開設手作廚房聘用自閉症員工 家有自閉兒媽媽:希望佢哋可以自立

撰文:
最後更新日期:

自閉症孩子長大後,往往都會在職場碰壁,要投入社會工作並不是易事。對於育有自閉症孩子的家長而言,最擔心的莫過於他們長大後能否好好照顧自己的生活。同樣育有自閉症孩子的媽媽Daisy和Jo開設一間專門聘用自閉症孩子的手作廚房「星星堂」,製作花茶、曲奇、午餐到會等,提供一個訓練場,讓孩子投身社會前預早適應。

「唔可能要出面嘅人遷就我哋嘅小朋友,一定係佢哋去適應個社會。我哋希望呢度成為學校同工作之間嘅橋樑,等佢哋明白返工係咩一回事。」

攝影:鄭子峰

因應性格分配工作

Jo和Daisy的自閉症孩子現年分別為18及23歲,兩位的兒子均在同一間小學就讀,因而結識。「大家都擔心子女長大後找不到工作,與其去求人哋請佢,不如我哋請返自己仔女。」Daisy憶述,她們於2013年創立「星星堂」,形容當時的經營很「山寨」。「喺屋企同小朋友做曲奇、蛋糕、月餅,賣俾朋友、網上接訂單。」Jo分享,2017年申請民政署的「伙伴倡自強基金」,得到資助,遂設立現時的工場,製作午餐到會、曲奇、新推出的手作花茶,以及正在研發的蔬菜麵。

+6
+5
+4

現時工場有4位長期員工,年齡介乎19至22歲,每年亦會定時聘請實習生,根據他們的性格和能力分配工作。「冇咁叻嘅,就教佢清潔、洗碗、去銀行入數;細心啲嘅,就幫手整花茶。」她們指,會不時與員工及實習生的媽媽溝通。「媽媽親眼見過佢哋工作,信任我哋,都好放心。嚟我哋度嘅小朋友都唔係太差,至少溝通到,做到嘢,但有時可能情緒管理唔太好,就會同佢屋企人傾吓,一齊合作幫助佢哋。」

就業常遇困難

Daisy坦言,開設工場的最大目的,是希望可以培養孩子的自立能力。「自閉症小朋友比其他人更難去適應職場,有些社交規則我哋自然會知,識得遵守,但喺佢哋眼中係冇呢啲規矩,只遵從自己內心去做事,所以好多人話自閉症孩子搵份工好容易,但做得耐係好難,做得多過3個月已經好少,就係因為佢哋太自我。僱主唔明白佢哋,工作做唔長,挫折感又會愈來愈大,就會收埋自己。」

+2

Jo補充:「返工要有規矩,要準時、聽老闆話,呢啲嘢對佢哋嚟講係好難,因為佢哋好有自己主見。要解釋俾佢哋聽,如果唔滿意,你可以提出意見,但最後決定一定係跟老闆。」她們坦言,不希望孩子於工場「長做」,反而是學習應有的工作態度,投身社會前裝備好自己。「唔係希望佢永遠留喺度,而係等佢哋唔好咁驚先。」他們觀察到,孩子經過一段時間的磨練,可見明顯進步。「佢哋開始理解人哋感受,自信心、與人相處方面,能力都高咗好多,都好安慰。」

寄語家長要放手

Daisy分享,孩子3歲時確診自閉症。「入咗幼稚園,知道佢同其他小朋友唔一樣,接受評估就知道有自閉症。知道自閉症原來冇得醫嘅,好痛苦,好似天塌下來一樣,擔心佢將來唔識照顧自己。後來明白唔可以成世唔開心,就睇有咩方法幫助佢將來自立。唔會追求讀書要幾叻,對佢哋嚟講係唔實際。父母唔喺身邊,佢都可以生存落去,就係我最大嘅希望。」Jo表示認同:「自理、獨立能力對佢哋嚟講係最重要,我哋死咗,佢都要自己照顧自己。」

Jo續指,很多人對自閉症孩子有誤解。「好多人覺得自閉症讀書好叻㗎喎,但其實係萬中無一。70%係有限智能或弱智,30%智能正常,可能有一個叫叻啲,但喺社交上都有困難。」Daisy亦指,家長對他們過分的要求,可能會影響孩子的自我形象。「隨住佢哋長大,其實都知自己有呢個病,如果你要求佢更叻,佢做唔到,就會自卑。」

她們認為,不少SEN家長的通病,是「把孩子照顧得太好」。Daisy分享,家長應多放手,讓他們嘗試,並花多點時間陪伴。「好多時覺得佢哋能力冇其他小朋友咁好,就盡量做多啲、幫多啲,對佢哋都唔係一件好事。盡量等佢哋自己嘗試解決,做錯唔緊要,以身作則,即時糾正。」Jo亦寄語:「唔好放棄希望,要堅持,相信佢哋會進步。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。