【掃毒2】劉德華古天樂世紀合唱 華仔大讚唱功︰佢睇小咗自己

撰文:沈洛嘉
出版:更新:

由邱禮濤執導;劉德華監製聯同古天樂、苗僑偉、林嘉欣主演的《掃毒2天地對決》將於7月16日正式上映,兩大影帝劉德華和古天樂首次為電影合唱主題曲《兄弟不懷疑》,相信除了兩人再度合作之外,這是給粉絲們的一大驚喜!

古天樂笑說今次合唱自己得0分,而劉德華就有100分!(電影公司提供)

劉德華︰「唱歌我都係業餘」
古天樂在去年跟謝安琪合唱推出了《(一個男人)一個女人和浴室》後,奪得「我最喜愛男歌手」,為他在歌唱事業上一吐烏氣。可能是唱出一份自信,今次古天樂再推出合唱歌,首次跟劉德華合唱《掃毒2天地對決》電影主題曲。當大家笑指他為樂壇注入新力量,古天樂笑言:「咁大件事?咁都好可歌可泣啦!唱歌我業餘嘅啫。」劉德華聞言也笑說:「我都係業餘到而家!哈哈!諗番起對上一首剛陽味重嘅歌,已經係好多年前同偉仔(梁朝偉)合唱嘅《無間道》,所以覺得市場都需要啲男性嘅音樂同歌曲。」

《掃毒2天地對決》講述劉德華和古天樂本來是一對好兄弟後來反目成仇。(電影海報)

古天樂最想知︰「華哥有冇聽過我啲歌呀?」
劉德華的歌曲陪着不少人成長,手上有大量音樂作品,面對這位前輩,在音樂上古天樂最想問華仔咩呢?古天樂笑笑口反問:「華哥有冇聽過我啲歌呀?」華仔即說:「有!我都聽過好多,但真真正正講個歌名出來真係幾難,哈哈哈!在錄音過程中,知道古仔擔心自己做得唔好,但佢睇少咗自己,事實上佢做得好好!我幾鍾意佢在這首歌唱『關係』嗰段,大家留意下!」而當古天樂聽到要為大家評分時,他即時笑說:「咁我一定係0分,而華哥就100分!」

古天樂在去年跟謝安琪合唱,奪得「我最喜愛男歌手」後,都一直甚少開金口。(官方圖片)

兄弟不懷疑
《掃毒2天地對決》主要講述雙雄之間的兄弟情,《兄弟不懷疑》的歌詞更是出自監製及主角之一的劉德華手筆,這份詞寫得耐唔耐呢?劉德華:「確實寫咗幾耐真係唔記得,幾日吧!寫嘅時候腦內諗住同古仔之間嘅兄弟情、亦有我自己戲內同其他兄弟之間嘅感情!其實份詞主要想講,兄弟之間太客氣,有啲嘢一早講出來就冇事,最後就變成懷疑大家,之前嘅感情開始變質。」問到對歌詞方面有冇俾意見,古仔就話:「佢哋有俾份歌詞我睇,我第一個反應係:『唔好玩啦!我都唔識唱歌,點俾意見啫!』」

至於問到他在錄音時,腦入面正在想甚麼來投入感情,古天樂:「諗起最後Ending 在地鐵內嘅畫面,十幾年嘅兄弟情,因為大家唔肯聽大家講嘢就冇咗。」如果想聽古天樂再次開金口唱歌,就一定要聽《兄弟不懷疑》喇!

直擊錄音過程

+7