APEC深圳直擊|馬時亨專訪談美民主黨衝擊AI貿易:洗濕頭唔可能停
2026年亞太經合組織(APEC)領導人會議本周在深圳拉開帷幕,中美元首今年第三次聚頭,貿易戰、關稅問題繼續成為焦點。代表香港工商界出席會議的貿發局主席馬時亨,在深圳接受《香港01》專訪時相信今次APEC深圳會議為兩個月後的進展成果鋪路,皆因貿易戰「休戰期」延長至明年1月。適逢美國民主黨取得兩院多數控制權,馬時亨相信中美會面氣氛繼續良好,笑言美國總統特朗普最近「都冇乜特別狂言」。
不過,馬時亨表示美國民主黨如果對AI發展不太熱衷,可能令佔本港整體出口總值逾半的半導體出口表現受影響,「如果佢哋態度係咁呢,唔排除出年我哋貿易額係會低咗啲」。即使部份AI公司投入減少,他深信AI熱潮不會消滅,只是可能會拖慢,「個頭就肯定係洗濕晒,所以唔可能話聽日就停」,對出口表現維持審慎樂觀態度,對貿易仍然抱有信心。
中美元首將在APEC峰會碰頭,習特今年互訪已達成共識,包括300億美元對等降稅、貿易戰「休戰期」延長至明年1月,商界預料今次中美元首碰面未必有突破性成果。
中期選舉後習特會 馬時亨料氣氛較之前更好
正在深圳APEC峰會的馬時亨接受《香港01》專訪時表示,預料今次中美元首會面氣氛良好,不過未必有特別事情公布,相信APEC期間的會面,是為明年1月公布關稅措施進展鋪路,「上次特朗普喺華盛頓對我哋主席亦恭亦敬,今次我覺得主席都會禮尚往來,大家氣氛應該好好」,尤其是本月民主黨在中期選舉取得參眾兩院多數席位,「我覺得反而可能佢仲要好啲喎,如果唔係點樣返去交待啊」,笑言特朗普最近作風變得柔和,「你睇佢最近都冇乜特別狂言」,下一步觀望12月中舉行的2026年二十國集團邁阿密峰會。
民主黨兩院制衡特朗普 馬時亨關注明年AI貿易額或減少
中美關係好轉,國家主席習近平與美國總統特朗普,將會在APEC深圳峰會舉行今年第三次會面,不同之處在於民主黨在兩院制衡特朗普,對香港經濟有何啟示?馬時亨表示民主黨被視為對人工智能(AI)不太熱衷,不排除影響香港貿易額。
翻查資料,受AI基建與相關科技需求帶動,半導體、記憶體晶片及電子產品成為香港出口增長的核心動力,市場對半導體及電子零部件的需求持續暢旺,帶動香港出口增長動能增強, 2026年首8個月香港出口比去年同期增長高達42.5%。
如果佢哋(民主黨)嗰個態度係咁,都唔排除出年我哋個貿易額係會低咗啲嘅。
馬時亨:AI 浪潮唔會消滅 有啲拖慢都仍然好勁
馬時亨認為受影響也可以理解,因出口強勁主要受惠於量多、加價,「美國 AI 整個行業,特別係經過 Nvidia 事件之後,可能有啲公司都唔會使咁多錢,可能就會 slowdown(減慢)」,繼而令貿易額數字可能會減少。
始終 AI 係一個潮嚟嘅,呢個潮亦都不會消滅嘅,一定會繼續嘅。不過可能有啲拖慢咗,但仍然都係好勁嘅。
馬時亨對明年貿易額前景保持審慎樂觀態度,深信不會很差,因為始終AI行業仍然繼續,「個頭就肯定係洗濕晒㗎啦,所以唔可能話聽日就停㗎嘛」,所以對貿易仍然抱有信心,「佢唔會無咗㗎嘛,可能一半裡面少5%、15%,唔係話太犀利嘅,都仲OK嘅」,出口量不及今年亦可以理解。