專訪|投資不需複雜 中原博立紅猴、Larry:買好股票,一路揸!

撰文:
最後更新日期:

增長股波動率極高,大升大跌,把持不住的投資者往往會提早放出股票,錯過長期升勢。中原資產管理投資總監簡志健(Michael)說,其管理的投資組合「唔會做短線」,他指股價升跌只是一種噪音(Noise),並強調一間公司無可能永遠都上升,過程總有跌盪,「投資好簡單,其實唔需要複雜,真係好嘅股票,一路揸住佢,直到佢唔好為止。」

簡志健說,無論幾好的公司,包括上市累升數百倍的騰訊(0700)或亞馬遜(美:AMZN),亦無可能永遠上升,「中間回調兩、三成係等閒事,就算唔係股災或者金融危機,都會無端端跌兩成。投資係好簡單,買好嘅股票,揸住佢。過程之中要不斷對公司有信念,信念源於對公司嘅認識,認同佢增長,而唔係買完揸住就算。」

他續指,騰訊和亞馬遜過往股價亦很大波動,中間非常多噪音,「如何渡過?視乎對公司嘅認識,有咩股價郁動,業績和新聞了解一下,會否影響揸住公司嘅基本面,增長係味無變到想像中咁高,競爭優勢無想像中犀利,失去咗(優勢)先會沽,否則股價波動,基本上我哋唔會理。」

中原資產管理投資總監簡志健(Michael)說,投資很簡單,只需一直持有好的股票。(區嘉俊攝)

固守能力圈 不作技術分析

除了不做短線操作,兩人亦不作技術分析。中原資產管理投資總監洪龍荃(Larry)指,沒有花時間研究技術分析,「要澄清唔係覺得呢套嘢唔Work,而係我哋唔熟悉,呢個亦係巴菲特所講嘅能力圈。投資世界同功夫一樣,每個人都有自己一套,我哋能力係長期觀察公司發展。」

他又透露其每日工作流程,每天早上6點幾起身(簡志健更早),開始看市場新聞,8點左右回到公司,會召開早會,與同事匯報各自追蹤公司的公告和事件,9點半港股開市,簡單睇盤後,便會開始每日的研究工作。他說,即使回到家裡,都會不斷研究和閱讀,「成日俾老婆鬧太專注,每日花嘅時間多到唔知點形容」。

中原資產管理投資總監洪龍荃(Larry)指,二人不做短線操作,也不做技術分析,固守長線觀察公司的能力圈。(區嘉俊攝)

懶理短期逆轉 豐富投資想法

然而,增長股大上大落,眼見原本賺取50%的回報,眨眼間只賺得20%,甚至倒蝕,投資情緒應該如何處理?洪龍荃說,「中原博立」的使命宣言是「將投資者和優質股票連繫在一起」,當股價出現波幅時,便會提醒自己該初衷,「唔係唔使理,而係唔好比Daily(每日)股價影響對公司的中長期判斷,有時市場逆轉,刻意唔睇股價,花時間繼續睇多啲書,豐富自己嘅想法,尋找新機會。」

美國大選走向成為近期股市的焦點所在,但兩人貫徹懶理噪音的投資態度。簡志健明言,從未因大選而改變任何投資策略,「大選可能中間有波沒動性,如果睇幾個星期,企埋一邊唔參與係最好,但如果以年計去睇一件事,呢一兩星期係味真係影響投資市場?我覺得未必係。」

他重申,投資增長股的過程,最艱難就是不斷看不同資訊,「但係中間其實無咩做,唔需要買買賣賣,睇圖,宏觀都唔係咁緊要。如果搵到好嘅管理層,任何難關都會渡過,美國大選可能帶來短期震動,但管理層都會識走位,令公司繼續成功。」



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。