孔德賢今日（15/1）現身牛頭角出席《「寵物似人主人型」金寵獎紅地氈頒獎禮》記者招待會，孔德賢接受《香港01》訪問時表示：「我係呢個活動推廣大使，亦係一個可能嘅參賽者，因為我自己都帶咗自己嘅狗狗過嚟，希望睇下佢有冇機會喺呢個紅地毯攞到獎。」

孔德賢親揭張智霖片場為人

提到近日為新劇開工，孔德賢表示：「大家而家見到我呢個髮型，其實係拍緊一套劇叫做《璀璨之城》，係同張智霖同埋吳卓羲一齊拍嘅，咁就跟佢哋學嘢啦。張智霖真人好 Nice而且好靚仔 ，係男仔都會中意，同埋同佢相處，佢係好放鬆嘅狀態，會同大家傾下偈，就算佢唔喺現場佢都會請大家飲嘢，令到大家都好開心。」

孔德賢續說：「吳卓羲佢係好型好man嘅一個演員，即係有時你同佢傾偈，佢都會同你分享完全唔吝嗇嘅，佢哋兩個都係個好好嘅前輩。（佢會唔會爆肚講『實知』？）哈哈，咁我又冇聽到。咁啱冇聽到。」