【區議會選舉‧新式選戰】網招共享義工　流水式助選抗蛇齋餅粽

區議會選舉進入了最後階段，選舉工程背後，有一群義工默默工作。「『助選義工』本來係一件好悶、好大責任嘅事，我哋希望可以將呢件事變得容易入口，等多啲人參與。」PY和FM，真正的見面次數少於五次，但並不生外。他們是「區義員」的聯合發起人。這專頁的英文名字Watlunteer，是water及volunteer的合成，利用了網上力量，召集「流動共享義工團」。參加的人不需固定只幫一個候選人，也可按自己日程選擇對應的時段。這種方式，二人稱之為「流水式助選」。

「你選區議員？點解我成個月都冇見過你嘅？」從事IT程式開發的PY指，有候選人反映不時被街坊如此問到。他和從事廣告業的FM本不認識，年紀、背景、圈子也不同，但與很多香港人一樣，近數月被Telegram、連登等聯繫起來。在平日的討論中，知道原來很多的區選候選人都沒有人脈找義工，「一直以嚟選舉義工都好難搵......有啲候選人反映，個選區太大，又得好少人幫手擺站，就變咗成個月都輪唔到或者撞唔啱，啲街坊見唔到。」

在十月中，他們一同開設「區義員」專頁招募義工，「我哋個page想令呢件事容易入口，做啲時間表出嚟，一眼望到有一至十個選項畀大家揀。你可以只揀單日制，我哋唔會要你長期留低mark死某個人，主要係希望令到大家幫候選人助選嘅成本愈來愈低。」較年輕的FM指，由最初只有三人，到現時已有約500人參加，「喺有限嘅人力之下盡量幫最多嘅候選人，呢個方法應該可行。」

工作、運作方式   銀髮族和主婦很重要

「區義員」運作簡單，管理員在和候選人聯絡後，會將有需要幫助的時段放上Telegram群組，並用「投票」功能讓義工自行選擇。之後管理員會將義工的聯絡方法直接交予候選人，或由管理員作中間人繼續安排。PY和FM指，平日幾乎無時無刻都在回覆海量訊息。從他們的文宣可見，標題有「助選原來咁簡單」、「威畀個孫睇」等，他們除了以年輕學生為目標，更多的是長者、主婦義工，也因如此，早前已開設了whatsapp群組。

助選的工作不外乎在街站叫口號、派傳單、舉廣告牌等，也有候選人提出想進行家訪、洗樓甚至慢跑活動，「到最後幫定唔幫，其實係班義工自己決定。」二人指，是否應付到助選活動應由義工自行評估，評價一個候選人是否「抵幫」亦應如是，「素人之中，有啲會係政治投機分子，做地區工作未必好好。但只要係『同路人』，就算係撞區，有求助嘅我哋都會幫手出招募。」

早於開始招募義工前，他們已進行了內部討論，「fact check」起底篩除「偽獨立」的鎅票人士（亦不會幫助建制派人士），其餘的則交由大眾判斷，「好多候選人就係睇中我們夠『純粹』，只係一個平台角色，唔使做民調睇結果先至幫手搵人。」  FM說。

素人VS建制  不對等

「候選人都唔會當我哋係救世主，頂多只係救命草。」FM笑說。他認為，素人與建制派相搏，雙方根本不是在同一條起跑線，「建制有資源有人脈，甚至可以用錢請助選團成員。素人一個人擺街站，宣傳成效唔夠大之餘，更可能有危險。」候選人如西貢何偉航、北角仇栩欣等接連受襲，在較高危的地區，候選人更需有心的義工，「個人觀察，對家啲義工冇靈魂嘅，淨似機械人咁嗌。」

因FM也有參與的關係，「區義員」是與「自由系」（民間成立的區議會資訊平台）合作聯絡素人，他們透露，一開始已有10多個素人表示需要幫助招募義工。其後陸續吸引到組織「學生歷量」、「凝聚觀塘」等合作，提供了不少義工，「最明顯嘅例子係九龍城區梁嘉莉，佢現時keep住都有10零人幫手，甚至有人係特登由青衣過去幫。」PY說，過去也有留意區選，上屆也曾於大埔區為民主派候選人助選，但形容今次參與度是前所未有的高，「以前幫嘅只局限同區一、兩個候選人，今次同全港多區候選人都有聯繫，了解多咗其他區，都有啲人會嚟問我哋意見，講下啲選舉部署咁。」

如何看今屆區選？

還有不久就是區選投票日，他們又有甚麼看法？FM坦言，在他眼中，即使取消區選也沒關係，「只不過，如果政府有嚿錢擺咗出嚟，就一定要有人幫手去拎返，將錢同資源用返喺香港人度，所以我哋先會想做啲嘢幫手。」

PY則指出，區選是一個有明確指標的「戰場」， 雖知道很多人不認同，但他認為，「喺選舉呢片土地都要爭取」。局勢方面，一班素人又有沒有機會踢走建制派？ PY傾向樂觀，「今次好多素人出嚟打大佬，先揭露咗好多大家以為難以撼動嘅人，原來成績好不堪。」他以仇栩欣的對手許清安為例，指其被發現在任內四年來只發言了82秒；另一名大埔區議員則被發現在會議中從無發言，幾乎沒參與過區議會的工作。「以前啲人覺得，從政嘅人應該要有返咁上下歷練，所以寧願投自動當選N屆嘅人，但今次事件係百年難得一遇，選民都願意畀年輕人一個機會。 」

「唔止玩一次嘅，如果試得成，可以睇埋立法會可以點玩。」PY和FM指，如「區義員」的關注度高，將在日後繼續以這種方式幫助候選人招募流水式義工。

何偉航為西貢區議會白沙灣選區的候選人，同區另有候選人陳權軍。

仇栩欣為東區區議會城市花園選區的候選人，同區另有候選人許清安和樊熙泰。

梁嘉莉為九龍城區議會愛俊選區的候選人，同區另有候選人陳麗君和左滙雄。