港產片四大「渣男」戰力排名 第一位連曹查理都要做佢馬仔

撰文:
最後更新日期:

曹查理接受開電視節目《開工大吉77》訪問,引起大家熱烈討論。曹查理在港產片中向來飾演斯文敗類,簡稱「人渣」角色,所以他在《警察故事續集》一句︰「我係人渣中嘅人渣」咁有代表性。

其實在8、90年代的港產片,電影界的反派角色一樣出眾,除了四大惡人,人渣方面一樣有四大,部分成功轉型,部分就一直渣到尾,自成一格的金「渣」招牌。

「想偷我雞!」(《賭俠》影片截圖)

第四位︰單立文

對於單立文,大家首先會諗起《賭俠》嘅侯賽因,唔使電腦分析,就算攝埋支牙簽落去睇,佢都係百分之一百嘅衰人。先叫張敏做嘢搞到星爺冇晒超能力,之後仲想「抽水」。知道劉德華會打電話畀賭神證實自己身份,就捉咗龍五同三叔做人質,再加句︰「我尋晚打畀契哥戈巴卓夫又係冇人聽」,奚落對方,結局當然被賭聖加賭俠制服。其實拍《賭俠》前,單立文已經拍咗《聊齋艷譚》、《潘金蓮之前世今生》,三級片都拍過,所以其演出可謂無包袱,有咁賤得咁賤。不過後來豹哥入咗TVB,形象入晒屋,仲不時同太太放閃。

+4
+3
+2

其實睇吳啟華演衰人角色好睇過程至美。(《九品芝麻官》影片截圖)

第三位︰吳啟華

吳啟華在電視劇年代已經演奸角,《流氓大亨》就係其代表作之一。去到影圈,仍然保持其衰格而精湛演出,先在《最佳損友闖情關》遭質四大損友,然後又踏入三級片之路,《玉蒲團之偷情寶鑑》、《滿清十大酷刑》都深入民心,不過最多人記得都係《九品芝麻官》的方唐鏡,跟星爺的嘴炮堪稱港片經典場面,特別係一句︰「咬我食咩?彈出彈入喎,打我吖笨?!」用到今時今日。吳啟華將角色演得淋漓盡致,但點估到一個翻生,戴番副眼鏡就可以喺電視劇《妙手仁心》演程至美醫生,成為一代師奶殺手?

+3
+2

一句「我係人渣中嘅人渣」,賴皮到……(《警察故事續集》影片截圖)

第二位︰曹查理

曹查理絕對是港產片「人渣」角色的首選,他永遠去不到終極大佬的位置,就是身邊嘴多多的嘍囉,但每次出場都冇令人失望,唔令你憎佢都令你笑死。其中在《最佳損友》臭口奇,把口唔收仲臭過阿叻,就演得入型入格。

+16
+15
+14

(《精裝追女仔》影片截圖)

第一位︰翁世傑

剛才提到曹查理所演的角色,永遠去不到Big Boss級數,而翁世傑就往往是幕後大佬,又由於其外貌帶點淫邪,所以他在戲中的劣行離不開跟女色有關,最多人記得要數《精裝追女仔》,角色名都叫「趙定先」。戲中要撬周潤發牆腳,勢要追到張曼玉,當手下問佢點先為之追到手︰「梗係有朵花跌落地下畀我踩多兩腳嗰種啦!」完全是粵語長片催花情節。翁世傑拍過數十套作品,多演歹角。據網上記錄,他97年移民美國,隨後甚少看到他的演出,09年拍過一部在香港取景的法國電影《特攻闊少爺》,亦曾在香港上畫。

+7
+6
+5


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。