【教束】親爆劇本有漏洞 導演黃智揚:呢個係時間所限嘅決定!

撰文:
最後更新日期:

黑色六月,香港局勢動蕩,觀眾沒心情娛樂,睇電視只想追看新聞,由陳志發監製、黃智揚執導的ViuTV劇集《教束》偏偏選中這個「最錯誤」的時間首播,就連劇組台前幕後事前也沒有信心,不過好劇總算有好報,「反修例」抗爭持續,林鄭政府依舊態度傲慢,結果一幕幕劇情有如「預言書」呼應現實 ── 平庸學生力戰精英班出選學生會、「午飯自煮」爭取選民支持卻違反校內選舉條例、學生為反直資包圍校長座駕抗議、老師狠罵校長「一直以嚟你都只係想解決提出問題嘅人」、合約教師和學生會主席被校長威逼利誘轉駄撐轉直資、師生聯手要求校長下台 ── 名副其實「錯有錯着」,加上對白如「預言書」、選角精準,尤其是一批新演員形象鮮明,令《教束》成為ViuTV開台3年以來劇本最紮實、口碑最好的自製劇。幕前劇集好看,幕後其實有更多觀眾看不見的有趣資料,合共20項,《教束》粉絲可以視之為「珍藏版煲劇天書」。

撰文:游大東

(《教束》劇照)

【#1】馬修書院校名和校徽 投票日為9.28

《教束》的故事裏,無論人物設定、劇情和對白皆毫無保留地呼應現實,令觀眾很容易對號入座「搵位坐」,比如「馬修書院第39屆學生會投票日」於9月28日舉行,導演承認這個日子就是要令人想起2014年「佔領中環」的爆發點 ── 警方於金鐘夏慤道向群眾施放催淚彈驅散群眾。於是有人懷疑,劇中「馬修書院」這個校名和校徽是否也隱藏特別意思,惟導演笑指大家別想太多:「『馬修書院』呢個校名純粹亂改,校徽嘅設計呢就有Reference嘅,不過我都唔知係咩,哈哈!」

(YouTube《馬修書院校歌》MV截圖)

【#2】導演哼出4個音 「莊子」兩天寫起校歌

「馬修書院/馬修書院/全部精英好學生/全部品德學習都兼優/聽,老師講咩都聽!」上述幾句歌詞來自《教束》的「插曲」《馬修書院校歌》,由飾演教學助理Bonix的鍾雪瑩填詞,由飾演「莊子」的周漢寧作曲,「周寧」透露當初創作這首「校歌」的原因,是應《教束》幕後要求,為劇集建立聲勢,「導演組話想做啲宣傳活動,於是就搞咗個『校歌創作比賽』,但只係得我同鍾雪瑩參加,於是就決定一齊創作,後來我叫Yellow(導演黃智揚)用佢嘅方法去唱『馬修書院』4個字,就唱咗而家你哋聽到第一句『馬修書院』,我就用呢幾粒音去寫晒成首歌,鍾雪瑩佢就專登寫啲唔啱音嘅歌詞,就整咗呢首歌出嚟!」

所以這就解釋到,何以MV最後出現另一位作曲人叫「楊智煌」,其實是「黃智揚」的諧音加倒轉來寫。據知整首「校歌」由創作到完成錄音,時間甚短,「周寧」續說:「我用兩晚寫起咗首歌,之後鍾雪瑩就用一日填起份詞,之後再約咗一日出嚟錄音。」誰有份開金口?鍾雪瑩解答可以在MV找答案:「全部人都有份,好似只係用咗兩個鐘就錄起首歌!」而負責編曲的叫Hirsk,跟歌手林聰和KIRI T同屬何韻詩旗下Goomusic「One One Collective」的一份子。

(《教束》劇照)

【#3】 主線橋段創作靈感 源於松本哉「咖喱飯抗爭」

「午飯自煮」是「不老騎士」勝出「馬修書院」學生會選舉的轉捩點。黃智揚指出,《教束》的創作靈感源自學童自殺,「但大情節上嘅第一大原點,係煮咖哩飯,比選學生會呀,轉直資呢啲Idea仲早啲出現。」黃智揚說,學校飯盒難食是真實經歷,而煮咖喱則是看書而有啟發。「以前讀過兩間中學,其中一個真係啲低Form學生唔准出去食,要食難食飯盒,咁我負責『看飯』,真係見住佢哋浪費食物。第二,我睇過一本叫《素人之亂》嘅書,係一個左翼社運人士松本哉嘅半自傳,裏面講到佢大學嘅時候間Canteen都係難食嘅,但最難頂係佢哋又貴,仲不斷加價,松本哉忍無可忍,決定喺Canteen門口煮咖哩飯,挑戰權貴。」《素人之亂》是台譯版本的名字,日本原版名為《貧乏人之逆襲》,立法會議員朱凱廸亦曾撰文推介此書。

(《教束》劇照)

【#4】美指巧手製作「不老騎士」頭盔

六款不同顏色、頂部插有兩條烏毛或絲狀盔纓的紙製頭盔,是《教束》裏一眾「不老騎士」成員為參選「馬修書院」學生會選舉站台宣傳時必定戴之物。現實中,這是《教束》美術指導洪芷清一手一腳用紙製作的道具,並可摺疊收藏,單從電視畫面看到已覺手工精美,導演黃智揚直言洪氏出品實在「偉大!」。

(《教束》截圖)

【#5】學校操場Wide Shot「種人」

《教束》製作成本有限,無法像坊間其他重頭巨製劇集那樣,邀請大量臨記演出這類大堆頭場面。所以《教束》導演黃智揚承認,在第3集和第9集出現的學生會內閣於操場早會站台的廣角畫面(Wide Shot)都是CG特效。「現場我諗只係得6份1真人企喺個操場度,其他係『種人』(行內CG複製人的術語)種出嚟!」

(《教束》劇照)

【#6】導演印象深刻 主動邀請鍾雪試鏡

鍾雪瑩飾演的教學助理(TA)Bonix,是整個「馬修書院」裏理念和想法跟盧文達(劉俊謙飾)最相似的人,經常安慰盧Sir,是繼「林副校」(陳秀雯飾)之外,圍繞盧Sir身邊的另一道清泉。鍾雪瑩戲份不算多,然而她喜感超強,亦沒有很多新晉演員那種難以掩飾的生硬感覺,頗討人歡喜,值得擁有更多演出機會,讓她好好發揮。現實中鍾雪瑩是「叱咤903」商業二台的DJ「鍾雪」,現時逢周日晚和周一至周五主持兩個個人節目《努力!!! 奮鬥!!!》和《半個鍾說》,曾經於2010年參加亞視舉辦的《亞洲星光大道3》,加入「張佳添隊」,最終於16強止步,但她的夢想不是唱歌,而是演戲。

「其實我一直係想做演員!」所以近年她一直尋找機會,包括2016年上映、陳志發執導的《點五步》,雖然沒被選中,卻成就她今次在《教束》演出的機會。導演黃智揚說:「鍾雪瑩喺《點五步》有Casting過,我好有印象,因為覺得佢好得意,做戲幾舒服,不過導演係發哥,佢覺得唔啱用。去到籌備《教束》,我嘅副導演喺Casting之前畀咗段佢拍嘅片我睇,令我Recall返自己我曾經都欣賞過佢做戲,然後就叫佢嚟Cast,並成功游說發哥用佢!」所以說,不斷努力,絕不放棄,總會等到機會降臨。

(《教束》劇照)

【#7】我接受唔到囉! 程仁富原本演鄧學囂?

無可否認,由搞笑藝人程仁富飾演的「狗榮」(周耀榮),絕對是全套《教束》最搶鏡的角色,不過原來劇本構思初期,他曾經有機會成為「莊子一生中最愛」的「會長」鄧學謙?導演黃智揚解釋:「我有忽發奇想過,用一個女仔做『賢仔』嘅角色,又或者試下叫程仁富演鄧學謙,不過都係諗下啫,哈哈!」倘若「狗榮」真的是「會長」,相信沒有人能夠接受,尤其是周漢寧,亦很難投入劇情當中。

(《教束》劇照)

【#8】 真人已入戲! 三位演員Casting即獲選

《教束》開鏡前曾在facebook發帖公開召募演員,導演黃智揚直言以下三位面試後,已覺得他們必須加入劇組:「公開Casting完咗之後,我同副導演佢哋一齊傾人選,有3個人係一致共識,而且係喺見到真人嘅Moment開始,就已經決定佢哋係不二之選,分別係神婆(盧蓁宜飾,圖左)、『為食妹』阿Mo(鄧麗英飾,圖中),同埋奇行種(余家溢飾,圖右)!」

(《教束》截圖)

【#9】無錢請臨記 全隊Crew落場扮學生

第二集開場這一幕分配學生會資源的戲份,除了唐浩然、周漢寧、李卓毅幾位演員外,全部都是《教束》的幕後團隊。黃智揚說:「冇錢請人嘛,所以全部都係Crew嚟,副導演、場記、助製、助美、助服、編劇、燈光,全部都坐晒落去,我都坐埋落去!」誰是導演本尊?會長鄧學囂左邊的那位就是了,而飾演男女童軍隊長的,就是編劇吳振忠,他亦有份飾演「馬修書院」校董會成員。

(《教束》劇照)

【#10】隔籬校變態「K同學」真身有來頭

「Hello,我係阿K,我想知道你叫咩名......呢次係我第119次同你傾偈。」第5集甫開始,鄰校學生「K同學」在公園主動跟「啞同學」蔣蔓芝(麥可怡飾)搭訕,試圖表白,奈何遭她無視,懷恨在心的「K同學」於是叫多幾位同伴(肥仔釘與爆呔占@衝三小等飾)光天化日之下伏擊「啞同學」,一眾「不老騎士」見狀決定出手相助,賢仔(岑珈其飾)更因此受傷,為日後「啞同學」在學生會選舉期間自行為他們拉票埋下伏線。飾演這位口齒不清,性格帶點乖張的「K同學」的並非素人,而是剪接師梁焯霖,陳志發執導的ViuTV劇集《短暫的婚姻》就是由他擔任剪接總監,他亦是寫作人,經營專門和陌生人聊天的facebook專頁「陌樂偈」,近日埋首於ViuTV新劇《Me Too》的剪接工作。

(《教束》劇照)

【#11】拍攝期短得離譜 僅38組煞科

《教束》總共有20集,黃智揚謂,2016年底開始構思故事,「應該係《三一如三》就播完,2017年就斷斷續續開始度下,都未正式動筆嘅,初稿係2018年5月,嗰陣時先寫起20集劇本,不過同而家出街版都差好遠,修改咗好多個版本,唔好問我有幾多個,哈!」黃智揚又指,原本這套劇是由擔任監製的陳志發執導,後來才決定由他接手,「後尾佢覺得個故仔原本Idea出自我,個風格又貼近我,所以畀我拍,可能佢拍就唔係而家咁輕鬆嘅類型。」

2018年7月22開機,原定9月16日拍攝完成,結果當天遇上超強颱風「山竹」襲港,延後至10月5日才煞科。全劇共20集,每集半小時,前後僅花了38組(每日8至10小時)便完成,參考無綫電視拍劇的慣例,一套每集長一小時的劇集,拍攝時間大約需要106組,打個「五折」(半小時計)都需要53組,言即《教束》較正常做法還要少15組,難怪黃智揚聽到我這樣說後大為驚喜:「Wow,我哋完成咗個不可能嘅任務!記得我嗰陣時見到(時間表)都真係驚,因為一日至少要拍10場,急到黐線!」雖然很多情節都在學校裏發生,場景變化不大,然而劇本紮實,故事峰迴路轉,就算在極趕急的時間下完成,依然無損《教束》整體可觀度,是為2019年上半年必看港劇!

《教束》播出後,劇中一眾新晉演員人氣急升,(由左至右)包括鄧麗英、盧蓁宜、已入行逾10年的岑珈其、周漢寧、程仁富以及余家溢。(《教束》劇照)

游大東其他《教束》文章:

【教束.專訪】劉俊謙入行前以運動員心態做戲 老師陳淑儀一句話擊碎自尊心

【教束.專訪】入行40年演技好有原因   陳秀雯公開秘訣:最緊要有筆記!

《教束》「莊子」拍港台新劇演自閉青年 周漢寧:發脾氣最難演!

(《教束》劇照)

【#12】盧Sir與Bonix之間的曖昧不明關係

「盧Sir」盧文達與「馬修書院」教學助理Bonix(鍾雪瑩)總是曖昧不明,劉俊謙在《教束》結局派對時透露,編劇團隊最初構思劇本時,確曾考慮加插情節描寫他們的愛情關係,惟集數所限最終作罷。身兼編劇的導演黃智揚再詳細解釋箇中緣由。「由此至終,Bonix嘅定位都係Supportive嘅初心老師,同盧sir有強烈對比,可能喺Bonix角度係會少少仰慕盧Sir嘅,不過盧Sir只當佢係𡃁妹。同埋(編劇)唔畀佢兩個一齊,都係考慮到(之後)盧Sir(跟Yoyo,吳海昕飾)分手後,轉個頭就同另一個女仔一齊,觀眾會諗係咪見異思遷呢?加上Bonix又後生啲,所以我諗劉謙所講嘅『感情線』,係指當一個年輕,又傾得埋,又明對方諗咩嘅女仔出現喺盧sir身邊,會成為佢自己同女友分手嘅其中一個原因,但並不代表佢同Bonix兩個會喺埋一齊。」

(《教束》劇照)

【#13】 元氣彈一幕源於佔中? 導演編劇鬧羅生門

第八集「DQ」,「不老騎士」因為「午飯自煮」活動違反「馬修書院」學生會選舉的「選舉條例」,但「腎仔」麥浩然(岑珈其飾)堅持繼續派飯,而這件事亦直接得罪午飯供應商,結果梁文海校長(廖啟智飾)需要開會決定懲處「不老騎士」,盧Sir(劉俊謙飾)無計可施之下,只好向林副校(陳秀雯飾)求救,林副校暗示可以發起群眾運動,於是盧Sir在上堂時,向劉奇源(蔡錫浩飾)等一眾初中學生教授「元氣彈」,整班學生於是在課後於會議室外抗議,舉高雙手,齊叫「不老騎士,為我做事!」有觀眾看到這一幕指嚇一跳,因為想起5年前佔領運動時學生抗議的畫面,然而導演黃智揚指,這一幕跟佔中無關,「其實係亂諗,因為我有《龍珠》情意結」。不過負責編寫這集劇情的吳振忠笑言:「呢一集係我寫嘅,明明呢集就係關佔中事,分場都冇《龍珠》,反而嗰陣係覺得元氣彈呢個動作似示威者喺佔中喺防線前舉手,先至決定咁寫。」

(《教束》劇照)

【#14】超級搶鏡的劉奇源 突然獲邀拍劇

由蔡錫浩飾演的「馬修書院」初中學生劉奇源出場次數不算多,但甚得網民喜愛,討論度頗高,原來這次選角有段小故事。導演黃智揚在劇集造勢短片《馬修書院校園電視台》裏曾講過,去到要拍攝「午飯自煮」的戲份(第7集)當天,製作組仍未找到合適人選。「去到嗰日朝早都搵唔到呢個演員,咁就要搵額外嘅人,又叫臨演公司Send啲相嚟睇,甚至叫埋佢哋過嚟現場,但好多都唔啱。於是副導演周圍搵,就畀佢見到有間課室入面,有啲小學生喺度上緊堂,劉奇源呢,其實係另一間小學嘅學生,好似係小六,副導演立即衝入去,唔知點樣同佢交涉,因為人哋明明上緊堂。咁點解對方又肯演呢,因為佢唔想喺度補課,哈哈!」

(《教束》劇照)

【#15】學生會選舉劇情有漏洞 王天城突然移民冇人知?

很多看過《教束》的觀眾都力讚故事貼地,劇本紮實,然而第9集卻隱藏一大漏洞!該集劇情焦點是「馬修書院第39屆學生會選舉」,因為精英班候選內閣「OASIS」成員之一王天城(凌健熙飾)在最後一輪投票時倒戈,令對家「不老騎士」以一票之差勝出。當孔兆秋(馬治飾)當場質問:「王天城,點解你要咁做?!」王天城解釋,競選學生會講求的是用心做實事,並非過份計算每一步的成效,臨走前更拋下一句:「對唔住呀,我聽日就移民㗎喇,再見!」

奇怪的事情來了,何以一個即將移民的學生,仍然要參選學生會?而其內閣成員竟然事前全不知情?導演黃智揚解釋:「如果王天城唔自爆一直留喺度,劇情就一定會牽涉到OASIS『搵鬼』,(然後變成)OASIS杯葛佢,咁佢嘅戲又會多咗好多,我哋唔想太影響主線,但又唔可唔交代,因為觀眾一定想知呢個二五仔會點,所以我決定快刀斬亂麻整走佢,你可以話『有Bug』,因為呢個係時間所限嘅決定!」這亦揭開另一個劇本設計的秘密,王天城絕非為了這一幕「倒戈戲」而存在,「調番轉,開頭已經冇原因咁Set咗6打7(不老騎士 VS OASIS),真係冇原因,後尾發哥(監製陳志發)見到就話:『不如最尾投票有人二五啦!』」

(《教束》截圖)

【#16】「周寧」創作「莊子」行為 觸發編劇靈感

第18集,為食妹(鄧麗英飾)在學生會堂裏找到莊子的日記,寫了他對自己能夠成為「不老騎士」的感受,負責編寫這段劇情的是吳振忠,「呢場戲,係拍之前一晚我通頂飛紙仔寫起嘅,因為我見到『周寧』演『莊子』,佢為呢個角色揀咗寫日記呢個習慣,所以我就決定咁創作!」

(《教束》截圖)

【#17】畫面有Jump Cut 「會長」突然壁咚「莊子」?

心水清的觀眾不難發現,第20集「會長壁咚莊子」一幕有Jump Cut(跳剪),當莊子在情人節活動「如何在社交網站撰寫引人入勝的Hashtag」跟同學分享:「如果大家想自己嘅Hashtag,冇咁Bitchy,冇咁空泛,想睇落去有多番少少深度或者內涵嘅話,可以參考一啲作品嘅!」點知下一幕就變成有女學生要求「會長」(唐浩然飾)示範壁咚,感覺突兀,導演黃智揚承認這一幕剪走了很多內容。「中間太多人講嘢,好鬼長,我剪走晒!」

(《教束》截圖)

【#18】拍劇時燒味飯超肥 「莊子」身形暴脹唔連戲

在《教束》開播前的造勢短片《馬修書院校園電視台》裏,導演黃智揚被問到拍此劇時哪個困難最大時,無意中透露有人在拍攝期間身材走樣。「我覺得燒味飯真係一個好大嘅困難,我唔知製片點安排啦,其實係唔好食嘅,同埋係肥嘅,後來我發現喺拍攝《教束》嘅期間,整體上各人嘅身型同埋體重都係唔同咗,我真係覺得係同啲飯盒有關,有一個演員犀利啲,佢係變到唔連戲,可能之後出嚟做訪問,同入面嗰個佢係完全唔一樣。」

據了解,該名「肥到唔連戲」的事主是飾演莊子民的周漢寧,第20集醫院清醒一幕戲,其「包包面」尤其明顯,反觀他拍攝學校戲份(圖左)仍然尖面,有劇中人笑他:「佢呀,去到後來肥到運條褲都着唔落!」「周寧」「嚴重譴責」相關言論失實,「係脹咗嘅,但着到褲囉!」而飾演「為食妹」的鄧麗英則表示羨慕:「『周寧』佢就好啦,塊面尖,係側面先至會見到佢出事呀!」而「狗榮」程仁富則說:「應該個個都有笑過佢肥囉!」《教束》的演員真的很有愛。

(《教束》劇照)

【#19】ViuTV指定陳秀雯參演 「林副校」結局失蹤有因

陳秀雯加入《教束》是ViuTV的決定,導演黃智揚力讚:「真係一拍即合,佢一埋位就已經Fit咗!」身為「馬修書院」林副校,為何在轉直資事件「壽終正寢」、梁文海校長(廖啟智飾)下台後沒有露面?原來同樣跟資源所限有關。導演解釋,最初構思結局(第20集第二節)時,曾有打算拍一幕林副校跟盧Sir會於校內情人節活動所有場囗穿插,一齊見證班學生成長的畫面,「因為結局係『炒散』,一日拍一啲,咁所以唔可能日日都會有Amy姐。」

(《教束》截圖)

【#20】結局一幕揭示校長只是傀儡 編劇扮完童軍扮校董

《教束》大結局最後一幕,三位校董揭開真面目,甚有警世效果,張滿源(中)說:「等梁校長風波平息,丟淡幾年,我哋一定會捲土重來,睇下到時仲有邊個可以阻住我哋轉為直資,哈哈哈哈!」證明梁文海(廖啟智飾)只是傀儡,而飾演另外兩位校董的,分別是舞台劇演員齊籽湮(右),以及編劇吳振忠(左),吳在第二集已曾飾演男女童軍隊長。

《教束》完成了,導演黃智揚(圖中)對一班幕後成員尤為感激。「要特別多謝吳振忠(Steven),執行導演應智贇(Wen)、製片劉海林(Herman)、製片卓佳欣(佳佳)、美指洪芷清(Michelle)、編劇蘇莎朗(莎朗史東),Steven就係喺IVE識啦,其他都叫係BU(傳理學院電影學院)嘅師弟妹,6年前我拍畢業作品已經係呢班人幫我,到6年拍一個商業製作,大家又可以聚首一堂,我覺得呢份感情難能可貴,淨係大家都未轉行已經好難啦!」圖為《教束》大結局梁文海校長(廖啟智飾)遭揭穿真面目一幕,拍攝場地是將軍澳天主教鳴遠中學禮堂。(《教束》劇組提供)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。