《闔家辣》吳君如鄭中基熟到乜都拍 梁詠琪︰Edan叫我媽咪好冧

撰文:沈洛嘉
出版:更新:

由吳君如監製兼主演,鄭中基(Ronald)、Gigi梁詠琪及Edan(呂爵安)、袁澧林等人主演的《闔家辣》,於今日(14/7)上畫,作為監製的吳君如跟鄭中基已合作過無數次,她坦言:「今次《闔家辣》嘅故事好貼近香港近兩年的疫情,收到劇本後即時覺得爸爸一角非阿基莫屬,首先我哋合作無間,佢而家演戲又爐火純青,正氣、感情戲、搞笑又得,好準確,真係冇他人之想。」

吳君如跟鄭中基合作無間,反而是首次正式跟Gigi合作。(梁碧玲 攝)

拍《金雞SSS》最深刻

問到最深刻的一次合作時,兩人不約而同地回答《金雞》,Ronald:「最深刻係同佢沖涼,仲要用埋保鮮紙同洗潔精,同佢拍戲唔係沖涼就發生關係。」君如補充:「其實三集都有佢,《金雞SSS》opening我哋扮野人,我哋仲要喺個樹底下發生性行為,真係要咁熟又唔尷尬先得㗎!」

點擊重溫《金雞SSS》經典片頭:

+6
Gigi笑言Edan氹得大家好開心,她:「佢會喺好遠仲未入到門口就大叫媽咪!真係好冧㗎!Feel到佢有自信得嚟又好真誠。」(梁碧玲 攝)

Edan離遠大叫媽咪冧爆Gigi

反觀Gigi雖有在同一部電影出現過,但兩人從未正式合作過,君如直言非常欣賞對方:「佢係偶像但又會轉型,拍好多戲同賀歲片,主要係好放得開,加上今次大家都有家庭同小朋友,覺得大家都會好有感受。」

闔家辣‧專訪|吳君如一句經典對白紅足30年 竟考起鄭中基梁詠琪

Gigi早知道會跟Ronald演夫婦。(梁碧玲 攝)

談及家庭,雖然Gigi跟Ronald都各自有小朋友,但卻是第一次有咁大個仔,兩人都大讚Edan乖巧有禮,Gigi:「君如21年中搵我個陣已知中基係老公,一路都未搵到個仔,佢有問我『你接唔接受到戲入面有個廿幾歲嘅仔?』我真係冇試過,反而會關心我個仔靚唔靚仔㗎?似唔似我㗎?好彩你搵咗個靚仔俾我。」後來在片場,Edan離遠便大叫Gigi做媽咪,感覺冧爆。

君如大讚Edan冇偶像包袱,完全傳遞到想佢做的事,更要達標完成。(官方提供)

君如大讚Edan冇偶像包袱又做到要求

君如同時補充尋找適合演仔仔一角都好難,當再問到滿唔滿意Edan表示時,她直言好滿意,雖然Edan是MIRROR又好紅,邀請對方試鏡又願意到場,她:「首先佢冇偶像包袱,其實去到現場反而係我好驚,我唔知啲年輕人嘅態度,我做監製都要湊好多人,我自己都好緊張,咁我都有要求嘅,又唔知佢肯唔肯聽,有時講得多佢演都會緊張。但係Edan係攰到隨時跌低瞓覺,又擘大口瞓任我哋影,影完又周圍post,成個過程係好愉快,Edan係完全傳遞到我哋想佢做嘅嘢,仲要達標完成。」

對於Edan的表現,Ronald都有讚冇彈。(梁碧玲 攝)

Ronald讚Edan:係個好努力嘅後生仔

早前Ronald夾埋Edan玩爆KB個腎,問到今次有冇認真整蠱返Edan轉頭,他笑言:「冇啦,我覺得Edan好好,佢係個好努力嘅後生仔,同埋佢好有禮貌、謙虛、斯文又真誠,佢氹得我哋好開心。」

君如表示電影上新人的確缺乏一個可以演戲的機會,因為現時較多綜藝、網台等。(梁碧玲 攝)

望多跟新人合作 擦出火花兼提供演戲機會

事實上睇到吳君如在《媽媽的神奇小子》以及《闔家辣》中,採用了不少年輕演員,而鄭中基的YouTube更會跟年輕一化的Channel合作,問到作為前輩是否有種使命感要為影圈注入更多新血時,君如表示:「使命感一定有,自己拍咗咁多年戲,緊係要同啲新人合作,佢哋有唔同思維,自己都有可能去到一個樽頸位,有時都要吸收新事物,自己都有一定知名度再同新人合作,令佢哋都可以獲得多啲機會表現自己。」

君如同Ronald都好喜歡跟新人合作。(梁碧玲 攝)

Ronald冇放棄過《龍咁威3》

Ronald就表示自己一向喜歡跟新人合作,不單止演員,即使在音樂上都喜歡跟新人合作,他直言發覺現時自己做一件事太耐,做極都是同一個方法,但就感覺到而家年青人跟自己的諗法大有分別。他:「佢哋個精神好緊要,就係無論點都要做到件事,調轉頭我哋可能會覺得好麻煩,就用個簡單方法搞掂佢,我哋會轉呔,但佢哋唔會放棄直衝埋去,我就好鍾意呢種性格。」

最後問到《龍咁威3》甚麼時候有機會面世時,他回應:「我有諗過,當時諗完又擱置咗,不過我仲未放棄嘅,或者今年都唔定。(君如:期待,你係咪自己做埋導演?)好冇呀?希望有機會。」

點擊睇更多靚相:

+10

吳君如:
Stylist: Ricky Kwok
Wardrobe: Max Mara
Necklaces: Tiffany & Co.
化妝:Midco Chu
髮型:Seiko Sin@Hair Culture

梁詠琪:
Hair: Nick Lam @Orient4
Makeup: CircleCheung@NDn.Co
Wardrobe: PORTS1961

鄭中基:
Wardrobe: KOWLOON CITY BOY, VO-YAGE
Shoes: Zegna

場地提供:
香港瑰麗酒店 Rosewood Hong Kong