【翠絲】袁富華得獎成金馬最高收視 返港獲鄧萃雯贈驚喜感動落淚

撰文:洪曉璇
出版:更新:

今屆台灣金馬獎中,香港代表袁富華(Ben)憑電影《翠絲》獲頒最佳男配角,更成為整個頒獎禮中最高收視環節。根據轉播單位台視統計,當晚每分鐘收視最高點,落喺袁富華獲獎並以粵語致詞,收視率達5.20,超過350萬人收看。興奮過後袁富華已經返港繼續工作,同鄧萃雯、林德信拍攝新戲,劇組趁機為佢慶祝,令Ben哥忍唔住喜極而泣。

袁富華返港後,馬上為ViuTv新劇《婚內情》開工。

袁富華(Ben)返港後立即為ViuTv新劇《婚內情》趕工,夥拍鄧萃雯、林德信大鬥演技。攝影師更「加餸」慶祝Ben哥得獎,袁富華笑指已收拾心情,為新工作做準備:「一返到香港就要排舞台劇,之後咪嚟呢度開工,工作都未停過,不過係開心嘅。雖然第一次同雯女合作,不過大家都有講有笑,已經唔記得當中的疲累。」袁富華就話未諗加片酬,隨緣圓滿「主角夢」:「緣份到自然有啦,其實之前都拍了部電影做主角,不過未上映,一切都係等緣份到,我本身好鍾意做戲,所以有冇獎都唔緊要,最緊要有戲俾我做。」

劇組「加餸」慶祝Ben哥奪獎,可見佢人緣真係相當好。

拍攝途中雯女突然送上蛋糕慶祝袁富華得獎,大讚對方為港爭光,Ben哥忍不住喜極而泣:「咁鬼馬!唔怪之得未cut機就入嚟啦!搞到我喊晒又要補妝!」鄧萃雯更大讚對方專業,放心跟對方鬥戲:「因為佢係舞台劇演員,佢哋有個習慣就係會做足功課,嚟到現場見佢準備十足,所以我放心同佢夾唔同火花出嚟。」

拍攝期間雯女拎出蛋糕,令Ben哥相當驚喜。
雯女突然送上蛋糕慶祝袁富華得獎,大讚對方為港爭光,Ben哥忍不住喜極而泣。

新劇與鄧萃雯、林德信首度合作,袁富華大讚有火花:「第一次同雯女合作,因為大家好肯傾,因為我舞台劇出身,好著重排練搵火花,搵最好的演出方法。(拍完有冇得放假?)冇啊,因為我哋做舞台劇,拍完就要埋位閉關排戲,所以一直做落去。」

+2