尖沙咀躁男打女人片瘋傳!掌摑扯頭髮 途人制止 女方回應極心寒
任何問題也絕不應以暴力解決!本港社交平台Threads瘋傳影片,顯示尖沙咀有一對年輕男女疑因感情問題爭執,其間男方把女方逼到牆邊,出手掌摑及大力扯女方頭髮,女方則只瞪着男方未有反抗。有2名目擊事件的男子看不過眼上前阻止,暴力男竟反嗆「攞證據出嚟睇下啊!」。雙方當場爆發口角,最終女方竟表示「算啦,由佢啦」,2名男子唯有離開。
影片震驚網民,不少人讚2名男子「見義勇為」,「呢個世界已經極少呢啲咁正義嘅人」,並擔心是否「家暴」。正當網民紛紛聲討「家暴男」之際,事件迎來「神反轉」,疑女事主發帖強調是「自願」,又說感激香港人熱心,惟「有時熱心過度就變加害者」。不過網民仍力讚熱心男,認為「有份正義心都抵讚,個女仔有冇覺得多事唔重要,重點係仲有人肯行出嚟question件事」,亦有人慨嘆「一個願打,一個願捱」。
「有冇人識得呢個家暴男?」有網民於11月16日在Threads發布影片,指在尖沙咀目擊一對情侶,當中男方「當街一巴冚落佢女朋友度」,見女方想離開,男方更大力扯女方頭髮,於是拍下現場情況,並與朋友上前阻止,「我哋見佢郁手郁腳就即刻錄低,後尾佢再扯個女仔頭髮,我哋就去阻止佢」。
【影片直擊】尖沙咀情侶吵架 黑衣男扯女方頭髮搖頭撞牆
現場為尖沙咀街頭一處牆角位置,第1段影片看到,1名穿黑衣男子把1名女子逼到牆邊爭執,其間黑衣男大力拉扯女子頭髮,女子頭被擰向一邊。黑衣男又用雙手抓實女子頭髮邊「訓話」邊搖晃頭部,女方多次碰撞到牆壁。
目擊者上前制止 黑衣男否認打女人:攞證據出嚟睇下!
第2段影片看到,黑衣男再次大力拉扯女方頭髮,女方只瞪着男方沒有反抗。這時2名男子走近阻止黑衣男,穿灰衣男子質問黑衣男子:「你打條女喎,咩事啊?」黑衣男否認打女方,反問:「你有無見到我打佢啊?」灰衣男表示目擊黑衣男掌摑女方「你摑咗佢啊!」,惟黑衣男展示動作,反嗆「咁樣叫摑啊?」,並挑釁他們「攞證據出嚟睇下啊!攞嚟吖!」。雙方口角直至影片結束。
女子表示「算啦,由佢啦」 目擊者離開
樓主補充,「結果條友無賴到問我哋要證據,佢話關我哋X事。係唔關我哋事啊,但佢喺條街都咁樣郁個女仔,我哋驚佢返到屋企冇其他人喺度打得仲犀利」。不過樓主指出,最終女方表示「算啦,由佢啦」,他們唯有離開,但公開事件詢問網民:「有冇人識呢個女仔?知唔知佢哋最後有冇分手?」
網民質疑黑衣男「家暴」 讚目擊者「見義勇為」
網民看過影片紛紛讚揚樓主及其朋友「見義勇為」,又批評黑衣男以暴力對待女朋友十分離譜:
「黐線,扯頭髮好痛喎」
「呢一下用力扯頭髮,扯完鬆手扮無嘢,好賤!第二條片都睇到暴力傾向,第日家暴成份高」
「咁大力執住啲頭髮都已經完全唔得囉,已經係家暴」
「師兄見義勇為好型」
「呢個世界已經極少呢啲咁正義嘅人」
也有網民分享自身經歷,勸勉女生要「帶眼識人」,「我以前曾經都係女仔嘅角色,總之女仔要帶眼識人,勇敢啲離開」。
事件「神反轉」!疑女事主發文稱「自願」 反指「熱心過度就變加害者」:有冇諗過會毀咗我哋?
然而網民讚揚「見義勇為」及聲討「家暴男」之際,疑似女事主發帖文回應,強調自己是「自願」,「佢扯我頭髮係有控制力度,唔存在勁大力扯我頭髮嘅問題,我係個當事人,唔會有人比我更加清楚當時係點」。她又說,「香港嘅大家都好熱心,我好感激」,但明言「有時熱心過度就變加害者」,「兩個男仔咁熱心係好事呀,但係佢哋過到嚟嘅時候我已經有出聲,要求其中一個男仔del(刪除)咗條片,佢只係望咗我一眼,之後選擇繼續同我男朋友對罵,我唔想件事搞到愈嚟愈大,已經要求咗佢哋離開,但佢哋並沒有……post呢篇嘢嘅時候有冇諗過其實會毀咗我哋?」
不過網民繼續支持樓主「見義勇為」,「有份正義心抵讚,可以遇着有真正需要嘅幫到人脫險」、「respect師兄,個女仔有冇覺得多事唔重要,重點係仲有人肯行出嚟question件事」。
普通襲擊有什麼刑罰?
無論如何,使用暴力令人受傷,隨時要負上刑責。根據香港法例第212章《侵害人身罪條例》第40條「普通襲擊」,任何人因普通襲擊而被定罪,即屬犯可循簡易或公訴程序審訊的罪行,可處監禁1年。根據《侵害人身罪條例》第39條,任何人因襲擊他人致造成身體傷害而被定罪,即屬犯可循公訴程序審訊的罪行,最高可處監禁3年;而即便受害人聲稱「同意」或「自願」,若涉及實際身體傷害,普通法一般不承認同意此等暴力作為合法辯解。