【同事友誼】可遇不可求的職場友情:請珍惜你的Lunch Buddies!

撰文:
最後更新日期:

香港人雖然幸福感偏低(工時長、樓價高etc),但其實要找少少「小確幸」依然係有的。其中一樣的個小確幸,正正係有一位或者幾個Lunch Buddies,令你每日期待Lunch hour,或者每星期期待星期五Happy Friday時的午飯時間。

其中一個小確幸,正正係有一位或者幾個Lunch Buddies,令你每日期待Lunch hour。(《愛.回家之開心速遞》劇照)

無論係食開Simply Life定元氣,或者係吉野家甚至茶餐廳都唔重要,重要的係幾個Lunch buddies在短暫的1個鐘午飯時間,運用Teamwork與不言而喻的默契,從等位到點餐,用最短時間令大家可以齊齊入座,然後天南地北無所不談:公司的新Project有幾鑊,老闆/上司/同事有多弱智,到某某中學時的Bitchy同學原來而家嫁咗個老闆級大叔等等。雖然話題大多係頗為負面,但可能就正正係大家much needed的宣洩渠道:Food in, complaints out,換來的是身心飽足的滿足感。

同真正朋友的話題,從來都無需包裝到自己有幾巴閉,而係可以將自己最真實最Mean一面表露出來。正如拍拖耐咗,再女神的女朋友同你出街都唔再化妝,彭于晏咁款的男朋友都會放屁撩鼻。

而且,同區返工的Lunch buddies,總有一兩個係「試新嘢」專家,次次都可以提議大家試某某新開餐廳,或某某雜誌介紹過日本新開過來的拉麵店,甚至係橫街窄巷的隱世粥店。有佢哋,你總可以放心,跟住老友輕輕鬆鬆食好西。

一班人,幾個朋友或同事,每日或每星期定時定候見面在老地方食Lunch,彷彿係一個Certainty:聽日同阿May食飯;星期五同阿余食Lunch,然後每週如是。反正,下星期又再見面。

所謂天下無不散之筵席,最好的Lunch Buddies也可能有結束的一日。(視覺中國)

然而,所謂天下無不散之筵席,最好的Lunch Buddies也可能有結束的一日。

無論係從前齊齊食大排檔的鐵腳同事,定係定期試新嘢的大學同學。始終有一天,可能係為咗更好機會,更高人工,或想轉下新環境,你或他轉工了,從熟悉的中環轉到灣仔或觀塘。突然之間你的好朋友雖然依然在FB與Whatsapp和你Share搞笑Link同潮文,但Lunch Buddy此情不再。

中午時間走在人來人往的皇后大道中,你獨自走到以前一齊食飯的餐廳,聽着容祖兒的一句「可惜這個城市裡 從今找不到你」,你有點茫然。雖然香港好細,但從前日見夜見的好朋友Lunch Buddies,大家的距離其實可以拉遠到以月來計,以後可能幾個月先見一次。正如豆腐火腩飯一樣:你看不透,人生究竟還有什麼可以掌握?

或許,唯一可以做的,就是珍惜今天的Lunch Buddies。找個機會告訴他:

有你呢位Lunch Buddy,真好。

All good things come to an end…?珍惜身邊的一切吧!

(原文轉載自StealJobs.com。StealJobs全面透露各行各業人工,工時,晉升前景,以及入行攻略,歡迎匿名提供收入資料。)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。