演戲跟踢球一樣 合作才能講好故事│人生導演課│冼振東專欄

撰文:冼振東
出版:更新:

幾年前,我以顧問身分去看一間小學排練一齣話劇。孩子們已排練了好些日子,大家都做得相當不錯。我特別留意一個幾得意的小男生。小休時,我特意走過去跟他說話。

文:冼振東

「你幾年班呀?」

「 …… 三年班。」看見一舊龐然大物走近,他顯得有點靦腆。

「你鍾唔鍾意做戲呀?」我笑吟吟的問。他一愕。當然啦,這樣問,難道答你「我最憎做戲」嗎?我微笑著等候。他尷尬的笑了笑,輕輕的搖了搖頭。

其實他演得不差,雖然只有三句對白,但他唸得大聲清楚,也知道自己在做甚麼。

我看著他,用浮誇的BB語氣問:「點解呀??」

他咧嘴一笑,微微低著頭。

「你覺得自己得三句台詞,好少嘢,係咪?」

他抬頭望一望我:「 …… 都唔係嘅 …… 」

一頓。我看見他身穿巴塞球衣,忽發奇想,問道:「你係咪鍾意踢波多啲?」

他用力地點頭,好像很開心我這樣問他。

「咁點解你咁鍾意踢波?」

「好玩囉 …… 射入咗,贏咗,好開心囉 ……」

「咁輸咗呢?一定會唔開心啦,係咪?」

他點點頭。

「但係一打比賽就會有贏有輸。輸咗,都無辦法,係會唔開心嘅。咁可以點呀?」

「練吓波,再贏返囉。」

「係喎!再努力啲練波囉!同埋大家一齊諗下點解會輸 …… 咁囉,係咪?」

Photo by Jannik Skorna on Unsplash

他笑著點頭,對足球的事顯然比較雀躍。

「你覺得呢 …… 踢波嗰陣,係咪個個都好緊要嘅呢?你嗰邊少咗一個,就好大機會會輸喎,係咪?可能呢,有啲人踢得無咁叻喎,踢咗好耐都只係掂到三次波,咁 …… 無咗佢係咪都唔緊要呢?」

「…… 都唔係嘅 …… 」

「係囉,話唔定嗰個同學雖然只係掂到三次波,但係可能佢踢出去俾另一個同學,嗰個同學先有機會傳俾另一個,再俾另一個,之後就入波!哈哈!咁囉!」

他笑了笑。我繼續說:「其實呀,同做戲係一樣㗎。你唔好覺得三句台詞唔緊要呀。無你嗰三句,個故仔咪睇唔明囉。睇唔明,同輸波係無分別㗎喎。」

他看著我,好像想我繼續說下去。

「落場比賽,就梗係想贏㗎啦,係咪?」我稍稍搭著他的肩膊:「但係做戲要『贏』呢,就唔可以淨係做戲喎,要『一齊去講個故事』!」

「 ……?」

「你想唔想用你嗰三句台詞,同其他同學一齊『贏』吖?」

他輕輕的點點頭。

「咁你就要記住,唔係淨係自己做戲㗎,係要同其他同學一齊講好呢個故事!」

他似懂非懂的想了一會。我再強調:「我哋大家『一齊』去講好呢個故事,好無呀?」

冼振東主演的舞台劇《正是這樣的生活》(資料圖片)

小休之後,再次排練。我見到他即使未出場,也頗留心內場同學的表現,彷彿在球賽之中,即使球不在他腳下,他也會很緊張賽事情況,準備當球傳到自己時,可以做到最好,一齊勝出賽事,就像在舞台上一齊講好故事一樣。

(專欄「人生導演課」每月刊出,標題由編輯撰寫,原題:「演戲跟踢球,是一樣的」。本文不代表藝文格物立場)

作者簡介|冼振東,明愛華德中書院助理校長(演藝),深信戲劇能成就全人教育,致力栽培學生成為自己人生舞台的導演:「導好自己・演好人生!」