Jim係設計公司老闆，他本人以及他太太Amy，兩個都係鬼才設計師，兩年前把我屋企打個稀巴爛，天馬行空，家居大改造，我家face lift，變成另一個家。呢兩年我住得超舒適，真係要多謝佢兩個！Jim自細幫屋企煮餸，有基本功。他家養了十幾隻貓，多年不在家煮飯。他煮嘢有概念、有聲屎、有信心，膽粗粗，甚至未試過就開爐做實驗。今次一入門口，就大大聲介紹他的新菜——白汁蟹肉焗釀牛油果。

===睇到最尾有食譜===（上一道三傻菜VIDEO在此）

Jim的直覺很強，蟹肉加蝦仁切碎，加青檸汁薑汁，去腥味雪味，作為釀牛油果的餡料，十分匹配。

蟹肉如粉，有鮮味冇 texture，加蝦肉碎可以增加咬口；加少少白酒少少cream少少魚湯，更加和味醒神。

見Jim佢勁有信心炒蝦炒蟹，我們一眾十分期待。最後主角出場，超昂貴肯雅牛油果!!!

Jim用刀一割，大叫一聲：瀨嘢！

原來墨綠發光的靚牛油果，硬到冇朋友，太生太澀，切唔落手。

我太太 Louisa係生果專家，問Jim，你買過牛油果未㗎？Jim搖頭，他是第一次買第一次煮呢味嘢！Louisa話牛油果生定熟摸上手便知，一般都會買回家兩三天才好食。好啦，我兩公婆馬上去買過。

在超市見到，都係又硬又生。打電話給Jim，問佢可否轉用火龍果，佢一口say no，唯有盡揀，半生熟都殺。

回家，Jim把牛油果開邊，掏空果肉，剩下小杯形果殼，作焗釀蟹肉的小容器。為補救果肉生硬問題，他把果肉切碎，另一半用攪伴機打爛。為求試效果，餡料分兩種：其一，蟹肉與果肉分層，其二，果肉與蟹肉混合；兩種分開釀入不同「果杯」 。

見Jim咁勇，我有少少感動，也有少少共鳴，因為我也喜歡實驗，不怕撞板。有時請客，朋友在餐桌等食，我紅酒落肚，會即興創作，未煮過都膽粗粗落鑊。做業餘廚師最開心，冇包袱，說不定撞出驚喜。

好，the moment of truth，牛油果 cup cake焗到香噴噴，試菜！

結果係，失敗！

果肉青澀，沒有軟綿之效，反而蟹肉果肉分層的那幾個「果杯」，把果肉揭開，蟹肉清甜可口。Jim玩得，笑聲爽朗，EQ甚高，完全不介意失手，反而因為大家你一句我一句，笑到流眼淚！

註：如果係熟牛油果，呢味菜，一定work，Jim話嘅！一星期後，牛油果熟透，Jim用來拼了一碟沙律，yummy！

三傻實驗簡譜：

材料：牛油果，急凍蟹肉，急涷虎蝦肉，紫洋蔥，乾蔥，芝士粉，忌廉，白酒，魚湯。1. 蟹肉、蝦仁切小粒出水，加入少許薑汁和青擰汁去雪味，加少許鹽備用。2. 用牛油炒香洋蔥、乾蔥，放蝦仁炒至半熟。落魚湯，白酒少許，焗30秒左右後落蟹肉及忌廉，熄火。3. 牛油果開半起肉，肉切成小粒，混入之前忌廉蟹肉，釀回果殼內。4. 牛油果上面加上芝士粉，用170度焗爐焗10分鐘左右，見芝士轉成金黃色即成。