【REBOOT】吳海昕炎夏於南生圍喪跑仆親　手腳瘀晒扁嘴：戰績彪炳

吳浩康、周國賢、吳海昕、楊尚友、駱振偉於炎炎夏日現身南生圍，為劇集趕工，當中涉及不少追趕場面，一眾演員都滿頭大汗。周國賢和吳浩康坦言自己頗大汗，為開工都要「頂硬上」：「開工唔諗太多啦，邊有舒服呀！」駱振偉則表示：「依家拍攝地點好熱，所以鬥緊邊個大汗啲，暫時就我同周國賢領先，係大汗之王。」

吳海昕飾演改邪歸正的邪教教主助手Dr.Man，笑指夏天到南生圍拍動作戲份，是挑戰人體的極限，更不小心跌損：「咁熱仲要追逐，真心係勁辛苦，跑到我成個人撻落地，手腳都損晒，戰績彪炳，證明我係好專業架！」吳海昕即場展現傷勢，可見其右手及右大腿均有大塊瘀傷，狀甚恐怖。吳海昕之前都有分享其唱歌片段，被問到會否在片場和周國賢、吳浩康jam歌，她則笑言：「好嘅音樂就盡量唔好破壞，我就做個好嘅觀眾，合埋個口，細心咀嚼人地嘅旋律和音樂」。