【周末午夜場】《大鬧天宮》阿凡達班底 荷里活價錢拍出本土風味

撰文:許育民
出版:更新:

明日(11/2)下午,翡翠台會播出鄭保瑞執導,甄子丹、周潤發、郭富城主演的《西遊記之大鬧天宮》(2014年1月30日上映)。
該系列來到今年仲有第三部曲《西遊記女兒國》,據聞會係最終回。其實首部曲上畫時都係威係勢,唔單止卡士強勁,就連幕後製作團隊都號稱搵到製作《阿凡達》的特技公司參與,你睇唔睇出先?

《西遊記之大鬧天宮》雲集甄子丹、郭富城,不過當年城城就做牛魔王。(劇照)
東海龍王由內地演員劉樺演繹,不過更應該講明由谷德昭配音。

識睇要睇特技

《西遊記》劇情都唔使多講,大家都耳熟能詳,除非你好似星爺當年咁玩前世今生,不過你又唔係星爺,再者星爺去到近年親自執導的《西遊》系到,都已經變唔出咩花樣。所以鄭保瑞執導呢系列,重點都不在劇情,係賣電腦特技。

當日《阿凡達》係特技嘅一個重要指標,搵到佢哋做都唔會差得去邊啦(個心諗)!點知就出奇地令人驚訝,特技畫面粗糙夠地贏親切,而且真實感欠奉就夠晒港式科幻,能夠以荷里活價錢,整出木地土炮級的貼地製作,心思可取。亦可能係咁,在內地大收10億人民幣票房,愈拍愈有。

梁詠琪飾演嫦娥,最後原來係何潤東飾演的二郎神變出嚟。

真心推介東海龍王一節

就以東海龍王個皇宮為例,除咗張龍椅同幾隻大貝殼係實物外,其他都係綠幕加CG炮製,假到有種虛幻飄渺感覺。成個皇宮畫面又單調得只有一片藍,應該係想大家感受藍色的層次有幾多種,亦可以專心番留意劇情發展。至於本來要模仿在水中動作的演員們,扮咗幾下後就變番活動自如,呢個設定相信係要展現孫悟空可以快速熟習水壓的能耐。

不過全場最好睇係飾演劉樺的東海龍王,唔係呢位內地演員演得好,係負責配音的谷德昭配得妙。佢將東海龍王演繹成一個虛偽、無句真、做事求求其其嘅人,結果就俾孫悟空無意中整蠱咗,仲拎走埋佢支定海神針。其實劇情嚟講真係唔知做緊乜,單憑谷德昭將角色配到有番啲性格俾佢,靠把口吹水吹贏荷里活特技。