《教束》程人富拍微電影做男主角 戲飛$300半小時售罄:會加場

撰文:
最後更新日期:

時間過得太快,由陳志發監製、黃智揚執導的ViuTV劇集《教束》轉眼已播畢一個月,到底「馬修書院」一眾師生最新近況如何?

「盧Sir」(盧文達)劉俊謙剛剛完成一套新戲的拍攝;「林副校」陳秀雯將會與毛舜筠、戚美珍等4位女藝人擔任賈思樂演唱會嘉賓。「Bonix」鍾雪瑩繼續在「叱咤903」的主持工作,最近和「王天城」(凌健熙)、「啞同學」麥可怡一同拍攝可樂廣告,而「啞同學」又與「會長」唐浩然參演王貽興、劉翁編導新劇《黑市》;「為食妹」鄧麗英較早時間則和「小野」盧鎮業合拍一套以喪屍為題材的片集。

「腎仔」岑珈其向來是「接Job王」,在《教束》後,於游學修自編自導的《仇老爺爺》飾演小春,其後他將會與張建聲、陳健安@C AllStar、193@ERROR、保錡@ERROR以及「小占」英健朗,一同拍攝ViuTV新節目《港男入贅手冊》。至於另一位「接Job王」是「莊子」周漢寧,繼續保持一定曝光率,除了有份與文雪兒和李璨琛合演港台劇集《星星的孩子》外,8月底更會在舞台劇《但願人長久》裏,飾演謝君豪的兒子。

而在《教束》裏相當搶鏡,很多觀眾笑他似彭健新的「狗榮」程人富,則回到自己有份經營的YouTube頻道「小薯茄」日常拍攝工作,與幾位拍檔 ── 阿冰、呀J(Jeffery)和童童繼續大放笑彈。此外,他有份主演的微電影《男兒Don't入樽》,已於周六(10/8)在九展星影匯舉辦放映會和粉絲見面會,套裝票價雖然定價$318,但公開售票僅半小時便沽清。

《教束》「莊子」拍港台新劇演自閉青年    周漢寧:發脾氣最難演!

《男兒Don't入樽》8月1日賣飛,結果半小時內便售罄,雖然只有100個座位公開售票,但男主角程人富承認沒有想過觀眾反應如此熱烈,並承諾會在稍後時間加場,假如銷情依然理想,就會用其他方法讓更多人看到這套微電影。「但而家就未諗,如果真係好多人有反應嘅話,有機會會將成條片擺上網都未定。」(劉智源攝)

程人富一直以成為喜劇演員為人生目標,他坦言參演《教束》對其「星途」有很大幫助。「套劇播出街之後,係Feel到多咗人識我,以前我拍『小薯茄』短片嘅時候,有啲觀眾會喺下面留言叫我『程人富』,咁喺《教束》之後呢就多咗人嗌『狗榮』,呢班人可能係本身睇開『小薯茄』,但又有睇《教束》覺得『狗榮』好抵死,亦都有機會係純粹睇咗《教束》,而去睇番『小薯茄』。」(《教束》劇照)

《男兒Don't入樽》是一個關於理想和麵包的故事,三位男演員分別是男主角程人富(右)、呀J(Jeffery,中)以及肥蚊(左)。(受訪者提供)

《男兒》切合「小薯茄」理念 ── 平庸之輩齊心都可成大事

程人富日前接受訪問時指,《男兒Don't入樽》雖然都是由「小薯茄」團隊負責拍攝,但製作規模和影片長度皆有別於以往作品。「通常我哋啲片大約長2至5分鐘,如果係Vlog就會超過10分鐘,而家《男》就45分鐘左右。」這套作品之所以出現,是因為由其母校香港浸會大學傳理學院電影學院創立的「創意電影製作高級文憑」,於2018年為慶祝成立十周年而舉辦「十載.電影夢」活動,「所以我哋學校就搵我哋去拍條片,係講『追夢』,但我哋又唔想講番拍電影,於是就用打籃球呢個題材。」

《男兒Don't入樽》是一個關於理想和麵包的故事,劇情講述男主角的程人富(程人富飾),是一個完全沒有打籃球天份的年輕男生,偏偏他視成為職業籃球員為人生目標,「而呢個角色係有少少不切實際,佢覺得自己就算冇天份,但只要去做好多關於籃球嘅工作,咁樣努力撐落去,維持自己同籃球嘅關係,終有一日可以成為一個職業籃球員。另一方面,程人富係同兩個朋友夾錢租屋住(呀J、肥蚊飾演),但因為佢做嘅嘢搵唔到錢,於是兩個Friend只好幫佢畀住租,直至去到某個位,因為呢兩個Friend嘅工作都出現問題,去到呢一刻,佢被迫認清呢個事實,我喺呢套戲入面就一個咁嘅人。」程人富說的「現實」,不僅僅是講如何維持生活,而是大家都是平庸之輩,「要成班人一齊先會做到啲嘢!」

所以這就解釋了,何以會有《男兒Don't入樽》這個劇本,「我哋『小薯茄』就係一班咁樣嘅人,我哋嘅宗旨係一班唔係咁叻嘅人可以聚埋一齊,做到一啲好好嘅嘢,呢套片係有少少表達到呢個諗法,正如戲入面3個男仔亦唔係好叻,之後嘅劇情會講佢哋參加籃球比賽嘅時候,佢哋會用啲騎呢嘅招數去做到某啲嘢(成績)出嚟。」

游大東其他《教束》文章:

你可能不知道的《教束》20件事 導演黃智揚親揭劇本漏洞

【教束.專訪】劉俊謙入行前以運動員心態做戲 老師陳淑儀一句話擊碎自尊心

【教束.專訪】入行40年演技好有原因   陳秀雯公開秘訣:最緊要有筆記!

《教束》登陸加拿大7.14首播   劉俊謙:這是屬於香港人的故事!

問到今次拍攝《男兒Don't入樽》最大的挑戰,程人富說不是製作時間上的趕急,而是拍攝打籃球的動作場面。「我打籃球比較渣,出到嚟個效果真係核突嘅,所以導演就要好辛苦咁,要用一啲鏡頭,去影到我好似識得打籃球咁,但我要強調,我係識得基本功夫嘅,唔係話完全唔識,只係唔叻,哈哈!」(劉智源攝)

曾在《教束》飾演梁文海校長的「智叔」廖啟智(圖中),今次在《男兒Don't入樽》擔任監製。程人富說:「上次我同智叔喺《教束》只係得群戲,今次就邀請佢客串演我老竇,但都只係隔住電話對戲,話我打電話返去舖頭問佢借錢!」(受訪者提供)

門票開售半小時沽清 加場日子還看香港局勢 

《男兒Don't入樽》去年10月開鏡,程人富直言過程相當趕急,「由創作到拍攝,成件事Within一個月內搞掂,期間『小薯茄』的日常運作更幾乎全部停頓!」眾志成城,這套微電影總算趕得及在活動舉行前「起貨」,當時仍然沒有籌辦放映會,程人富解釋:「呢件事係之後先決定咁做,點解呢?因為我哋真係落咗好多心機去拍,由於當時(10周年活動)《男兒Don't入樽》放映係學校活動,唔係對外公開,好多『小薯茄』Fans睇唔到,於是我哋就決定搞一次放映會,等更多人可以睇得到,亦當係第一次嘅Fans meeting,始終Fans睇得多我哋整嘅笑片,都想睇下佢哋鍾唔鍾意我哋拍嘅微電影。」

放映會已於周六在九展星影匯舉行,只此一場,每張戲票連紀念品標價$318,結果8月1日下午3時公開售票,開售僅半小時,100張套票悉數售罄,程人富直言喜出望外。「賣之前嗰一刻都仲喺度諗,究竟係咪真係會有人捧場?始終我哋啲片向來都係免費,如果搞一個活動要收錢,唔知啲Fans係咪覺得OK呢?結果去到當日下晝3點半已經賣晒,好多人留言,多數都係話:『買唔到飛呀!』,唔係好多人講價錢問題,我都估唔到大家咁捧場。」反應如此熱烈,加場是意料中事吧?「應該會加場,可能加一場,等啲親朋戚友一齊嚟。」但何時加場?還要看看「反修例」運動的發展。「而家未定(何時加場),應該都會過多一排先,睇下到時香港嘅局勢會唔會穩定番啲。」程人富說,倘若觀眾對《男兒》的反應持續升溫,不排除會在網上公開作免費播放。

《男兒Don't入樽》由「小薯茄」兩大台柱 ── 程人富與童童飾演男、女主角。童童在網上人氣強勁,facebook專頁和Instagram的粉絲人數分別超過2.8萬和6.2萬,除了外貌較實際年齡年輕得多外,其身高也是焦點,程人富等人更不時以此開玩笑,童童曾公開表示:「我係一個151.45cm矮嘅人!」(受訪者提供)

圖中兩位身穿藍色球衣的仁兄好像有點面善,原來是《教束》裏飾演「奇行種」的余家溢(中間靠左)以及有份參加《全民造星II》的麥朗廉(中間靠右)。程人富說:「佢哋兩個其實都係我哋浸大電影學院High Dip嘅師弟,所以搵咗佢哋幫手,扮演籃球比賽嘅對手。」(受訪者提供)

程人富在《男兒Don't入樽》飾演完全沒有打籃球天份的程人富。「成件事都係講追夢,但唔想又講番拍電影,於是就用咗打籃球做題材。」(受訪者提供)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。