【專訪】馬天佑自稱是Slash 接觸時裝全是緣份︰冇諗過做呢行

撰文:
最後更新日期:

關於馬天佑(Mayao),第一個聯想起的詞語相信會是時裝,畢業於倫敦時尚學院(London College of Fashion)時尚品牌創建學系的他,讀完書後就順利成章地在時裝造型界發展,不過有誰會想到原來他讀Fashion只是因為當初學業成績太差?又有誰會想到他創立形象顧問公司原來只是因為一副塔羅牌?

攝影︰梁碧玲

短片︰黎家浩﹑顏漢真

剪接︰顏漢真

Mayao現時公司的工作主要是替藝人找合適的衣服,跟品牌合作,令到品牌或藝人給人的感覺有提升。(梁碧玲攝)

因成績差沒選擇而時裝 卻誤打誤撞建立興趣

Mayao形容自己是一個Slash(斜槓青年,意指︰選擇有多重職業及身份的生活的年輕人),主要在時裝界發展的他,近年也加入音樂界做歌手。講起當年讀時裝,大家可能會以為他是一出生就想吃這行飯,但他卻說︰「從來都冇諗過做呢一行,點解入咗fashion學校係因為細個讀書好差,差到入咗一間好遠嘅大學。」不過他卻很想在倫敦讀書,有一天見到倫敦時尚學院收生,收生要求是不用看成績,只是要見校長,由他決定取錄與否,他當時心想︰嘩,Fashion?咩嚟㗎?只是抱著試試的心態,但出乎意料地,跟校長談得來,立即已給他學位的offer,他的心裏想的是︰好啦好啦,為咗倫敦。一開始不是懷著滿腔熱誠地去讀,「其實嗰時我對fashion係完全一竅不通,所以都叫誤打誤撞下學咗個新嘅興趣。」

Mayao指蕭亞軒是他的兒時偶像,沒想到人生第二張為唱手的做art direction的唱片就是她的。(梁碧玲攝)

「膽粗粗」拿著12000元開公司 一步步走到現在

創立自己的形象顧問公司原來也是同樣地隨機,Mayao當時讀完書回港並沒有刻意找工作,想先發掘一下,怎料一頓飯又改變了他的人生,當時他跟好友吳雨霏(Kary)吃飯,對塔羅牌有研究的DJ夢妮妲也在席上,為他占一下前程,結果對方說︰「你一定要自己開一間公司,一定要同娛樂圈有關嘅」當時連商業登記也不懂的他毫無頭緒,「可能因為嗰時啱啱畢業,又唔怕死,開始咗我嘅公司。」回想當時,他也覺得非常大膽,「嗰陣時我銀行戶口係有萬二蚊,我好記得商業登記要六千蚊,我用六千幾蚊登記咗間公司,仲有六千幾蚊,我仲請咗三個同事,嗰時我冇諗過cash flow﹑出糧,真係好好彩,我一開咗公司,身邊有朋友知道我做呢個business,跟住就畀好多工作機會我哋。」猶記得他人生第一張做Art Direction的唱片就是吳雨霏的《我本人》。慢慢地,由一開始跟同事在咖啡店,在公園開會,到後來有了office,一步一步走到現在。

每次出席活動都要襯不同的穿搭,而且大家可能會expect更多,Mayao笑言不會視之為壓力,「我會享受get ready嘅過程,試衫嘅過程,呢個溝通合作嘅火花我會享受。」(Instagram@mayaoo)

自認私底下「褦襶」 放工後也是普通人一個

時裝給人的感覺好多時都是高高在上的,不是普通人接觸到的東西,而且藝人們一定都會對自己平時的衣著一絲不苛,不過Mayao就覺得並不一定如此。「如果你問我fashion係咪一定要用好多貴嘅items去堆砌出嚟嘅話,其實絕對唔係啊!」他說︰「你mix & match個功力可能係重要過你攞到啲咩items喺手。」他指自己平時出席不同的活動都會著不同的衣服,但私底下的他可以用「褦襶」(音︰呢啡)來形容,「我返office,差唔多日日都著同一套衫,同一對波鞋,同一條褲,條褲從來都唔洗嘅」他又說︰「我相信唔係淨係我啊,相信好多藝人都係啊,因為當你每次做嘢嘅時候要用咁多時間去化妝整頭著衫,其實放咗工同大家都係一樣,都係普通人。」

可能大家會覺得愛時裝的人都會很輕易買東西,但Mayao指自己是一個精明的買手,購物有兩大原則︰一是之後將會有用的衣服,二是「返著」的次數會多或者實用的衣飾。(梁碧玲攝)

+13
+12
+11

家庭提供合適環境發展︰少咗份擔憂

雖然Mayao創業的路亂打亂撞,但卻幸運地順利,被問到他的家人有沒有幫忙,他直言︰「冇㗎,完全冇,同埋我屋企人係到而家都唔係好知我做緊乜。」甚至他一直也在家拍片更新個人的Youtube頻道,近來他的爸爸才問他︰「其實你平時喺屋企拍嗰啲係咩嚟㗎?」講到家人,外界一向有傳言指他家境富裕,是一名「富二代」,Mayao對此連聲否認︰「絕對唔係𠻹啦,係嘅我唔使撈啦!」他說︰「屋企畀到一個好好嘅環境我,令到我少咗份擔憂,但係講真喺我嘅事業上面又冇話有任何類型嘅support,但係我覺得咁樣仲好,畀我冇得失敗,其實佢哋咁樣嘅一個做法係令到我更加去堅持我做嘅事情。」

除了自己的公司,Mayao也有Youtube Channel拍片跟大家分享不同事,而且更新進度也頗頻繁。(Instagram@mayaoo)

偏愛流行曲 音樂作品有背後信念

除了時裝界的發展,Mayao自2015年推出第一首歌《搞破壞》後,就接連有不同的音樂發展。原來他從小已經喜歡唱歌,父親是拉二胡的,而母親唱京劇,他笑言︰「細個喺呢啲好嘈嘅音樂下長大。」8歲開始迷上流行曲,不過父母就不太想他聽,於是他背著父母接觸流行曲,更愛上唱歌。而經過這麼多年流行曲的洗禮,他現在希望有一個訊息帶給聽眾,「我希望我嘅音樂作品可以畀到一種confidence畀人,有陣時唔係話一定要做一個完美嘅人先至係好。」他續說︰「你有缺點係冇問題,只要你肯去面對佢,去接納自己嘅缺點,你先至可以做一個更完整嘅人。」

Mayao表示︰「希望大家睇到影像嘅畫面嘅時候,可以令到我個音樂作品更加立體。」(受訪者提供)

點擊下圖睇吓更多MV拍攝的花絮︰

+4
+3
+2

四首歌的音樂企劃 系列靈感來自樂九十年代樂壇天后

Mayao在今年推出了兩首歌,分別是《超過些》和《大妄想家》,四首歌的音樂企劃來到一半,他指已推出的兩首歌感覺較繁榮,而編曲上想帶出夜晚的感覺,他解釋︰「我希望呢個系列係充滿城市嘅感覺,我希望有種city vibe可以做到。」原來關於這個系列,他的靈感來自1988年林憶蓮的唱片《都市觸角》,他說︰「嗰隻唱片我而家聽返,係聽到好有一種香港嘅感覺﹑味道,我好希望可以create返咁嘅感覺嘅系列出嚟。」至於另外未推出的兩首歌,Mayao就形容為感覺比起上兩首會舒服點,「城市嘅另外一面,當城市唔係咁擠迫嘅時候係點㗎呢?」這是他想帶給大家的畫面和感覺。

點擊下圖觀看更多Mayao日常的造型和生活照︰

+13
+12
+11


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。