【果欄‧黃嘉樂‧專訪】北上發展遇公司財困 獲TVB拯救做親生仔

撰文:
最後更新日期:

《果欄中的江湖大嫂》終於大結局了,劇情發展其實有不少催淚位,尤其是勇哥(黃嘉樂飾)死去的時候,小狼女(馮盈盈飾)的爆喊演出,多麼動人。其實黃嘉樂在今次劇中也是發揮出色的一人,飾演一名退隱的江湖大佬十分入形入格,能夠演繹出這種唏噓的江湖味,當然人生也要有如此的經歷。

曾經在訓練班出來後便一帆風順,可惜自己年少氣盛並沒有好好把握,在TVB打滾多年依然只是做「細佬」的角色。毅然北上中國發展,正當打響名堂之際,卻又因為經理人的問題而前途盡毀。好在這時娘家TVB一個電話,嘉樂立即像抱到了救生圈,重回香港,更首次簽下TVB的經理人合約做親生仔。

不經不覺,嘉樂已經入行17年。(林迅景攝)

黃嘉樂,相信有收看TVB的人一定會認識他,說到底,他在TVB已經17年了。由2001年到現在,他從訓練班出來後便一直維持著年年有劇上,但原來當初入行並不是自己的初衷,他說:「我當時做電訊業,有一日,藝員科有個電話壞咗,就叫咗我上去整。上到去個藝員科嘅人拎咗份表問我有無興趣讀訓練班,可能嗰時比較小鮮肉feel啩?但當時我係拒絕咗嘅,自己都唔係立志入演藝圈,雖然有做兼職模特兒。到佢第二次又問我,咁我嗰陣又後生,受唔住引誘,就入咗行。」

訓練班出身之後,其實有在《皆大歡喜》做過跑龍套。(林迅景攝)

雖然重戲份,但當年一個新人又點會好識做戲,所以很自然地經歷滑鐵盧。回想的時候,他說:「其實做路人甲係有好處,你先知啲鏡頭擺位,自問唔係天份高嘅演員,當然係撞板多過食飯。好彩當時所有前輩都無俾壓力我,仲好耐心咁教我。無奈天資有限,嗰時錯失咗好多機會,開始做返路人甲嘅角色,一段時間之後開始覺得自己做緊咩呢?我同自己講要努力喇喎,嗰時先覺得自己係真正起步。終於做做吓等到有機會做《青出於藍》,好專心好勤力,因為一路拍一路個劇本都寫緊,當時小青姐慢慢加咗我嘅戲,之後亦都拍咗幾部小青姐嘅劇,就一路到而家。」

人大了,回想的時候,總會覺得年青時做得不夠好。(林迅景攝)

在2011年,嘉樂做了一個對自己事業有很大改變的決定,便是北上中國尋機會,更簽下當地的經理人公司,他說:「因為嗰段時間我已經做咗好多『細佬』嘅角色,嗰時已經有好多監製或者觀眾已經入咗腦,我就諗點做先可以令到人覺得我有轉變。而咁啱出面又有出面嘅經理人公司搵我,話會喺大陸開幾多劇,咁我就心動,結果我就簽咗。但因為嗰間公司出現咗啲問題,我係要同我當時嘅經理人不停喺北京叩門試鏡,用咗一年時間,其實我無所謂嘅,因為演員試鏡係一個好合理嘅行為。終於得到一個機會,就係《媽祖》,都算係多戲份,第一套之後就開始打開咗大陸嘅缺口。坦白講,你唔夠知名度,除咗不停試鏡,如果唔係都幾難話一定有劇開,除非打咗個缺口。」

打開缺口後,卻無以為繼。(林迅景攝)

+11
+10
+9

不過拍完《媽祖》後,他在中國的發展便停滯不前,但卻不是因為自己的問題,他表示:「當時經理人比較貪心,因為《媽祖》係中央電視台拍,雖然而家無咁勁但始終係全國性。佢就拎住呢樣嘢開個價就有啲過份,開成一倍有多,成十萬一集,《媽祖》嗰陣我只係幾萬,我已經好開心㗎喇。就係因為呢件事,我覺得當時嘅經理人係浪費緊我嘅機會,你睇好我唔係問題,但唔好開天殺價。我都同佢講不如拍多幾套,等多啲人識我先,之後拍咗少少大陸、台灣電影,簽咗約俾人始終都係人哋控制。整段時間就係兩三年左右,但當時間公司喺最後一年因為資金周轉不靈,但我仲有一年約,嗰年就搞到好慘喇!(大陸)又無工開,TVB又以為我走咗,爸爸嗰時又身體唔好,好徬徨。」

兩邊公司都無糧出,點算?(林迅景攝)

好在,這個時候娘家TVB拋出了一個救生圈,適時拯救了這個迷途的小伙子,「其實舊經理人公司係有月薪,但去到後期開始唔準時,大獲喇,咁大個仔都未試過咁樣,嗰陣TVB份約亦唔係月薪制。好彩嗰陣佢唔同行最後一年合約,有啲嘢真係好感恩,嗰個時間才叔(梁材遠)就打嚟叫我拍《守業者》,我即刻答應咗。我仲問才叔可唔可以包我多啲戲份,咁就多啲錢,捱過咗段真空期,之後就簽返TVB,第一次簽經理人合約。」回想起這段經歷,絕對是一個變幻無常的人生,難怪黃嘉樂在《果欄中的江湖大嫂》飾演勇哥時,可以如此入戲了。

其實佢都幾型棍。(Instagram圖片)

+6
+5
+4

【果欄.專訪】馮盈盈親口同媽媽講對唔住 叮囑男朋友要生性

【果欄‧黃浩然‧專訪一】因為患病令他轉變:以前我係唔注重休息



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。