【建華霸權】月繳四千積分卡錢、放假要申請 商戶:簡直係吸血鬼

撰文:
最後更新日期:

近年不少街市進行翻新,當中有近20個街市由建華「香港街市」管理,其管理方式一直為人詬病。有建華旗下的小商戶向《香港01》反映,建華以多種招數「管理」小商戶,例如顧客積分卡換取禮物的金錢需由小商戶支付、放假要申請、限制貨物擺位等,直斥:簡直係吸血鬼嚟!

攝影:鄧詠中

積分卡錢、八達通機手續費 佔租金一成

由建華「香港街市」管理的葵盛東街市於2017年8月完成翻新後重開,但華麗裝修的背後,都是小商戶的血和淚。葵盛東街市一商舖老闆鄺小姐表示:「我哋入嚟做要畀入場費6至8萬,其實即係畀錢佢哋裝修。但我哋入到嚟乜都冇,只有一個舖位、地磚同一盞燈,其他嘢要我哋自己畀錢再整。」街市裝修「升級」後,租金亦隨之上升。鄺小姐指,她四年前在該街市開店,未翻新前400呎舊舖的月租約三萬元,翻新後新舖只有200呎,卻要付四萬多元月租,「比舊街市上升了三成。」

領展於2015年底將葵盛東街市外判給建華管理後,建華於2017年開始進行翻新工程,同年8月重開。

但真正的惡夢在搬入後才正式開始,除了租金,商戶每個月還要支付積分卡錢、八達通機手續費等費用,佔租金的一成,連租金鄺小姐每月要繳交五萬元。

會員積分計劃 商戶畀錢以建華名義送禮物

現時,建華旗下的街市均實行會員積分計劃,市民可以申請一張積分卡,每一間商店都設有一部積分卡機,市民每次消費均可以「嘟」卡儲分,儲夠一定積分就能換取相應的獎品,例如雞粉、豉油、米等。但羊毛出自羊身上,原來每間店舖每儲有100分,就要支付$1.5元,換言之愈多市民使用積分卡,店舖就要支付愈多費用。鄺小姐指,「試過一個月要交兩、三千,最多交四千幾,係舖租嘅一成。」

建華設會員積分計劃,市民儲夠一定積分可以換取相應獎品。

新年休息 市民都儲到分? 商戶:欠透明度

鄺小姐又批評積分制度欠缺透明度,「我哋(商戶)唔會知實際儲咗幾多積分,得佢哋(建華)知,冇透明度。佢哋每個月都會寄一張單畀我哋,話我哋今個月儲咗咁多分,要畀返咁多錢,但係我哋自己Check唔到,佢哋話咩就咩。」她舉例農曆新年期間,她的店舖休息了八天,但那八天都有積分計算在內,她疑惑:「啲積分邊度嚟?」向建華查詢後,建華回答指可能有顧客於年廿六、年廿七買,但沒有拍卡,到年初三、四才拍卡。「平時街市會開咪叫顧客走之前記得拍卡,如果唔係第二日就會冇咗啲分,但依加過咗一個禮拜先拍都依然有分,究竟邊個先啱?」她指有顧客儲完分會忘記換禮物,她會提醒顧客要換,「因為從為顧客嘟分嗰一刻開始,我哋已經拎咗錢出嚟,如果你唔去換嘢,啲錢就會畀建華賺晒。」

除了積分卡機外,建華亦會強制商戶安裝八達通機,「每個月要交$298嘅八達通機月費之餘,我哋想拎返啲錢出嚟仲要收我哋1.5%嘅手續費。我賣一支豉油先$10,賺都賺唔到$1,你收我咁多手續費,我哋仲點賺錢?」

每一間店鋪都安裝了積分卡機,商戶需每月繳費。

老闆變員工 放假要申請

鄺小姐直言,在建華的管理之下,自己不像老闆,而是似超級市場員工,因為她連放假的權利也被剝奪。「佢最賤格嘅就係新年嗰陣遞張紙畀我哋,話我哋新年放幾多日假要同上面申請,我心諗:我自己做老細,放假仲要同你申請,黐線㗎你!」但進了這個場只能遵守這裡的規則,鄺小姐會循例通知建華一聲,詎料建華卻要求鄺小姐「唔好放咁耐」,「佢哋會畀說話我哋聽,話:『如果你哋放假,會影響到成個街市。』」

被問到未申請就放假會有其麼後果,鄺小姐指「我哋要放佢哋都冇得強迫我哋開,但佢哋每個月都會有投票活動,選出最佳店舖,一定係畀佢哋自己嘅舖頭,例如『領鮮』、『天天鮮果』,我哋呢啲唔聽話嘅小商戶唔使旨意拎到。」

鄺小姐指,鹹蛋、皮蛋$2一隻已經相當便宜,建華仍要求商戶降低價格,鄺小姐怒斥:「我哋完全賺唔到錢!」

限制多多:指定擺放高度、價錢牌款式、貨品擺位

訪問當天剛好有穿著「香港街市」制服的工作人員到街市內一間水產店拍照,「場內兩間水產店同兩間肉店都係建華自己嘅,佢哋會落嚟巡場,影相睇下淨返啲咩貨品。」但除了影自己店舖外,工作人員也會拍下其他店舖的販賣情況,「睇下我哋啲貨品擺得好唔好,例如有冇超越指定高度,價錢牌嘅款式啱唔啱,唔可以用紙皮箱裝貨品等等,如果擺得唔好,佢哋又會畀說話我哋聽,話:『你呢啲要擺靚啲啊!』」

建華商舖貨物擺位都要管,放得不夠整齊會被要求「放靚啲」。

強推新年優惠 要求商戶提供貨品送福袋

建華對小商戶限制多多,農曆新年已可見一斑,「新年我哋會拎多啲貨,冇位擺就唯有擺舖頭上面嘅位置,但建華咁都唔畀,工作人員嚟影相,叫我哋要擺返落嚟,但舖頭真係冇位擺,我哋唯有拎少啲貨,拎少咗貨啲嘢就會貴啲,結果市民只可以買貴餸。」商戶因建華的種種限制被迫加價,建華卻要求商戶減價,「佢哋會去巡其他場,之後返嚟叫我哋做推廣,例如新年佢哋會話:人哋啲瓜子賣得平啲喎。」新年期間,建華想送福袋給市民,卻叫商戶拿一些貨品出來,「我哋唔肯攞佢哋就會係咁煩住,佢哋係用我哋啲錢送禮拜畀顧客,但係用佢哋公司嘅名義送!」

建華會以影響環璄為由出警告信給商戶,指若違規會終止合約,不賠償按金。

完約不續約:建華簡直係吸血鬼嚟!

鄺小姐憤然表示,「未入場之前唔知佢有咁多限制,以為同之前一樣,點知入嚟之後咩都要管,仲要佢哋自己舖頭啲嘢賣到好貴,趕走晒啲客。嚟緊五月會簽約我哋點都唔簽㗎喇,就算佢唔加租都唔會考慮,再搵場都唔會再搵建華嘅場,建華簡直係吸血鬼嚟!」

全線建華商戶受影響:根本就係打劫我哋!

除了葵盛東街市,記者亦前往沙角臨時街市及寶達街市兩個同樣由建華管理的街市,發現所有店舖都有安裝積分卡機及八達通機,有些甚至有支付寶,有商戶承認建華的確有以上限制,並補充指,「如果9點見你未開工就會打電話問你做咩唔開工,你要畀到一個解釋佢」。對於建華收取各種費用,有商戶形容「佢哋根本就係打劫我哋!個情況就好似黑社會交保護費咁,好無奈,但都冇計。」又有商戶指,「舖位小,空紙皮箱放喺店舖內會阻礙空間,故有時會將紙皮箱放喺對面嘅空舖或短暫放喺店舖門口,等工作人員前嚟收拾,但佢哋連咁都唔畀,仲會出警告信,話我哋影響環境,仲話如果再係咁,就要終止合約,唔會賠返按金畀我哋!」

除了葵盛東街市外,其他建華旗下的街市小商戶均設有積分機和八達通機。

市民:會考慮少用積分卡

不少市民表示有用積分卡,但很少換購商品,同時亦表示不知道商品由建華送還是商戶送,當記者告知由商戶付錢送出商品後,市民黎太馬上表示:「咁慘?都會考慮下用少啲張積分卡。」同時亦有市民認為,商戶會將其所付出的費用轉嫁到市民身上,所以最終受苦的依然是市民。

另一雜貨店老闆吳先生指,「(建華)好醒目,利用張卡綁住個客,令個客唔會周圍走。」

組織:小商戶欠議價能力,唔夠膽出聲

監察公營街市發展聯盟發言人陳淑淇回覆《香港01》查詢指,「現時香港嘅私營街市被幾個財團壟斷,小商戶冇議價能力,又怕得罪財團,往往唔夠膽出聲或者反抗,更遑論公平競爭。」她認為政府應興建更多公營街市,或者在政府土地上辦墟市,同時房署轄下的街市應停止外判給與領展相同的承辦商,避免這些承辦商再度擴展版圖。

翻新街市停不了 建華版圖再擴大

據了解,鑽石山鳳德街市及馬鞍山耀安街市將分別於4月及5月底暫停營業,以進行翻新工程,而粉嶺華明街市及沙田沙角街市則正進行翻新工程,預計會於5月及6月重開。據了解,領展已將耀安、沙角和華明三個街市外判給建華管理,意味著建華的版圖將會進一步擴大。

建華「香港街市」發言人回覆《香港01》查詢指,公司推出的會員積分計劃,與一般商場、超市及商業機構無異,目的旨在為顧客提供一站式的顧客體驗,使其享受街市購物樂趣。又表示,公司會繼續努力提升旗下街市的服務質素,為居民締造更舒適、便捷的購物環境。對於就商戶對積分機收費的投訴,一概沒有回應。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。