神奇女俠姬嘉鐸幫華為做代言錯用iPhone出文　女英雄都犯人類錯誤

因為一套《神奇女俠》（Wonder Woman），令女角Gal Gadot姬嘉鐸成為DC之光，影壇新一姐。人紅自然有人搵佢拍廣告，早前內地手機品牌華為（HUAWEI）就大使金錢，搵嚟姬嘉鐸做代言人拍全新一輯廣告。姬嘉鐸都好識做，廣告出街就在自己Twitter上載短片，可惜咁有交帶嘅舉動就出埋咗佢。

事源姬嘉鐸為華為拍了最新廣告後，一盡代言人之誼，將廣告片上載到自己Twitter戶口，咁自動自覺認真抵錫。不過唔使一陣，個Post就被發現有極大漏動，在貼文詳情入面，有網民見到該Post是由iPhone貼出。

有見事件有發展成公關小災難的意向，於是在短時間內姬嘉鐸的團隊已經重新出過一個新帖，並透過公關向外解釋，其實姬嘉鐸本人好喜歡使用HUAWEI P20，仲有Mate10 Pro，但基於影片檔案太大，至改由團隊幫忙發帖，才出現今次的錯誤。言下之意佢真係華為粉絲，不過咁樣又係咪唔該講出華為嘅缺點，上載唔到大片上社交平台呢？算啦，不如我哋睇片算啦，唔好咁介意用咩手機睇。