鬼同你住》劇照)

陳果︰拍《福星》系列有遇過

至於陳果導演,坦言在戲行有很多這些傳聞,自己雖然沒有接觸過,但最接近一次都叫他感到心寒。「80年代我有份拍《福星》系列,做副導演。在廠景內有廁所, 3格之中有一格永遠鎖上,有次拍到清晨5、6點,我去完廁所出來,有個工作人員緊接使用,但他邊行邊大叫︰『天光喇,出來吧!』我當時不知他在叫甚麼,但不夠2分鐘,他口腫面腫的行出來,我都呆了。」到底是否言語上有冒犯,陳果都說無法解釋。

陳果最接近靈體一次,都是發生在片場。(劉智源 攝)

至於又南都試過去台灣旅行時,在酒店內被鬼壓。「我第一晚住,準備沖涼前太累不自覺地睡著了,突然之間整個人郁不到,當時已心知不妙,然後醒起朋友說講粗口可以壯膽驅鬼,但我講完都幫唔到,隨後當晚睡覺時都有再被壓,後來行到酒店大堂,就見到有十數個和尚在做法事,終於知道甚麼事。」最後都換房了事。

黃又南都試過被鬼壓,誤信爆粗可化解。(《鬼同你住》劇照)
你可能感興趣