呢鋪真係俾你累死，同我講跑步係最平嘅運動，幾舊水買對跑鞋就落街跑得；點知跑跑下，見到跑友着嗰對啲色幾靚，又跟佢買咗對；跑鞋同山鞋加埋成幾十對，又經常以「工欲善其事，必先利其器」為理由，結果裝備同背囊一大堆。原來十個跑友，九個都係「病友」。

同友人吹水飯聚，席間肥強同我講：

　呢鋪真係俾你累死，同我講跑步係最平嘅運動，幾舊水買對跑鞋就落街跑得。點知跑跑下，見到跑友着嗰對啲色幾靚，又跟佢買咗對；見到出新款，唔覺意又買多咗對，依家喺屋企啲跑鞋，仲有幾對新嘅未開，俾老婆鬧我係咪有病，公司收埋兩對日本版「他化」（Tarther）都唔敢攞返屋企！

我呷了口啤酒說：

　肥強，如果呢個係病的話，我病得重過你，我啲仲大鑊。我唔只跑路，仲跑埋山。跑鞋同山鞋加埋成幾十對，又經常以「工欲善其事，必先利其器」為理由，結果裝備同背囊一大堆。有時夜闌人靜反思下，都覺得自己有啲過分。不過我哋唔使擔心，原來十個跑友，九個都係「病友」。當全世界都係一樣嘅時間，呢個自然變得理所當然同合理！

肥強接住又話：

　愈跑愈「瀨嘢」！依家仲跑埋海外馬拉松，早嗰排去日本跑馬拉松，老婆同個女鬼咁支持我，跟埋我去東京幫我打氣，咁就使咗我幾皮嘢！

跟住，肥強似抱怨實炫耀，拍住個明顯已細咗唔少嘅啤酒肚話：

　依家個腰圍得返31吋，以前啲褲成36吋。家陣全部唔啱着，又要買過晒，咁又要使一筆，真係俾你累L死！

我笑住同佢倒滿已半空嘅啤酒杯：

　哈哈！口水多過浪花，飲杯啦！

（本文純屬作者意見，不代表香港01立場。）