在華人傳統社會，「紅白相沖」往往被視為不吉利，甚至可能會對家庭帶來負面影響。惟有打工仔分享，父親因意外離世，但即將結婚的同事仍堅持派喜帖，聲稱是想和他分享喜悅，之後又疑似情緒勒索般稱「個位我預咗㗎，你會嚟祝福我㗎呵？」令他情緒一度失控落淚，只好婉拒對方邀請並拒收喜帖。不過他事後卻回想自己行為會否太過份。

不少網民留言安慰，反斥該同事欠缺同理心在先，「結婚大晒咩」、「識得逆地而處嘅人，唔會喺屋企有白事嘅人嘅傷口上灑鹽」，又認為對方另有所圖，「想人哋俾人情先真」、「你照去話白事不宜封禮，睇吓佢點」、「紅事白事距離咁短時間，正常都唔好要人出席啦，真係情勒加cheap爆」。

父親意外離世　打工仔需辦白事

該打工仔投稿到threads專頁「slavedepartment（奴工處）」，指兩星期前父親因為在家中跌倒，不幸離世，他本來已經深感內疚，未能見對方最後一面，形容「成個人跌咗（落）谷底」，連近日聖誕節都沒有心情好好渡過。

同事仍派帖邀去婚禮　聲稱為「分享喜悅」

事主指，不過日前上班午膳期間，有即將結婚的同事派帖給他，對方稱「我知道你屋企啱啱出咗事，我都替你難過，希望你快啲振作！」及後聲稱仍想和他分享喜悅，表示「希望你下個月出席到！」事主當下不懂反應，「我成個人好似斷咗片咁，無聽入耳」，其他同事則幫忙「打圓場」，勸喻即結婚同事給予時間事主考慮，「唔好即刻要人答」。

1句疑情緒勒索！　事主崩潰落淚拒收喜帖

詎料該同事仍不罷休，竟稱「唔得呀，個位我預咗佢㗎，同埋下個月就到，你會嚟祝福我㗎呵？」對方話畢，事主情緒失控突然落淚，先是婉拒對方邀請，「你結得開心啲，唔好預我，呢個moment我講唔出任何祝福說話」，然後歸還喜帖，獨自離開公司冷靜一會，事後回想卻自責「會唔會做得過份咗？」

分享喜悅？　網民猜另有所圖：想要人情就真

網民一面倒批評該同事「唔識做人」，「結婚大晒咩」、「擺酒唔係你expect，人哋就一定要來」、「應該confirm（賓客）去唔去先派帖，咁樣俾人都唔大方」、「識得逆地而處嘅人，唔會喺屋企有白事嘅人嘅傷口上灑鹽」，又指對方並非真心分享喜悅，「根本唔想嘥咗個位」、「想人哋俾人情先真」、「你照去話白事不宜封禮，睇吓佢點」、「一位咪幾百蚊，為咗幾百情勒（情緒勒索）一個啱啱走咗親人嘅人」、「結婚都要𢯎著數，無錢學咩人結婚？」。

紅白二事不宜相沖！　網民安慰事主毋須自責

有人則指紅白兩事不宜相沖，斥責該同事自私兼「無腦」，「身為有白事嘅人，100日唔可以去紅白二事地方」、「紅事白事距離咁短時間，正常都唔好要人出席啦，真係情勒加cheap爆」、「一陣佢屋企有咩事可能又會賴你有白事都仲要去」、「就算新人無所謂，雙方長輩都肯定唔鍾意」，再安慰樓主毋須自責，「明知你屋企有事都要俾帖，無真正諗你感受」、「你已經做得好好，換轉係我一定X爆佢」。

（threads＠slavedepartment）