【專訪】每周一次出入富豪飯堂「福臨門」 程可為:好普通之嘛!

撰文:
最後更新日期:
所謂鼻頭尖小而無肉,飲水都中劇毒;又所謂顴骨高挺又凸露,老婆就猝死黃泉路。
《流氓皇帝》春媽

「程大姑」,是無綫資深演員程可為(Rainbow姐)的暱稱,近20年在無數TVB劇集中飾演例如媽媽、大嬸、三姑六婆、師奶等的角色,又稱「御用阿媽」。其實現時68歲、出道47年的可為姐在演藝事業起步之時,是無綫力捧之一的花旦。Rainbow姐於1972年參加第一期TVB藝員訓練班,與甘國亮、許詔雄、蘇杏璇等為同期同學。1975年,Rainbow姐更與趙雅芝、楊詩蒂、莊文清以及高妙思合作拍攝劇集《乘風破浪》而備受關注。

點擊睇吓Rainbow姐嘅靚相:

+3
+2

連廣告都係做阿媽!

觀眾早前除了可以在無綫劇《福爾摩師奶》看見Rainbow姐的演出外,在「微辣」亦可以發現其足跡。Rainbow姐獲「譚仔」邀請,與微辣合作拍攝了一段劇情短片,皆Rachel劉蘊晴飾演母女,同時亦在「譚仔」任職侍應。為了演活「譚仔阿姐」的神髓,Rainbow姐更在開拍之前學習「譚仔話」,其後又以「譚仔話」與Rachel合唱、rap了一曲:「rap歌我都係第一次,算係好彩嘅係我自己本身喜歡唱歌,下意識都跟到啲韻律。」

點擊睇吓Rainbow姐點rap:

Rainbow姐話拍攝當日有好多「師父」教佢講譚仔話。(梁碧玲攝)

演足20年媽媽:唔可以話求其噏完就算數!

近20多年,Rainbow姐主演媽媽、大嬸的角色,她說:「公司覺得我似先安排咁嘅角色畀我做啫!(所以而家演阿媽係易如反掌?)又唔可以咁講嘅!有啲媽媽都要勢利啲,唔可以話求其噏完就算數,始終都要放啲感情,上文下理,要貼合返個劇情,唔可以咁羞家,話晒都係無綫訓練班第一期!叫就叫做大師姐!」其實Rainbow姐無論是演慈祥的人母、狠毒的皇后、諸事八掛的大嬸均能駕馭,不過現實中認真的她,收起笑容,樣子卻非常嚴肅,她說:「係呀,我稍為眼神一望,佢地(同事們)都怕怕哋我,因為係一種好嚴厲嘅眼神。」

唔笑嘅Rainbow姐個樣真係幾惡。(梁碧玲攝)

媽媽有千萬種 「做一世阿媽都唔會厭!」

曾經聽過很多演員說過,大部分都希望自己所演出的角色能夠多元化,盡可能不會重複,然而,演過無數次媽媽的Rainbow姐卻從不厭倦:「點解會厭啫?角色係唔同嘅媽媽,有唔同嘅個性,唔同嘅環境。如果你做一個媽媽嘅角色都話厭,咁你點喺呢個電視圈企四十幾年呀?都走咗好耐啦!」能稱得上為「御用」,換個角度是一個實力的肯定,然而Rainbow姐卻不以為意:「我覺得我唔係一個好成功嘅演員嚟,我唔係咁叻,不過係叫做好彩過到骨。我內心都話我聽,唔好諗要攞咩獎,我覺得好失禮,你畀咗我,我都覺得醜,我唔係要呢啲嘢,至於能力係咪真係咁好呢?就見人見智啦。」

雖然Rainbow姐自認演技麻麻,不過觀眾都好鍾意佢,專訪當日有後多人找她合照!(梁碧玲攝)

Rainbow姐:「我至憎結婚!」

雖然Rainbow姐做足20年阿媽,但現實中她卻從未成家,沒有結婚、並無兒女。提到這個話題,Rainbow姐即突然表現激動:「我至憎結婚!你唔好同我講結婚,我而家咁老都唔想講結婚喇!我唔鍾意嘅,我唔覺得係一種幸福。你未必揀到一個啱嘅人,大家嘅意想一樣,又要大家對住對方而唔厭,人嚟㗎嘛,生活過得太平淡佢哋就會想搵刺激喇!(男人?)我又唔敢咁講,我唔批評人哋,總言之唔好搞咁多,簡單啲,而家咪幾開心?」

Rainbow姐笑言自己將母愛放在愛犬身上:「真係好似多咗個小朋友咁!驚佢凍又畀佢著件冷背心,熱喇又幫佢開冷氣你話我係咪好似養緊個人仔咁呢?我又會喺度諗,係咪我前生欠你好多呢?人我都未肯服侍,但就猛咁服侍你!」(梁碧玲攝)

移民後轉行做地產

1983年,當年33歲Rainbow姐芳華正茂,但她卻突然移民加拿大:「我記得我細個嘅時候,阿媽三日唔埋兩日就寄生油又或者其它嘢,寄衫呀,講唔出嘅嘢都寄返內地畀舅父㗎喇!我都冇概念究竟係咩嚟,應該就係冇先叫我哋寄,如果第時1997收返香港又會好似內地咁,我哋喺呢度食慣嘆慣,咁咪好大煲?」Rainbow姐並不戀棧名利,作為家中大家姐的她,為了弟妹前途和學業,毅然放棄演員事業,息影移居加拿大:「我轉咗做地產經紀囉!(做地產經紀……)開心,好開心!因為嗰時啲人個個都係慕名而嚟,個個都知道『程可為』三個字,知道我係TVB藝員,啲人去到嗰邊人生路不熟,睇報紙睇到我個名就嚟搵我買屋,咁我咪有生意囉!」

事隔三十多年再回顧當時的移民決定,Rainbow姐並不後悔:「我覺得帶咗屋企人去,啲細佬又讀到書,緊要過我喺TVB做到藝員嗰啲所謂嘅風茫、風光。咁我又唔係死咗,我可以再做㗎嘛!」(梁碧玲攝)

否認係富婆? 「福臨門」好普通之嘛!

外界一直有傳,程可為是富婆一名,與當年人稱「Benz雄」的許紹雄齊名,但她不是駕名車回電視城工作,而是經常出入「富豪飯堂」之稱的「福臨門」:「其實好普通之嘛,你唔使餐餐食嗰啲魚翅呀鮑魚嗰啲㗎嘛?食小菜都得㗎嘛!(真係當飯堂?)飯堂又唔係,一個禮拜一次左右啦,富翁就日日食,不過我唔係!其實我係一個好鍾意享受嘅人,就算我賺咗$1,000,我都可以大膽食$700。」Rainbow姐平時不用工作,最喜歡找個環境舒適的地方嘆杯咖啡,享受平淡人生:「唔係咁你想點呀,跳高、跌低又再跳高咁呀?唔好玩啦,平淡啲嘅人生係享受嚟㗎,唔好咁癲啦!」

Rainbow姐寄語:「『生、老、病、死』係必經嘅,只係希望病唔好咁多,死就易過啲,容易啲,咁我就已經覺得好感恩。」(梁碧玲攝)

專訪當日Rainbow姐還分享了很多人生態度:

+4
+3
+2


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。