Law師奶|林定國妻出新書 來生盼再做港人 冀盡快消弭黃藍之爭

撰文:
最後更新日期:

如果人有來生,你會選擇再做香港人嗎?香港大律師公會前主席林定國太太、筆名「LAW師奶」的袁淑明律師(Sheila)接受《香港01》專訪時,斬釘截鐵地說——「一定會」。

有人說香港已經「爛晒」,亦有人讚嘆小城「好靚」,Sheila認為兩方面均不容忽視,縱然本港社會氣氛低迷,不同陣營劍拔弩張,新一波移民潮蓄勢待發,但Sheila希望港人可從不同範疇重新審視香港,「日日咁俾人踩,我條氣唔順囉,香港係咪真係咁差先!」

作為香港一份子,Sheila希望消弭黃藍之別,年輕人不再主張「攬炒」,當權者正視新一代困境,彼此「坐底傾下」,共同打開溝通之門。

(專訪二之一)

首次著書的Sheila早前出版《來生再做香港人?》,坐在放滿法律文件書架前受訪,Sheila自言她既是法律界人士,亦是一名師奶,笑言「我出咗法庭買魚都會俾人呃」,因此構思「LAW師奶」這個筆名。

香港大律師公會前主席林定國太太、筆名「LAW師奶」的袁淑明律師著書,用數據道出「香港係咪真係咁差先!」。(盧翊銘攝)

「香港有無咁差?想寫本書為香港人打氣!」

丈夫林定國是消委會主席,新書亦頗有消委會風格,「想用數據由淺入深,做一個香港格價表」,透過搜集不同數據,從衣、食、住、行、法治、政制等不同範疇,將香港與全球城市比較,道我城的優與劣,年初落筆之時,經歷反修例風波,面臨新冠肺炎疫情,「過去一年,香港日日被踩到不堪入目,我哋有無咁差先?我想寫本書為香港人打氣!」

香港社會事件陰霾未散,加上《港區國安法》立法,移民潮再一次成為閒話家常的話題。袁淑明1987年升讀大學一年級,是《中英聯合聲明》簽署後的3年,面臨九七大限,Sheila憶述,當時社會瀰漫一股移民風潮,大學老師常說「你好可憐,畢業就失業」、外國媒體一律以「香港玩完」作報道、尖子為求海外「搵食」追捧工商管理學(BBA)為「神科」、不少法律系同學棄讀PCLL離港。

+2
+2
+2

「時代係咁,好完就壞,壞完就好」

畢業不久,Sheila毫無懸念當上律師,惟大學成績不標青,只能在小型律師樓上班,加上工作不算順利,處處碰壁,曾試過開口得罪客人,婚後萌生移民念頭,「我哋去紐西蘭旅遊,見到好多高爾夫球場,好多綠草好多羊,開始討論係咪要移民,但我哋係律師,唔通同羊打官司?要賣紀念品?我唔願意囉,當刻同先生你眼望我眼,移民念頭好快打消咗,決定返去搏一搏,你問驚唔驚?人人都驚啦!」

倆口子決定留港生活,就開始儲錢置業,雖說當年比現在較容易「上車」,但提到買樓Sheila心如刀割地說:「買完即刻遇到九七大冧,乜咁大整蠱呀。」九七金融風暴後到2003年沙士,之後本港經歷一段經濟復甦期,「有人等收割卻遇着呢個時候,我唔會怪後生仔累我……歷史係不斷循環,信心危機亦一樣,只係估唔到我要面對第二次,依個係階段性問題,我有信心會變好」。

Sheila淡淡然說道:「時代係咁,好完就壞,壞完就好,好日子大家都識過,係咪衰就要放棄頭家?依家係有不明朗,但其實好多數據睇到,香港唔係咁差。」

「香港得返兩隻色,好似茶餐廳剩返奶茶及咖啡」

雖說香港比不少國際城市有優勢,但黃藍之爭已佔據日常生活,全城高壓是不爭事實。Sheila以茶餐廳做比喻,「香港得返兩隻色,好似茶餐廳剩返奶茶及咖啡,我哋曾經無咁歧視,好靈活好包容……其實有無機會係兩邊都啱,只係期望同方式唔同?不如大家坐底傾一傾啦」。

溝通固然是最好的解決方法,但如何打開溝通之門,才是關鍵。「師奶」Sheila突然變回「律師」,一臉嚴肅,儼如身處法庭上語氣堅定地指出,首要營造氣氛,當機會來到,就是正確時間,「但我擔心現時年輕人用犯法手段(爭取),輸咗係要付後果,希望年輕人明白,問題唔係想像中咁易解決,如果換咗個人上台就得,外國一早搞掂,邊個攬炒邊個都唔好」。

袁淑明律師希望消弭黃藍之別,年輕人和當權者「坐底傾下」,共同打開溝通之門。(盧翊銘攝)

籲當權者:世上沒有無緣無故的恨

同樣地,Sheila希望當權者能明白世上沒有無緣無故的恨,樓價高、供樓壓力大、堅尼系數高、缺乏上流機會等等都是年輕人面對的困局,「好多年輕人卡咗喺中間唔上唔落,佢哋嬲唔係無理由」。「土地問題」無疑是一座大山,Sheila認為,收回棕地及農地開發等料面臨長年的司法覆核,見縫插針亦無助解決需求,倒不如大規模造地建屋,之後再一同解決各種分歧。

話到至此,Sheila又變回「師奶」,慨嘆任何顏色、立場的香港人,其實都是面對着同一個問題,「樓價咁高,我想更上一層樓都唔得,53歲仲拎一舊錢出嚟換樓咩?」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。