譚杏藍參加斷食營獲重生 7天激減5kg:成個人Refresh咗!

撰文:
最後更新日期:

譚杏藍(小花)4月19日出發到台南參與斷食營,透過7日斷食斷聯的生活,為身體排毒同時仔細審視自己的身心靈,學習活在當下。小花在出發前在自己的個人社交媒體留下了幾個疑問:「這7天會發生甚麼?身體會出現怎樣的變化?愛吃如我受不受得了?會有怎樣的感悟?」經過7天的斷食營,小花在25日回到香港,便跟《香港01》記者分享了自己在斷食營當中的經歷及體會,以解大家對斷食營的好奇。

小花根據營長的囑咐帶着輕鬆的心情出發,起飛前社交媒體寫下:「很多的未知,一點點緊張,大大的期待。清理一下,回來再見!」(Instagram)

為什麼想去?

其實小花參與斷食營是忽發奇想:「今年年頭有一日夜晚剪剪下片,夜闌人靜嘅時候好想搵啲挑戰畀自己,碌碌下Facebook就見到有Friend Share咗斷食營,然後搵咗好多資料睇,因為我係行動派得好緊要,之後即晚就報咗名。」

參與這件平常人覺得難以立定決心去做的事,小花其實出自於好奇之心,想體驗一下、挑戰一下:「我身體本身都多病痛,見到斷食營三日半唔食嘢係Reboot(重新啟動)個人,我就想試下,睇下幫唔幫到個身體,希望可以健康啲,因為我已經踏入要養生嘅年紀。」除了斷食難,斷聯都好難:「我都聽聞話7日冇電話用,佢哋會沒收電話,作為城市人都好想挑戰下:究竟我可唔可以放低部電話7日?個世界冇咗我7日會有咩唔同嘅轉變?」

小花透露斷食營營長十分環保,所以她出發時要帶備自己的日用品,不用即棄物。(Instagram)

出發前⋯⋯

小花表示自己在出發前都有不少擔心:「我個人好虛!去之前一個禮拜就開始驚,我唔食嘢一日都餓到發脾氣,因為女仔好易一肚餓就發脾氣,驚自己發脾氣、驚自己心情唔好、驚會冇力、驚會胃痛,其實好多擔心。」她坦言男朋友趙善恆(恆仔)同樣擔心,但最後選擇都讓她放膽去做:「由此至終我想做咩佢都由我做、放任我做,佢都知道我『束縛不來如人馬座』,最緊要顧掂自己就得。」她對於即將到來的挑戰有着一籮籮的擔心,卻因為朋友們的質疑,堅定了決心:「我報完之後好多人都叫我算吧啦,冇可能㗎!啲人越係話我唔得,我就更加想去、堅定我要去嘅決心。」

小花稱參與斷食營的照片會在Facebook逐天分享,影片則需要一些時間去剪,主要想大家注重健康。(Instagram)

要斷聯卻放不下

在斷食營期間,禁止使用手機和電腦,小花說:「其實我第一日去到、一入到屋企佢已經收咗我部電話,我連最後一句都講唔到。我好記得嗰晚係失眠,諗咗好多屋企、做嘢,有好多嘢都好似未搞掂,諗好多嘢、好放唔低!」日常有太多事情要處理,想要完全放下談何容易:「第一晚失眠,去到第二日已經認命,同自己講要慣,佢真係唔會派返畀我,一於試下啦,一場嚟到就感受下;第二日就不停同自己講要放低凡間嘅嘢,上咗山就好似升咗仙咁。人生有幾可會放低電話7日?而家有機會就試下啦。」

斷食過程甚艱辛

萬事起頭難,小花憶起斷食最辛苦的是在營中的第二天:「焗完蒸氣浴有強烈嘅肚餓感,全身冇力,原來都係排毒嘅表現,身體開始反映一啲嘢,每個人都唔同,我就全身發軟,淨係想攤喺到,涼都唔想沖,一路上堂一路寫嘢,回過神原來我寫咗好多食物名喺本簿到,太掛住嘢食,最記得係蛋炒飯加粟米,肚餓到極點,係咁飲水忍埋佢、又逼自己瞓覺。」最難戰勝的其實是自己的心魔:「最緊要係戰勝自己嘅魔鬼,嗰到嘅主人係隨時準備咗黑糖薑母茶,如果真係餓到頂唔順係可以飲少少,老實講我係可以去廚房偷偷地飲,但魔鬼同天使就喺到對打,最尾都克服到。」

小花和斷食營營長合照。(Instagram)

斷食營每日日程

5:30起床
做早操
在山裡散步(流汗也是排毒的一種)
做瑜珈、靜坐
飲檸檬鹽水2000CC(2公升)
閒話家常(休息時間)
開始排毒(積聚的毒素)
小睡片刻
補充水份1000CC(全日最少要3000CC水)
上健康知識課
活動(敷火山泥幫皮膚排毒、看電影、人生或心理課、行玉井山)
做瑜珈、靜坐
上健康知識課
10:00睡覺

為身體排毒

小花去到第三天已經適應了斷食營:「第三日已經克服咗,零肚餓、勁精神,唔食嘢反而仲精神過平時!」而當中最神奇的是:「斷食斷咗咁多日,每一日都係不停有嘢屙,好暢順每日去6至8次,以前積咗好多年嘅嘢,排出嚟嘅嘢係前所未有見過!好得意唔同形狀都有,有啲直情係食物嘅形狀:墨汁、貢丸、珍珠奶茶、泥沙、朱古力碎片、橙色、啡色、黃色、液態、稀嘅、咩都有!好刺激,你見到原來自己身體裡面有咁多嘢一直冇被處理,好彩排到出嚟,如果唔係可能之後好多病。」

小花又分享了一些健康貼士:多睡覺、多喝暖水!如果便秘的人,早上可嘗試喝1500-2000CC檸檬鹽水,最重要是排完便後要喝多些水補充能量。

第五天復食

小花在經歷完斷食營後更加珍惜食物:「頭四日係斷食,第五日會復食,要慢慢畀個胃習慣返有嘢落肚,第五日就飲返啲流質嘅嘢,有三餐但每餐最多200ml果汁或者蔬菜汁,第六日晚餐有半嚿豆腐加素肉鬆,我記得食豆腐嘅時候係眼濕濕,好好味,我未試過咁好味嘅豆腐!最後一日就有素食大餐可以食。」

體會完的感受

當記者問到斷食還是斷聯比較難受,小花說:「肚餓難頂啲!因為我好為食,仲好拆得!一餐可以食三四碗飯。」不過這個挑戰比想像中來得容易:「我Expect會更難捱,我以為自己會嘔,但比我想像中舒服,雖然三日唔食嘢,但原來好精神,而家有重生嘅感覺,個人Refresh咗。」小花還想再去一次:「一年返去一次其實都係好事,始終離開七日都唔係短,要處理好好多嘢先過到去,希望下年再過到去。」

小花再次打開電話有五百多條未讀訊息,第一時間回覆了關於工作的,之後打電話給媽媽報平安,再打給另一半,不經不覺就到機場。

生活中的改變

經歷完整個斷食營,最明顯的改變是體重,小花說:「輕咗5kg,我諗嗰5kg都係啲毒素。」她亦更注重健康:「最緊要係出返嚟城市點控制自己食得健康!返到嚟想食啲好清嘅嘢,唔想食啲濃味嘅嘢;我都係煲咗啲蔬菜湯,烚下菜、粉絲、豆腐;好掛住媽咪嘅蛋炒飯加粟米,以前媽咪成日煲嘢我哋都話唔飲唔食,以後佢煲咩整咩我都會食!」

回到香港,生活也是時候回到日常,小花坦言:「仲適應緊,(26日)第一日回歸工作,今日啲同事都話我慢咗,我就試下第二個方法去生活。真係要放慢腳步,先會睇到更加多嘅嘢,處理事件嘅成效會更高。」

點擊下圖觀看小花其他靚相:

+21
+20
+19


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。