母子到高級日本餐廳慶生日 請全店吃蛋糕 食客未主動道賀即發火

撰文:卡洛兒
出版:更新:

生日最緊要高高興興,但要求陌生人主動祝褔自己,就未必太奇怪!有網民分享指,日前與朋友光顧中環1間高級日本料理餐廳用餐,同場有對母子正在慶祝生日,並請全場客人吃蛋糕。樓主原打算離開時才道謝,沒料該港媽突然發難,取走其蛋糕,並怒罵「你哋唔鍾意我個仔,件蛋糕我會揼咗去,唔駛你哋食」,令氣氛相當尷尬,樓主被大掃雅興,唯有急急腳離開。

有網民分享指,日前與朋友光顧中環1間高級日本料理餐廳用餐,同場有對母子正在慶祝生日,並請全場客人吃蛋糕,但卻發生令人尷尬的事情。(FB「生仔要考牌系列」圖片)

該網民投稿至facebook專頁「生仔要考牌系列」,指上周五(6日)與朋友2人光顧中環某間高級Omakase日本料理餐廳,全場只能容納12名客人,售價為3000至4000元1位。用餐期間,餐廳經理突然拿來2件芝士蛋糕,稱是坐在最遠那枱的1對母子正在慶生日,「多咗嘅蛋糕請我哋食」,樓主當時已吃飽,但基於禮貌沒有拒絕,由於該位客人中間隔着5至6位食客,遂打算離開經過時才道謝。

惟樓主繼續與友人相談甚歡時,經理突然上前打斷對話,邀請她們向生日的客人道賀,「不如你哋講聲生日快樂?」,樓主與友人當場呆一呆,此時其他客人即大聲高呼「多謝晒呀!Happy Birthday!」。其後該名以闊太裝扮的港媽卻發難稱,「今日我個仔(貌似16至17歲)生日呀,所以請埋你食蛋糕,我可以揼咗佢」。樓主為息事寧人,即向對方表示歉意,「唔好意思呀!頭先見你哋傾緊計。生日快樂呀!多謝晒」。

再過一會,樓主與友人又聊得興起之際,港媽竟再度發難,帖文形容她「 旋風式走埋嚟,伸手拎起嗰兩件蛋糕」,並充滿敵意地表示,「你哋唔鍾意我個仔,件蛋糕我會揼咗去,唔駛你哋食」,令現場氣氛瀰漫一陣尷尬,樓主和友人都再呆掉,滿腦「黑人問號」,開心飯局亦瞬間得無癮,唯有急急埋單離去。臨走時,經理充滿歉意地不停表示「真係唔好意思,我都唔知講乜好」。

該名以闊太裝扮的港媽卻發難稱,「今日我個仔(貌似16至17歲)生日呀,所以請埋你食蛋糕,我可以揼咗佢!」。(《親親我好媽》劇照)

樓主在帖文中慨嘆,「我哋同你係陌生人,有乜嘢鍾意同唔鍾意嘅點?我哋做錯乜?我哋餐飯又唔係你俾錢」,又質疑怎樣做才能令港媽滿意,「你想我哋做乜?同你個仔唱生日歌?你個仔生日其實唔關我哋事。唔駛我哋七星拱照咁圍住佢賀佢生日吓嘛?呢度又唔係你包場同你個仔慶生」,最後更諷刺稱「我心中只默默祝福佢仔仔將來嘅老婆」。

帖文引來網民嘩然,有人揶揄「要幾寂寞先迫陌生人一齊慶祝生日」,又指港媽舉動令人誤以為會請全場吃飯,批評她非常騷擾,「打擾人吔食飯仲毫無廉恥去發人脾氣」,亦有網民指基於衛生問題,應直接婉拒蛋糕,「疫情嚴重,直頭可以拒絕佢個蛋糕啦!三唔識七」、「一班人冇戴口罩,在嘻嘻哈哈笑聲中,加埋壽星仔吹啖氣去整熄蠟燭,我真心唔敢食」。

你可能感興趣