2022十大電影金句｜「屈我啦」成萬能Key 張家輝榮升「張天幕」
撰文：許育民
出版：更新：
2022年是香港電影豐收的一年，除了單一票房創出新紀錄，即將更會迎來年度第四部票房衝破4000萬大關的電影，開創香港影史紀錄。套戲多人睇，戲中對白自然就成為大家生活一部分，好似《正義迴廊》一句「屈我啦！屈我啦！」就成為大家近期喊冤的最佳對白，而《明日戰記》的「天幕就係我，我就係天幕」，又係咪就算踏出戲院，都仍然洗緊你腦嘅對白呢？
今年有多部話題電影，令年產的金句對白量也不錯。（劇照）
屈我啦，屈我啦，我冇問題㗎！
戲中有大量高質對白，但就以麥沛東這句︰「屈我啦，屈我啦，我冇問題㗎！」最深入民心，更成Meme圖大家瘋傳。（《正義迴廊》影片截圖）
天可以灰，地可以灰，但我哋唔可以。Ending係點，我哋自己決定
熱血對白由古天樂講出，事半功倍，特別有說服力。（《明日戰記》劇照）
天幕就係我，我就係天幕
張家輝就係有種莫名的喜感，明明係一句滿有心計的對白，由他講出特別想笑，加上特意加工的「高鼻」，令喜感倍增，更獲網民改名為「張天幕」。（《明日戰記》劇照）
屋企人喺邊，邊到就係屋企
打開門，行出去，行遠啲
廖子妤在戲中壓軸出場，面對偶像子華都可演出一份威嚴，而且對白放在今日香港，移民潮下更令人戚戚然。（《飯戲攻心》劇照）
有幾多人喺度，咪幾多人一齊食
都係講一餐飯，一家人不和到過節做冬都冇一齊食，但其實唔需要為冇出席感婉惜，珍惜眼前聚餐的家人豈不更好。(《過時‧過節》劇照)
個世界係「西」，唔等於要做「西」人
這句對白其實等於《論語》的一句︰「君子無終食之間違仁，造次必於是，顛沛必於是」世界再壞都唔好跟住佢壞，要克己復禮。（《窄路微塵》劇照）
與怪物戰鬥，小心自己變成怪物
同一道理，面對最壞的敵人，都不可以同流合污，要堅守自己的原則，否則只淪為同謀。（《神探大戰》劇照）
每個人都想自己係被重視嗰個
故事源於一份妒忌，但其實又冇邊個想成為被冷待的一個。(《阿媽有咗第二個》劇照）
阿倫最鍾意食粉絲
全片最爆笑一句對白，鄭中基角色叫「阿倫」，當然這一句是意有所指，正好回應年中一單前輩歌手疑似「食粉絲」事件。（《闔家辣》影片截圖）