的士電子支付新法例今日（1日）生效，所有的士司機必須提供至少一款二維碼及一款非二維碼電子支付工具。實政圓桌召集人、前立法會議員田北辰今日實測過後，引述的士司機表示，因為信用卡要收手續費，所以除了信用卡，其他支付工具都有齊；不過由於部份乘客只使用信用卡，「都掙扎緊裝唔裝好」，擔心如果接受信用卡支付，乘客不接受手續費，「唔肯畀都唔知點算好。」

田北辰指出，現金「濕漉漉，又唔衞生，又傳播病菌，冇理由再用㗎嘛」，有朋友嫌坐的士付現金又要找贖，十分麻煩，「寧願叫網約車，乾手淨腳。」今日終於千呼萬喚，的士必須提供至少兩種電子支付方式。

他今日做乘客實測時，一上車就問司機係是否接受所有電子支付工具，「司機就話因為信用卡要收手續費，所以除咗信用卡，其他都有齊。」他引述對方表示，由於部份乘客一定要用信用卡，「所以而家都掙扎緊裝唔裝好。如果裝咗，惟有同嗰客解釋要收手續費，但如果嗰客堅持唔肯畀都唔知點算好。」

他再問司機如果真要收手續費，到時收錢時要計數，會否十分麻煩，「司機話要計都咁冇辦法架喇。睇嚟呢方面，政府都要諗計幫吓啲的士司機喎。」

有司機擔心八達通將來亦會收手續費，田北辰引述八達通稱，「得到嘅答案係『持續唔收』。」亦有司機向田北辰指，對人手入銀碼感到麻煩。田北辰引述八達通指，現時新車的咪錶有方法連接八達通機，舊車咪錶需要車主優化才能接駁。

田北辰又提到，有司機表示若乘客使用內地支付寶，會無法收款。不過他表示，在Facebook發文後，即收到支付寶方面聯絡，澄清接受內地支付寶付車費，「咁各位司機留意吓喇，試真啲部機係可以用到內地支付寶。」