【非洲豬瘟】跟住師奶去買餸搶鮮雞 冰鮮排骨加價五成11點賣晒

撰文:
最後更新日期:

上水屠房有內地豬隻驗出非洲豬瘟,政府周一(13日)起開始銷毀6000隻活豬,影響豬肉供應,豬肉檔十室九空,導致市民近日無新鮮豬肉食。由於上水屠房要大清洗,連活牛也暫停供應,向來精打細算的香港師奶,近日到街市買餸都叫苦連天。香港01記者於周三(15日)前往觀塘瑞和街市,發現市民紛紛轉食凍肉、雞肉。有市民指這些替代品物價飛漲,連海鮮也不能倖免,「乜都貴咗,好肉赤,但都冇計」。

凍肉店生意增兩成 冰鮮排骨11點賣晒

凍肉店老闆吳先生稱,近日店舖生意額上升約一至兩成,「(市民)多數買雞翼、雞扒,丸類及豬扒的增幅則比較小。」他稱凍肉的供應未受影響,相信短期內仍會有較多市民選購凍肉。家庭主婦葉女士指,這幾天凍肉店擠得水泄不通,「昨日朝早11點打算買冰凍排骨煲湯,點知已經賣曬,平時呢個時間去,仲擺到成座山咁高。」需求上升,價錢亦隨之提高,潘先生拿着一袋冰鮮排骨,說:「平時只需20元,但現在要30元,貴咗好多!」

新鮮雞貴6至7元 「好肉赤」

除了凍肉,市民亦爭相購買新鮮雞。記者到一新鮮雞檔查看,發現店舖門口擠滿顧客,有人更一口氣買了兩隻雞。市民劉先生稱,「平時食開新鮮肉,冇豬肉就唯有買新鮮雞。(近日)有加價,貴咗起碼6至7元。乜都貴咗,好肉赤,但都冇計。」

15日上午,竹絲雞及龍崗雞分別售72元及82元,市民劉先生指比平時貴了6至7元。(黃桂桂攝)

海鮮貴8至9元 市民:無可避免

市民黃女士稱,平時會買豬骨煲湯,沒有新鮮豬肉後會轉買冰鮮豬骨或魚煲湯,「但海鮮都貴咗,鰂魚比之前貴咗8至9元。想買鯇魚煲湯,但下午三、四點已經賣晒,連魚湯都冇得煲。」對於豬肉停售後百物騰貴,市民大感無奈,「無可避免,需求高咗自然會坐地起價,但冇得唔買。」

沒有新鮮豬骨後,不少市民轉煲魚湯,當中鯇魚湯是熱門菜式之一。據記者所見,早上10時30分左右,魚檔的鯇魚已經所剩無幾。(黃桂桂攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。