【全民造星II】網民鬧節目粉碎參賽者夢想 花姐︰你要嬲我冇辦法

撰文:
最後更新日期:

上年ViuTV舉辦的大型選秀節目《全民造星》搞得有聲有色,成功製造了兩隊男子組合Mirror和Error,更加為節目帶來了一班「鐵粉」,所以今年ViuTV再添食,炮製《全民造星II》。節目還是在面試階段尚未出街,就已經惹來不少話題,最近有網民有網上討論區發文話有朋友去參加《全民造星II》的面試,但遇到的經歷就「完全粉碎了他的夢想」,鬧爆製作組。

上年ViuTV的選秀節目成功打造了男團Mirror,為香港樂壇帶來新氣象。(資料圖片)

留言的網民指覺得朋友「樣雖然普通但係勝在身材高大」,而且覺得朋友的聲線和歌聲都不錯,更加將朋友在社交平台上的發文截圖轉載至討論區,朋友的發文大致有兩點︰第一是指等候面試的時間大會寫到是約2-3小時,但最後就等了6個多小時,更因等候太久而令到表演的時候表現失準。第二是指覺得評判們是想引導參賽者講出對方想要的答案,再揶揄你幾句,扭曲你本身的意思,然後他又稱看到其他參賽者被評判們的評語打擊自信等等。而發文的網民就覺得節目只會看重外貌,而漠視參賽者的才能,而且節目應該要尊重參賽者,直指不是一個電視台適當的做法。

網民在網上討論區貼出朋友對《全民造星II》的批評如上。(網上圖片)

《全民造星II》節目監製花姐兼評審之一的花姐接受《香港01》記者訪問回應有關指控,對於參賽者等候時間長方面,她指今年的而且確較去年用更多時間去面試參賽者,她說︰「因為其實我哋都會拍佢哋casting嘅,今年嘅參賽者全部都好文靜,唔同上年嘅,比如上年我哋通常預5分鐘一個,咁今年啲參賽者全部都好內向,咁除咗唱同跳之外,我哋都會同佢哋傾偈,因為我哋係真人show嘛,想喺傾偈嘅途中知佢哋嘅性格係點,所以今年係難啲嘅,就over咗(時間),直程加多咗一日casting。其實我哋都有打電話畀啲參賽者話『不如改第二日啦』,有一批就改咗星期一,有一批就想堅持繼續等,嗰日最夜係cast凌晨到3點幾4點。時間其實係喺我哋預計之外嘅。」她又解釋因為時間緊逼的關係,之後又要training又要拍MV等等,而且參賽人數眾多,比起上年的人數多了很多,所以以致參賽者等候時間長的情況。

相隔一年的時間,早前ViuTV為《全民造星II》做公開招募,引來一群有意成為藝人的年青人報名參加。(資料圖片)

另外,關於評判對參賽選手的評價方面,被問到是否真有其事,花姐坦言該名網民所引述朋友的遭遇未必是她負責評審的一部分。不過,她都解釋其實節目拍攝手法跟上一季一樣,而她直認自己說話風格都比較「倔」,跟上一季沒變,「佢哋入嚟,我覺得有咩唔妥,我就直接話畀佢聽,比如有啲人就咁著件底衫一條短褲就嚟casting,我會講『你見工都唔會咁樣見啦,我哋呢度選偶像,你叫我點樣選你做偶像』如果呢啲我唔知係咪叫引導佢啦,我只不過係將佢嚟casting嘅態度直接講出嚟,我自己覺得我唔係冇禮貌,如果佢有睇《全民造星》嘅話,佢就會知我嘅風格係咁樣。我哋係嗰種直接話畀佢聽得唔得,比如佢話『我覺得自己最有魅力囉』,咁我哋咪叫佢可唔可以做佢覺得最有魅力個樣出嚟,咁如果你覺得咁樣我哋都係畀個圈套你踩,咁我諗唔係囉,從來我嘅節目裏面,都冇諗住傷害任何人。但我都同啲參賽者講『我哋係咁直接,如果你接受唔到,就唔好參加呢個比賽』。」她解釋就如上年的節目一樣,並不是故意為了「make noise」為節目效果而這樣做。

花姐指除了公開面試的一天於午夜12點完成,其他的日子,最早都於凌晨1點完成,最夜更去到凌晨4點。因為收到超過1000份的報名,他們都想盡量「見得幾多得幾多」。(資料圖片)

雖然花姐就話只是直接將參賽者的問題指出,但其實接受程度人人都不同,會否怕參賽者有hard feeling,而上網作出不好的評價,花姐回應︰「我唔怕hard feeling啊,如果上網講唔好嘅嘢,其實我上年都已經俾人鬧爆。今年casting有時我都會好直接講『你個樣又唔得,唱歌又唔得,跳舞又唔得,又冇做preparation,又走嚟casting,咁你哋覺得你哋有幾尊重自己?』咁我覺得我咁樣講係好直接嘅,但係其實我依家就係要點醒呢班年青人『你唔好以為你有夢想就乜都唔做,就可以嚟做明星㗎嘛』,有啲參賽者可能即時黑面嘅,但係我嘅立場就係,我係用咗一個好重嘅語氣同佢講,但係我心裏面係想話畀佢聽,想教佢哋,『其實你咁樣做,永遠都唔會成功』,你要嬲我冇辦法,我只可以道歉,但係我最終個節目係想為一班人好。」

對於網民的指控,花姐一一回應。(資料圖片)

對於節目組只看重外表的指控,花姐就指其實他們的準則是根據外表﹑唱歌﹑跳舞和性格去衡量,即使有一方面不足,有另一樣是比較突出的,而也要想一想不足的一方面能否有改善的空間,才會選他入圍。她坦承第一眼的感覺重要,「但係講真其實又有幾多個真係一見到『嘩,真係好靚仔啊,好似姜濤咁』其實都唔會好多嘅,不過講真我都好著重呢樣嘢嘅,我望落去嘅觀感好唔好,但係呢個真係唔係最重要。」

點擊下圖睇吓公開招募當日部份參賽者的圖片︰

+13
+12
+11


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。