【通便可樂？】可口可樂Plus加入膳食纖維相等1條番薯 味道竟...
撰文：蔡欣恩
出版：更新：
春天實在太短，旋即又踏入炎熱夏天，最透心涼飲可樂必定係其中之一。不過每次飲都有好多健康顧慮（最主要係怕肥），如果話你知，可樂入面加咗膳食纖維，可以抑制餐後脂肪吸收，你係咪會飲得心安理得啲？
可口可樂Plus味道係點？（蔡欣恩攝）
+1
呢罐白色包裝嘅「Coca-Cola Plus」上年已經喺日本首先推出，尋日正式登陸香港！ 每罐（330毫升）有5.2克由粟米的提粹嘅膳食纖維，即係相等於一個大蘋果或一條中型番薯；樽裝（500毫升）嘅膳食纖維仲有8克咁多，相當於2條大香蕉，有助減慢糖分攝取同減少脂肪吸收，仲對腸道健康好有幫助，唔怪得有人幫佢改名叫「通便可樂」啦。
通唔通便就唔知，因為小記冇便秘試唔到，不過個味呢……就有少少令人失望。「好似放咗好耐嘅可樂」呢個係編輯嘅評論，簡直一矢中的，佢最大問題係唔夠氣，好似開咗半日漏晒氣！甜味同Coke Zero一樣，甜得好假。同原味最大分別在於佢冇咗汽水獨有嘅碳酸味，所以飲落好似飲糖水咁。
結論：以健怡角度嚟講，呢罐Plus比起Coke Light、Coke Zero多咗膳食纖維（成份表列為「難消化性糊精」），按可口可樂公司嘅說法，係可以減低餐後嘅脂肪吸收。不過以味道嚟講，始終都係飲原味最爽。